Halöwö Zinenge 4:1-37
4 Gasa-gasa wahuhuosa zi darua andre ba niha, möi khöra ndra ere, kafalo zanaro osali hegöi ira Sadukaiʼo.+
2 Mofönu ira khö ndra sinenge börö me lafahaʼö niha sato ba lö labiniʼö wangombakha fanusugi Yesu moroi ba gotalua zi mate.+
3 Andrö, laraʼu Wetero faoma Yohane, labeʼe ira bakha ba gurunga+ irugi mahemolu, börö me no bongi saʼae.
4 Hizaʼi, ato zamondrongo fehede andrö ba faduhu dödöra irege monönö waʼato nifahaʼö mato 5.000 niha.+
5 Mahemolunia, owulo ndra samatörö, ira sondröniaʼö hegöi ira sangila amakhoita ba Yeruzalema,
6 fao gafalo gere sotöi Hanasi,+ Kayafa,+ Yohane, Alesandro, ba fefu zi fahatö khö gafalo gere.
7 Laʼandrö khö Wetero faoma Yohane enaʼö mozizio ira ba gotaluara ba manofu ira, ”Hezo moroi waʼabölö daʼa khömi mazui ba döi haniha wa mifalua daʼa?”
8 Aefa daʼö itema lira Fetero safönu eheha niʼamoniʼö,+
”He yaʼami ira samatörö ba sondröniaʼö,
9 na lahuku ndraʼaga maʼökhö andre börö me no mafalua zi sökhi ba niha sombuyu-mbuyu töla,+ ba omasi ami miʼila haniha zamadöhö yaʼia,
10 maʼombakhaʼö khömi hegöi ba niha Gizaraʼeli fefu wa tefadöhö niha andre börö döi Yesu Keriso niha Nazareta+ andrö nibunumi ba döla geu.+ Hizaʼi, no isusugi ia Lowalangi moroi ba gotalua zi mate.+ Yaʼia mbörö wa tola mosindro ba abölö niha daʼa fönami.
11 Yaʼia andrö ’kara nitimbagömi yaʼami samazökhi omo, ba no tobali kara*+ sabölö moguna’.
12 Baero daʼö, lö fangorifi ba danö böʼö ba löʼö sa töi böʼö+ nibeʼe ba niha gulidanö ba wangorifi yaʼita.”+
13 Ahöli dödöra me lö faʼataʼu khö Wetero faoma Yohane, börö me laʼila wa yaʼira si darua andre niha si toʼölö manö ba si lö sekola.*+ Aboto ba dödöra wa si fao khö Yesu mböröta niha si darua daʼa.+
14 Me laʼila no mosindro niha nifadöhö daʼö ba gotalua zinenge si darua,+ lö hede-hedera saʼae.+
15 Börö daʼö, lafofanö baero zi datölu andrö moroi ba gödo Zangetuʼö Huku, ba ibörögö mangosara ira.
16 Lamane, ”Hadia nifaluada ba niha daʼa?+ No anehe fefu niha Yeruzalema+ ba ngawalö dandra sahöli-höli dödö nifaluara. Lö taʼila taʼosilöʼögö daʼö.
17 Börö daʼö, faböi tehöngö ba niha misa, datafetaʼu ira ba tawaʼö khöra enaʼö böi lafatunö ba niha döi daʼö.”+
18 Aefa daʼö, lakaoni zinenge si darua andrö ba lategu ira enaʼö böi lafadunö-dunö mazui mamahaʼö ira ba döi Yesu.
19 Imane khöra Fetero faoma Yohane, ”Yaʼami zangai angetula hezo zatulö ba wamaigi Lowalangi: Khömi niʼoʼö mazui khö Lowalangi.
20 Na yaʼaga, tebai mabato wangombakha sanandrösa ba zi no maʼila hegöi si no marongo.”+
21 Me no aefa zui lafetaʼu ndra sinenge si darua andrö, laʼefasi ira börö me lö lasöndra zi tobali dane-dane ba wanguhuku yaʼira. Inönö nasa, ataʼu ira ba niha sato+ börö me fefu zangila salua andrö lasuno Lowalangi.
22 No töra 40 fakhe ndröfi niha nifadöhö ba dandra sahöli-höli dödö andrö.
23 Me no laʼefasi ira, mofanö zinenge si darua andrö, lafalukhaisi nifahaʼö tanö böʼö ba latutunö niwaʼö gafalo gere khöra hegöi ira sondröniaʼö.
24 Me no larongo daʼö, ba mangandrö ira khö Lowalangi,
”He Lowalangi Fondrege Zalawa, yaʼugö zamazökhi banua, tanö, asi hegöi ösinia maʼafefu,+
25 ba sangumaʼö khö duama Dawido+ si fao eheha niʼamoniʼö, ’Hana wa abu dödö niha moroi ba ngawalö soi, ba dozi banua misa laʼera-era zi lö boto?
26 No mamaʼanö ndra razo ba gulidanö, ba hasara dödö ndra samatörö ba wolawa Yehowa* hegöi niha nibayoininia.’*+
27 Sindruhunia no owulo ba mbanua andre Herode, Fondrio Filato,+ iraono Gizaraʼeli hegöi soi böʼö ba wolawa enoni niʼamoniʼö khöu si no öbayoini sotöi Yesu+
28 ba wamalua hadia zi no öhonogöi tangamö ba ohitö dödöu ba zilalö.+
29 He Yehowa,* nehegö wametaʼura andrö, ba yaʼaga sawuyumö andre, beʼe khöma waʼabarani ba wamaʼema taromalimö.
30 Yaʼöʼoroʼö dangau ba wamadöhö, ba yaʼalua ngawalö zahöli-höli dödö+ hegöi tandra ba döi Yesu, enonimö niʼamoniʼö.”+
31 Me no aefa mangandrö ira soroi ba dödö, modögö nahia waʼowulora, ba fahöna khöra geheha niʼamoniʼö,+ aefa daʼö lö ataʼu ira wamatunö taromali Lowalangi.+
32 Hasara dödö ba ha sambua gera-era ndra nifahaʼö, ba samösa lö sangumaʼö wa khönia manö gokhötania. Hizaʼi, faoma labeʼe khö nawöra zamösana.+
33 Aefa daʼö, lö laböhöli wamaduhuʼö fanusugi Soʼaya Yesu+ ira sinenge si fao faʼatua-tua, ba dozi ira fahöna latema waʼasökhi dödö sebua* moroi khö Lowalangi.
34 Samösa lö soʼamböta ba gotaluara,+ fefu zi so tanö hegöi omo lafamawa, ba laʼohe mböli zi no laʼamawa andrö
35 ba labeʼe ba danga ndra sinenge.+ Aefa daʼö, labagi-bagi gefe andrö ira sinenge moloʼö soguna ba zi samö-samösa niha.+
36 So samösa niha Lewi moroi ba mbanua Zifirusi sotöi Yosefo, mazui Baranaba+ moloʼö töi nibeʼe ndra sinenge (na lafoʼeluaha, ”Ono Wondrara Dödö”),
37 so sagörö mbenuania ba no ifamawa, aefa daʼö ibeʼe mböli danö andrö khö ndra sinenge.+
Nisura ba gahe zura
^ Kara daʼa labeʼe ba gamaudu watalinga nomo enaʼö aro.
^ Eluahania ha maʼifu wamahaʼö si no latema ba sekola agama niha Heberaiʼo, tenga eluahania lö laʼila mombaso mazui manura.
^ Mazui ”Keriso”.
^ Faigi Geluaha Ngawua Wehede.
