Halöwö Zinenge 5:1-42
5 So samösa ndra matua sotöi Anania, ba töi woʼomonia Safira. Lafamawa danöra.
2 No ibeʼe yawa ösa mböli danö andre, ba iʼila göi daʼö foʼomonia ira alawe wa lö sahori ibeʼe khö ndra sinenge.+
3 Imane Fetero, ”He Anania, hana wa ötehegö ifaelungu ndraʼugö Satana,+ irege lö ataʼuʼö falimo ba wolawa eheha niʼamoniʼö,+ ba öbeʼe yawa ösa mböli danö andrö?
4 Hadia tenga khöu danö andrö, ba me no öfamawa, dali ndraʼugö hezo öʼogunaʼö gefenia? Hana wa lö sökhi dödöu? Tenga niha nilimomö, hizaʼi Lowalangi.”
5 Me irongo daʼö Anania, alabu ia tou ba mate. Oi ataʼu fefu niha samondrongo salua andre.
6 Aefa daʼö, tohare ösa ndraono matua labukusi mbotonia ba lembe, laʼohe ia baero ba lakoʼo.
7 Mato tölu za aefa daʼö, tohare woʼomonia ira alawe ba lö iʼila hadia zalua.
8 Manofu khönia Wetero, ”Hadia awai ba daʼa mböli danö niʼamawami andrö?” Itema li, ”Awai.”
9 Imane Fetero, ”Hana wa no hasara dödömi wanandraigö eheha Yehowa?* Hiza! Niha sogoʼo foʼomomö so ira ba mbawandruhö, ba laʼohe ndraʼugö göi.”
10 Iʼanemaiʼö alabu tou Zafira ba gahe Wetero ba mate ia. Me mangawuli bakha ndraono matua no mege, laʼila wa no mate ia. Aefa daʼö, laʼohe ba lakoʼo ia ba zinga woʼomonia.
11 Fefu nifahaʼö ba Yeruzalema hegöi samondrongo salua andre oi ataʼu ira.
12 Lö laböhöli ira sinenge wamalua ngawalö zahöli-höli dödö hegöi tandra ba gotalua niha sato.+ Si toʼölönia, owulo ira ba Newali Nifosagö khö Zelomo.+
13 Hewaʼae na ataʼu niha böʼö wefao khöra, hizaʼi ato zanuno yaʼira.
14 Itugu monönö waʼato niha si faduhu tödö khö Zoʼaya, he ira alawe he ira matua.+
15 Laʼohe niha sofökhö ba lala ba lafadölö ba naha wemörö side-ide, enaʼö na itörö Fetero göna khöra lumö-lumönia.+
16 Ato niha si tohare moroi ba mbanua si fasui Yeruzalema laʼohe niha sofökhö hegöi nifakao malaʼika si lö sökhi ba tefadöhö ira fefu.
17 Hizaʼi, mosindro gafalo gere ba fefu zi fao ba agama Zadukaiʼo, afökhö sibai dödöra.
18 Laraʼu ba labeʼe bakha ba gurunga ndra sinenge.+
19 Ba zi bongi daʼö, tohare malaʼika Yehowa* ibokai mbawandruhö gurunga,+ iʼohe ira baero ba imane,
20 ”Miʼofanö ba miʼosindro ba gosali, böi miböhöli wamatunö ba niha duria fangorifi andre.”
21 Me larongo daʼö, möi ira ba gosali sihulö wongi ba labörögö wamahaʼö.
Me tohare gere sebua awö zi fao khönia, laʼowuloi fefu Zangetuʼö Huku ba fefu zondröniaʼö ba Gizaraʼeli, lafatenge zohalöwö ba gurunga enaʼö laʼohe fönara ndra sinenge andre.
22 Hizaʼi, me larugi ira sohalöwö, lö hadöi ira sinenge bakha ba gurunga. Börö daʼö, mangawuli ira ba lamane,
23 ”No mahaogö wokusi bawandruhö ba no mosindro zanaro ba daʼö, hizaʼi me mabokai, lö hadöi niha bakha.”
24 Me irongo daʼö kafalo zanaro osali hegöi ira kafalo gere, abu dödöra börö me lö laʼila hadia zalua aefa daʼö.
25 So samösa zi tohare samatunö khöra, ”Ba gosali so niha nikurumi andrö, no mosindro ira ba lafahaʼö niha sato.”
26 Aefa daʼö, mofanö gafalo zanaro osali awö zohalöwö khönia ba wondraʼu ira sinenge, hizaʼi lö laböbözi börö waʼataʼura ma latebu ira kara niha sato.+
27 Laʼohe ndra sinenge föna Zangetuʼö Huku, aefa daʼö manofu khöra gafalo gere
28 imane, ”No abeʼe wehedema khömi enaʼö böi mifahaʼö niha ba döi daʼö.+ Hizaʼi, no mifönui Yeruzalema famahaʼömi ba mifobahulu ndraʼaga ba waʼamate niha daʼö.”+
29 Latema li ira Fetero hegöi sinenge tanö böʼö, ”Abölö sökhi woloʼö khö Lowalangi me yaʼia zamatörö yaʼaga moroi ba woloʼö ba niha.+
30 Lowalangi ndra tuada zanusugi Yesu nibunumi ba niʼosömi ba döla geu.+
31 No iʼalawaʼö ia Lowalangi ba gambölönia+ tobali Salawa+ ba Sangefaʼö,+ enaʼö lafalalini gera-erara iraono Gizaraʼeli ba teʼefaʼö horöra.+
32 Yaʼaga zamaduhuʼö salua andre fefu,+ simanö göi geheha niʼamoniʼö+ nibeʼe Lowalangi ba niha sangataʼufi yaʼia tobali samatörö yaʼira.”
33 Me larongo daʼö, mofönu sibai ira ba edöna labunu ndra sinenge.
34 Hizaʼi, so samösa Warizaiʼo sotöi Gamalieli,+ samahaʼö Oroisa Moze nifosumange niha, mosindro ia ba gotalua Zangetuʼö Huku ba iʼandrö enaʼö laʼohe baero sabata ndra sinenge andrö.
35 Aefa daʼö imane, ”Yaʼami iraono Gizaraʼeli, mihaogö miʼangeragö hadia nifaluami ba niha andre.
36 Me föna, so samösa zotöi Deoda, iwaʼö wa niha nifosumange ia. Mato 400 niha zi fao khönia. Hizaʼi, labunu ia irege fabali fefu zi fao khönia andrö, lö yaʼira saʼae.
37 Aefa daʼö, so samösa zotöi Yuda, niha Galilaia ba ginötö wamasuraʼö töi niha ba zura, so göi zi fao khönia. Hizaʼi, mate ia ba fabali fefu zi fao khönia.
38 Moloʼö yaʼo ba zalua andre, böi migadu-gadu halöwö ndra niha daʼa. Mitehegö manö khöra. Na moroi ba niha atö halöwö daʼa hegöi niʼera-erara andre, hasambalö adudu.
39 Hizaʼi, na moroi khö Lowalangi, tebai midudugö.+ Tola manö lafotöi ami solawa Lowalangi.”+
40 Laʼoʼö niwaʼö Gamalieli, ba lakaoni ndra sinenge, laleasi ira,+ laʼandrö khöra enaʼö laböhöli wahuhuosa ba döi Yesu, aefa daʼö laʼefasi ira.
41 Mofanö ndra sinenge föna Zangetuʼö Huku, omuso dödöra+ börö me no sinangea laʼoʼaya ira ba döinia andrö.
42 Ero maʼökhö ira ba gosali hegöi ba nomo-omo misa,+ lö laböhöli wamahaʼö hegöi ba wanuriaigö turia somuso dödö sanandrösa khö Keriso, yaʼia daʼö Yesu.+
