Ba Niha Heberaiʼo 5:1-14
5 Dozi ere sebua nituyu moroi ba gotalua niha, lafataro ia ba wondrorogö ngawalö zoʼamakhaita khö Lowalangi+ soguna ba niha, enaʼö tola ifaʼema mbuala ba sumange nitunu ba wangefaʼö horö.+
2 So khönia waʼahakhö dödö ba niha sambö faʼaboto ba dödö ba samalua sala,* börö me so göi zoʼamböta ia,
3 irege hasambalö ibeʼe zumange salahi horönia samösa, simane nifaluania ba horö soi andrö.+
4 Tebeʼe döi sebua andre ha ba niha nikaoni Lowalangi simane Aʼaroni, tenga börö me nilau dödönia samösa.+
5 Simanö göi Keriso, lö ifolakhömi samösa ia+ tobali ere sebua. Hizaʼi Lowalangi zamolakhömi yaʼia me imane, ”Onogu ndraʼugö; iadaʼa tobali ndraʼo Amau.”+
6 Imane göi ba ayati tanö böʼö, ”Ere ndraʼugö irugi zi lö aetu simane Melekhisede.”+
7 Sagötö feʼaso Keriso ba gulidanö, mangandrö ia soroi ba dödö, ifaʼema wakaosa si fao taŵa hörö ba feʼao sabölö-bölö+ khö Lowalangi, si tola mangorifi yaʼia moroi ba waʼamate, ba tefondrondrongo börö wangataʼufinia Lowalangi.
8 Hewaʼae ono ia, ifomaha ia woloʼö moroi ba ngawalö wamakao nitaögönia.+
9 Me no moʼahonoa ia,+ moʼömö ia wameʼe faʼauri si lö aetu ba niha soloʼö khönia,+
10 börö me no itatugöi ia Lowalangi tobali ere sebua simane Melekhisede.+
11 Oya zinangea mafatunö sanandrösa khönia, hizaʼi abua khöma wanutunö, börö me aweʼe-weʼe dalingami wamondrongo.
12 Hewaʼae na sinangea tobali ami samahaʼö iadaʼa, moguna nasa so zamomaha yaʼami iʼotarai wamobörö, dane-dane+ sanandrösa ba wehede niʼamoniʼö khö Lowalangi, ba moguna khömi zui susu, tenga ö sabeʼe.
13 Dozi niha samadu susu, lö saboto ba dödönia zindruhu, börö me iraono nasa ia.+
14 Hizaʼi, ö sabeʼe moʼamakhaita ba niha si no aro faʼaboto ba dödö, si no toʼölö mangogunaʼö fangera-ngerania irege tefomaha ba wamaehusi satulö ba si lö atulö.
Nisura ba gahe zura
^ Mazui ”si no elungu”.