Ba Mbanua Niha Keriso ba Galatia 6:1-18
6 He yaʼami ira talifusö, na so zanörö lala si sala ba lö saboto ba dödönia nifaluania, yaʼami saro famati mifuli mihaogö wolohe yaʼia ba lala satulö.+ Hizaʼi, miʼangelama faböi tedönisi ami+ ba wamalua sala.+
2 Faoma miʼonoro noro dödö nawömi zamösana.+ Na mifalua daʼö, no miʼoʼö goroisa Keriso.+
3 Na so zangumaʼö tödönia abölö moguna ia hewaʼae lö itörö,+ no ilimo ia samösa.
4 Yamufareso nifaluania zamösana,+ ba omuso dödönia ba nifaluania andrö, tenga börö me ifaedo-faedogö ia ba niha böʼö.+
5 Iluʼi-luʼi sa noronia* zamösana.+
6 Baero daʼö, niha nifahaʼö ba daromali Lowalangi, yaʼibeʼe zi sökhi ba niha samahaʼö yaʼia.+
7 Böi elungu ami. Lö ibeʼe niʼoʼaya ia Lowalangi. Hadia nitaru niha sa, daʼö göi nibasinia dania.+
8 Niha sanaru ba nösi, ba itema dania waʼatekiko ba nösinia, hizaʼi sanaru ba geheha ba moroi ba geheha ibasi dania waʼauri si lö aetu andrö.+
9 Andrö, böi atage ita wamalua si sökhi. Na lö atage* ita, tatema mbua dania ba ginötönia.+
10 Börö daʼö, fatua so ginötö, datafalua zi sökhi ba niha fefu, ba si oföna khö ndra talifusöda si sara lala wamati.
11 Yaʼo samösa zanura daʼa. Mifaigi atö hawaʼegebua hurufonia.
12 Ohitö dödö zamaso yaʼami ba wosuna yaʼia daʼö enaʼö lasuno ira niha ba lö tefakao ira börö döla geu famakao* andrö khö Keriso.
13 Sindruhunia, niha nisuna andrö lö nifaluara Oroisa Moze.+ Wa omasi ira lasuna ami, enaʼö lasuno ira niha börö me no faduhu dödömi ba niwaʼöra.
14 Lö usuno ndraʼo baero döla geu famakao* andrö khö Zoʼaya yaʼita Yesu Keriso.+ Moloʼö yaʼo, no mate gulidanö andre ba döla geu daʼö, ba moloʼö ulidanö andre, no mate ndraʼo ba döla geu andrö.
15 Lö eluaha na lasuna mazui löʼö.+ Sabölö moguna yaʼia daʼö tobali niwöwöi si bohou.+
16 Yafalukha waʼohahau dödö ba faʼahakhö dödö dozi soloʼö goi-goi andre ba waʼaurira, me yaʼira ndraono Gizaraʼeli khö Lowalangi.+
17 Iʼotarai iadaʼa, böi so zamusi tödögu, börö me so laheto ba mbotogu andre sangoromaʼö wa sawuyu Yesu ndraʼo.+
18 Yaʼami ira talifusö, yafao khömi waʼasökhi dödö sebua* moroi khö Zoʼaya yaʼita Yesu Keriso ba waʼowölö-ölö niforomaʼömi. Yaduhu.
Nisura ba gahe zura
^ Mazui ”noro dödönia”.
^ Mazui ”lö awuwu”.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
