5 Moze 4:1-49
4 ”Mifondrondrongo yaʼami Izaraʼeli. Ufahaʼö ami ba gamakhoita hegöi ba gangetula huku. Miʼoʼö daʼa fefu enaʼö tola auri ami+ ba mirugi danö nirabumi nibeʼe Yehowa khömi, Lowalangi ndra tuami.
2 Böi minönö mazui miʼalösi wehede nifaʼemagu khömi,+ enaʼö tola miʼoʼö goroisa Yehowa Lowalangimi nifaʼemagu khömi.
3 ”No miʼila samösa hadia nifalua Yehowa ba Mbaʼali Weoro. Fefu zoloʼö khö Mbaʼali Weoro+ ba gotaluami, ihori ira Yehowa Lowalangimi.
4 Hizaʼi, yaʼami si lö faröi khö Yehowa Lowalangimi, auri nasa ami irugi maʼökhö.
5 No ufahaʼö ami ba gamakhoita hegöi ba gangetula huku+ simane niwaʼö Yehowa khögu, enaʼö miʼoʼö daʼö fefu ba danö nirabumi dania.
6 Miʼoʼö fefu daʼö+ enaʼö laʼila dania waʼatua-tuami+ hegöi faʼaboto ba dödömi+ dozi samondrongo amakhoita daʼa. Ba lamane dania, ’Sindruhu so waʼatua-tua ba faʼaboto ba dödö ba soi sebua andre.’+
7 Hezo soi sebua sangokhögö lowalangi sahatö khöra simane Lowalangida Yehowa? Ahatö ia khöda gofu hawaʼara taʼangaröfili ia.+
8 Hezo soi sebua sangokhögö amakhoita satulö ba angetula huku simane Oroisa nifaʼemagu khömi maʼökhö?+
9 ”Börö daʼö, miʼangelama ba mifaigi faböi olifu ami zi no miʼila ba enaʼö lö tebulö ia ba dödömi sandrohu faʼaurimi. Ba mifatunö göi daʼö fefu ba ndraonomi hegöi ba maʼuwumi.+
10 Me mosindro ami ba Horebi föna Yehowa Lowalangimi, imane khögu Yehowa, ’Owuloi khögu soi daʼö enaʼö lafondrondrongo wehedegu.+ Daʼö mbörö dania wa tola lafahaʼö ira ba wamosumange yaʼo+ sandrohu faʼaurira ba gulidanö ba lafahaʼö göi ndraonora.’+
11 ”Andrö mifahatö ami ba miʼozizio ba gahe hili. Mohola hili daʼö irugi mbanua si yawa galitönia, ba alua waʼogömi-gömi awö lawuo saweʼe-weʼe saitö sibai.+
12 Ibörögö fahuhuo khömi Yehowa moroi ba galitö andrö.+ Mirongo wehedenia, hizaʼi lö miʼila ia ba ngaʼeu niha,+ ha li nirongomi.+
13 Lö ara, ifaʼema khömi mbuʼusa linia,+ niwaʼönia khömi enaʼö miʼoʼö, yaʼia daʼö si Fulu Oroisa.*+ Aefa daʼö, isura fefu ba zi dua ngaʼörö kara.+
14 Me luo daʼö, Yehowa zangumaʼö khögu ba wamahaʼö yaʼami amakhoita ba angetula huku si lö tola löʼö miʼoʼö ba danö si möi ami nibeʼenia khömi.
15 ”Lö niʼilami Yehowa ba ngaʼeu niha me fahuhuo ia khömi ba Horebi moroi ba dalu galitö andrö. Börö daʼö, miʼangelama
16 faböi mifalua zi lö sökhi, böi mifazökhi khömi nadu nitoto famaedo hadia ia, simane ira alawe mazui ira matua,+
17 ngawalö gurifö ba gulidanö mazui fofo ba dalu mbanua,+
18 urifö sanana-nana ba danö mazui ngawalö giʼa si so ba nidanö.+
19 Ba ginötö mifaigi dalu mbanua ba miʼila luo, baŵa, döfi, ba fefu zaradadu zorugo, böi adöni dödömi ba wamosumange mazui mangalulu ami ba daʼö,+ si no ibeʼe Yehowa Lowalangimi ba niha gulidanö fefu.
20 No iʼohe ami Yehowa ba iheta ami ba danö Miserai, moroi ba nahia wamöbözi siʼöli,* enaʼö tobali ono mbanuania* ami+ simane salua maʼökhö.
21 ”Mofönu khögu Yehowa börö ami,+ ba möi ia ba hölu wa lö uʼötö Nungo Nidanö Yoridano mazui möido ba danö si sökhi si tobali ondröita nibeʼe Yehowa Lowalangimi khömi.+
22 Ba danö daʼa mate ndraʼo. Lö uʼötö Nungo Nidanö Yoridano,+ ha yaʼami zangötö ba mirabu danö si sökhi andrö.
23 Mifaigi sibai faböi olifu ami mbuʼusa li niwaʼö Yehowa Lowalangimi khömi+ ba böi mifazökhi khömi nadu nitoto famaedo hadia ia si no itegu ami Yehowa Lowalangimi.+
24 Yehowa Lowalangimi andrö amaedola galitö si manga hadia ia,+ iʼandrö ba niha enaʼö ha khönia labeʼe zumange.+
25 ”Na so ndraonomi mazui maʼuwumi ba no ara toröi ira ba soi daʼa, aefa daʼö mifalua zi lö sökhi, mifazökhi khömi nadu nitoto+ famaedo hadia ia, ba mifalua zi lö atulö föna Yehowa Lowalangimi irege afökhö dödönia,+
26 tobali samaduhuʼö khögu mbanua si yawa awö danö maʼökhö andre wa hasambalö tehori ami ba danö si no mirabu me no aefa miʼötö Nungo Nidanö Yoridano. Tenga ba daʼö manö toröi ami börö me hasambalö ihori ami.+
27 Ifazawili ami Yehowa ba gotalua soi böʼö misa.+ Ba lö ato ba gotaluami zauri+ ba soi nifazawili Yehowa yaʼami.
28 Ba daʼö dania mifosumange lowalangi nifazökhi danga niha moroi ba geu ba kara,+ si tebai mangila, mamondrongo, manga mazui si tebai mangago hua hadia ia.
29 ”Na miʼalui ba daʼö Yehowa Lowalangimi, hasambalö wa misöndra ia+ asala miʼandrö khönia wanuturu lala soroi ba dödö awö nosomi* maʼasambua.+
30 Me alua khömi daʼö fefu ba tosasa sibai dödömi, miʼangaröfili Yehowa Lowalangimi ba mifondrondrongo niwaʼönia.+
31 Börö me Yehowa Lowalangimi andrö Lowalangi sebua faʼahakhö dödö.+ Lö iröi ami, mazui ilulu ami ba waʼatekiko, ba lö olifu ia mbuʼusa linia khö ndra tuami si no möi ia ba hölu.+
32 ”Iadaʼa, miʼangeragö zalua me föna fatua lö si tumbu ami, iʼotarai me iwöwöi niha Lowalangi ba gulidanö. Mitandraigö wangalui ba mbalö danö faföfö, hadia no irai alua zahöli-höli dödö simane daʼa? Hadia so niha si no irai mamondrongo simane daʼa?+
33 Hadia no irai tesöndra soi simane yaʼami, samondrongo li Lowalangi me fahuhuo ia moroi bakha ba galitö ba samösa lö si mate?+
34 Mazui, hadia no irai iforege Lowalangi ba wamili sambua soi moroi ba soi böʼö tobali tana khönia? Hadia no iʼasogö wanguhuku, tandra sahöli-höli dödö,+ fasuwöta,+ ba ifalua daʼö faoma tangania sabölö+ hegöi taʼionia sebua kuaso* awö ngawalö gamuatania sataʼu niha,+ simane nifalua Yehowa Lowalangimi khömi ba danö Miserai ba zanehe ami?
35 Iforomaʼö khömi daʼö fefu enaʼö miʼila wa Yehowa andrö Lowalangi sindruhu.+ Lö hadöi Lowalangi tanö böʼö baero ia.+
36 Ifarongogö linia moroi ba mbanua si yawa ba wameʼe fotu khömi. Iforomaʼö göi khömi galitönia sebua ba gulidanö, ba terongo daromalinia moroi ba galitö andrö.+
37 ”Börö me iʼomasiʼö ndra tuami ba no ifili maʼuwura,+ andrö wa iheta ami moroi ba danö Miserai si fao faʼabölönia sebua.
38 Ifofanö fönami soi sabölö ebua ba sabölö moroi khömi ba wolohe yaʼami ba danöra ba enaʼö ibeʼe khömi danöra tobali ondröita, simane salua maʼökhö.+
39 Börö daʼö, mitörö tödömi maʼökhö andre ba böi olifu ami wa Yehowa andrö Lowalangi sindruhu ba mbanua si yawa hegöi ba gulidanö.+ Lö hadöi tanö böʼö.+
40 Lö tola löʼö miʼoʼö gamakhoita awö goroisania nifaʼemagu khömi maʼökhö, enaʼö ohahau dödömi hegöi ngaʼötömi, ba enaʼö anau nosomi ba danö nibeʼe Yehowa Lowalangimi khömi.”+
41 Me luo daʼö, so tölu ngawua mbanua nifili Moze ba zinga Nungo Nidanö Yoridano tanö ba gatumbukha.+
42 Na so zamunu niha si tenga niʼodödögö, ba tenga börö waʼafatuwunia ba niha daʼö,+ ifili fazambua mbanua daʼö si tola isawa faböi mate ia.+
43 Banua nifili ba niha Rubeno yaʼia daʼö Beseri+ ba danö si mate si so tanö ba hili, Ramoti+ ba Gileadi ba niha Gado, Golana+ ba Mbazana ba niha Manase.+
44 Daʼa Goroisa Moze+ nifaʼemania ba ndraono Gizaraʼeli.
45 Daʼa wamasugi ba dödö, amakhoita, ba angetula huku nifaʼema Moze ba ndraono Gizaraʼeli me no aheta ira ba danö Miserai,+
46 ba mbanua Nungo Nidanö Yoridano, ba ndraso föna Mbeti-weoro,+ ba soi nifatörö Zihona razo niha Gamori, si toröi ba Hesibona,+ nikalaisi Moze hegöi iraono Gizaraʼeli me no aheta ira ba danö Miserai.+
47 Larabu soinia hegöi soi Ogi+ razo Mbazana, yaʼia daʼö razo niha Gamori si darua si so ba Nungo Nidanö Yoridano tanö ba gatumbukha.
48 Soi daʼö iʼotarai Naroeri,+ si so ba zinga Ndraso Garono ofeta ba Hili Ziono, yaʼia daʼö Hili Heremono,+
49 fao ba daʼö fefu mbanua Garaba tanö ba gatumbukha Nungo Nidanö Yoridano ofeta ba Nasi Garaba* ba gahe hili Wisiga.+
Nisura ba gahe zura
^ Sin.: ”si Fulu Taromali”.
^ Eluahania moroi ba wamakao safökhö.
^ Mazui ”okhötania”.
^ Faigi Geluaha Ngawua Wehede.
^ Sin.: ”taʼionia si no ifadölö”.
^ Eluahania Asi Sasi-asi mazui Asi si Mate.
