Ba Mbanua Niha Keriso ba Roma 5:1-21
5 Iadaʼa, no atulö ita börö wamati.+ Andrö dataʼaroʼö waʼatulöda khö Lowalangi ba khö Keriso Yesu Soʼaya yaʼita.+
2 Börö me mamati ita khö Keriso, andrö wa tebokai lala ba wanema faʼasökhi dödö sebua* si no tarasoi iadaʼa.+ Dataʼomusoiʼö dödöda* börö dötönafö ba wanema lakhömi Lowalangi.
3 Baero daʼö, dataʼomusoiʼö dödöda* na göna ita famakao,+ börö me famakao andrö zangaʼasogö faʼanau gölö.+
4 Aefa daʼö, na anau gölöda omuso dödö Lowalangi,+ ba na omuso dödö Lowalangi iʼasogö khöda wanötöna.+
5 Lö afatö dödöda ba wanötöna andrö,+ börö me no iʼamualagö ba dödöda waʼomasi Lowalangi moroi ba gehehania si no ibeʼe khöda.+
6 Sindruhunia, me ba mboto horö* so ita nasa,+ no mate Keriso salahi niha sebua horö ba ginötö si no ihonogöi Lowalangi.
7 Te so zi barani mate salahi niha si sökhi, hizaʼi ha fawaraö na so zomasi mate salahi niha satulö.
8 Tobali, iforomaʼö waʼomasinia khöda Lowalangi yaʼia me mate Keriso salahida, me samazökhi horö ita nasa.+
9 Andrö, me no atulö ita iwaʼö Lowalangi börö ndro Keriso,+ faduhu dödöda wa börö ia teʼefaʼö ita moroi ba wönu Lowalangi.+
10 Me tobali ita udu Lowalangi nasa, teʼatulöʼö ita khönia börö waʼamate Nononia.+ Iadaʼa, me no teʼatulöʼö ita khö Lowalangi, faduhu dödöda wa teʼorifi ita börö waʼauri Nononia si no itehegö.
11 Baero daʼö, omuso dödöda ba khö Lowalangi börö Zoʼaya yaʼita Yesu Keriso. Börö ia wa tola teʼatulöʼö ita khö Lowalangi.+
12 Hulö simane böröta horö andrö, ha samösa niha zamobörö ba faʼamate andrö börö horö,+ andrö wa ikhamö fefu niha faʼamate börö me no dozi samazökhi horö ira.+
13 No so horö ba gulidanö fatua lö hadöi Oroisa Moze nasa, hizaʼi samösa lö nifobahulu samalua horö na lö hadöi oroisa.+
14 Hewaʼae simanö, mamatörö waʼamate tobali razo iʼotarai ba götö Gadamo irugi Moze, ikhamö niha si lö mamalua horö simane fanawö huku nifalua Gadamo. Fakhili-khili Gadamo ba niha si tohare dania.+
15 Faböʼö mbuala Lowalangi moroi ba golalöwa andrö. Na mate niha sato börö zala zi samösa niha, faduhu dödöda wa moguna ba niha sato waʼasökhi dödö sebua* moroi khö Lowalangi hegöi buala nibeʼenia, niʼamualagö börö waʼasökhi dödönia sebua* moroi ba zi samösa niha,+ yaʼia daʼö Yesu Keriso!+
16 Faböʼö göi howu-howu daʼö moroi ba lua-lua horö nifalua zi samösa niha andrö.+ Ha samösa zamalua horö ba dozi oi fasala,+ hizaʼi teʼatulöʼö niha sato börö mbuala andrö si no mubeʼe ba waʼoya golalöwa.+
17 Na mamatörö waʼamate tobali razo börö zi samösa niha andrö,+ faduhu dödöda wa auri niha sato ba mamatörö ira tobali razo+ börö zi samösa niha göi, yaʼia daʼö Yesu Keriso.+ Fahöna waʼasökhi dödö sebua* nitemara hegöi howu-howu si möi fangatulöʼöra.+
18 Simane olalöwa zi samösa niha möi börö wa fasala fefu soi niha,+ simanö göi gamuata satulö möi börö wangatulö fefu soi+ irege lasöndra waʼauri si lö aetu.+
19 Hulö simane ba walömoloʼö niha si ha samösa andrö no möi börö wa dozi niha mamalua horö,+ ba börö woloʼö zi samösa andrö no möi börö wangatulö niha sato khö Lowalangi.+
20 Wa tebeʼe Goroisa Moze enaʼö oroma wa oya golalöwa.+ Hizaʼi, börö me monönö horö, itugu monönö göi waʼasökhi dödö sebua* moroi khö Lowalangi.
21 Hadia gohitö dödönia? Simane horö ba faʼamate no mamatörö tobali razo ia khöda,+ simanö göi waʼasökhi dödö sebua* moroi khö Lowalangi, mamatörö ia khöda tobali razo irege lafotöi ita niha satulö ba tasöndra waʼauri si lö aetu ba khö Yesu Keriso Soʼaya yaʼita.+
Nisura ba gahe zura
^ Faigi Geluaha Ngawua Wehede.
^ Mazui te ”Omuso dödöda”.
^ Mazui te ”omuso dödöda”.
^ Sin.: ”me lö faʼabölöda”.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
