Halöwö Zinenge 11:1-30
11 Larongo ira sinenge hegöi ira talifusö si so ba Yudea wa no göi latema daromali Lowalangi niha ba soi böʼö.
2 Me möi Wetero ba Yeruzalema, ibörögö latahigö ia* niha si fao tödö ba huku suna,+
3 lamane, ”No möiʼö ba nomo niha si lö musuna, ba fao ndraʼugö khöra wemanga.”
4 Ihaogö izara-zara Fetero wanutunö hadia zalua. Imane,
5 ”Ba mbanua Yafo me mangandrö ndraʼo, alua khögu gangilata. So zi hulö nukha sebua si otarai mbanua si yawa. Hulö no mugogohe mbalö nukha andrö faföfö, aekhu gamaudu fönagu.+
6 Uhaogö wamaigi ba hiza, so bakha fefu ngawalö gurifö si öfa ahe, utu ndruʼu, sanana-nana ba danö hegöi ngawalö wofo ba dalu mbanua.
7 Aefa daʼö urongo li si hede imane, ’He Fetero, ozizio. Taba ba a!’
8 Hizaʼi umane, ’Tebai uʼa daʼö Soʼaya. Lö irai uʼa gö si raʼiö ba si tebai moloʼö huku.’
9 Ifuli urongo zui li si hede moroi ba mbanua si mendrua kali, ’Böi waʼö raʼiö zi no ihaogö Lowalangi.’
10 Tölu kali alua daʼö, ba tefazawa fefu ba dalu mbanua.
11 Tefaudu ba ginötö daʼö, tohare datölu niha moroi ba Kaisarea,+ no mozizio ira föna nomo si toröi yaʼaga, nifatenge ba wangondrasi yaʼo.
12 Ifatunö khögu eheha niʼamoniʼö enaʼö lö aombö dödögu wefao khöra. Fao göi khögu ndra talifusö si daönö andre ba möiga ba nomo niha daʼö.
13 ”Itutunö khöma wa no iʼila samösa malaʼika si zizio ba nomonia ba imane, ’Fatenge niha enaʼö möi ira ba Yafo wogaoni Simoni sotöi Fetero,+
14 iʼombakhaʼö khöu hewisa lala enaʼö teʼorifi ndraʼugö hegöi ösi nomou.’
15 Hizaʼi me ubörögö fahuhuo, möi khöra geheha niʼamoniʼö simane khöda me mböröta.+
16 Me uʼila daʼö, itörö tödögu niwaʼö Zoʼaya ba zi hauga kali, yaʼia daʼö, ’Ibayagö niha Yohane faoma idanö,+ hizaʼi tebayagö ami dania faoma eheha niʼamoniʼö.’+
17 Börö daʼö, na ibeʼe khöra Lowalangi mbuala si fagölö simane nitemada yaʼita si faduhu tödö khö Zoʼaya Yesu Keriso, haniha ndraʼodo andre irege utenawa Lowalangi?”+
18 Me larongo daʼö, lö fadaʼawa ira saʼae* ba lafolakhömi Lowalangi ba lamane, ”Na simane daʼö, ibeʼe göi ginötö Lowalangi ba soi böʼö ba wamalalini era-erara enaʼö lasöndra waʼauri.”+
19 Me no aefa labunu Zitefano,+ göna famakao ndra nifahaʼö ba muzawili ira irugi Wenisia, Sifirusi hegöi ba Gandriokhia. Hizaʼi, lafaʼema daromali ha ba niha Yahudi.+
20 Hewaʼae simanö, so ndra nifahaʼö moroi ba Zifirusi hegöi Kirene si möi ba Gandriokhia. Ba daʼö ibörögö laturiaigö duria somuso dödö sanandrösa khö Yesu Keriso ba niha sangogunaʼö li Yunani.
21 Fao khöra Yehowa* ba ibörögö ato zi faduhu tödö khö Zoʼaya,+ tobali ira nifahaʼö.
22 Me larongo duriara banua niha Keriso si so ba Yeruzalema, lafatenge Mbaranaba+ irugi ba Gandriokhia.
23 Me irugi ba iʼila waʼasökhi dödö sebua* moroi khö Lowalangi, omuso dödönia ba ifarou dödöra fefu enaʼö lö faröi ira khö Zoʼaya soroi ba dödö.+
24 Baranaba andrö niha si sökhi, safönu eheha Lowalangi ba samati. Börö daʼö, monönö waʼato nifahaʼö Zoʼaya.+
25 Aefa daʼö, mofanö ia ba Dareso, iforege wangalui Saulo.+
26 Me no falukha ira, iʼohe ia Mbaranaba ba Gandriokhia. Döfi waʼara fao ira ba mbanua niha Keriso ba daʼö, ba lafahaʼö niha sato. Börö wanuturu lala moroi ba geheha Lowalangi, ba Gandriokhia andre zi oföna sibai labeʼe töi ndra nifahaʼö yaʼia daʼö niha Keriso.+
27 Me luo daʼö, tohare ndra samaʼeleʼö+ moroi ba Yeruzalema möi ira ba Gandriokhia.
28 Börö wanuturu lala moroi ba geheha Lowalangi, samösa zamaʼeleʼö sotöi Agabo,+ iwaʼö wa lö ara tö alua lofo sabölö-bölö ba zi sagörö ulidanö,+ ba sindruhu wa itörö niwaʼönia andrö ba götö Kalaudio.
29 Börö daʼö, lahalö gangetula ira nifahaʼö ba wamaʼoheʼö fanolo,+ ndrohu-ndrohu waʼabölöra zamösana+ soguna khö ndra talifusö ba Yudea.
30 Lafatenge Mbaranaba hegöi Saulo+ ba wolohe tolo-tolo andrö khö ndra satua sokubaloi.
Nisura ba gahe zura
^ Mazui ”fadaʼawa khönia”.
^ Sin.: ”lö hede-hedera”.
^ Faigi Geluaha Ngawua Wehede.
