Sura Yakobo 2:1-26
2 Yaʼami ira talifusögu, hadia mamati ami khö Zoʼaya yaʼita Yesu Keriso solakhömi, ba ebua zambuana göi dödömi?+
2 Na so zi möi ba gangowuloami samake laeduru anaʼa ba nukha sebua böli, ba tohare göi niha si numana samake nukha si taʼunö,
3 hadia abölö öfosumange niha samake nukha sebua böli ba ömane, ”Dadao ba daʼa, ba nahia si sökhi,” aefa daʼö ömane ba niha si numana, ”Ozizio manö ba daʼa” mazui, ”Dadao tou ba zalo”?+
4 Na simane daʼö, no ebua zambuana dödömi+ ba miʼetuʼö huku si lö sökhi.+
5 Yaʼami ira talifusö niʼomasiʼögu, mifondrondrongo. Hadia tenga daʼö nifili Lowalangi niha si numana moloʼö famaigi niha gulidanö, enaʼö kayo ira ba wamati+ ba latema gondröita Wamatörö andrö nifabuʼunia ba niha sangomasiʼö yaʼia?+
6 Hizaʼi, lö ba dödömi niha si numana ba miʼailasi ira. Hadia tenga niha si kayo zamakao+ ba solohe yaʼami föna zangetuʼö huku?
7 Hadia tenga yaʼira zangoʼaya töi si sökhi si no tebeʼe khömi?
8 No mifalua zatulö na miʼoʼö huku razo simane niwaʼö ba zura, ”Omasiʼö nawöu simane faʼomasiu ndraʼugö.”+
9 Hizaʼi, na ebua zambuana dödömi,+ no mifalua horö ba fasala ami moloʼö huku andrö.+
10 Na so zamalua fefu ösi Goroisa Moze ba na isawö sambua, no isawö fefu.+
11 Imane Lowalangi, ”Böi ohorö”,+ imane göi, ”Böi bunu niha.”+ Tobali, na mibunu niha hewaʼae lö mohorö ami, no misawö goroisa.
12 Böi miböhöli fahuhuo ba miʼoʼö nifakhoi ba huku andrö, börö me tehuku ami moloʼö huku ba niha si no teʼefaʼö.+
13 Niha si lö mangoromaʼö faʼahakhö dödö, lahuku göi ia si lö faʼahakhö dödö.+ Abölö tohude waʼahakhö dödö moroi ba wanguhuku.
14 Yaʼami ira talifusögu, na so zangumaʼö mamati ia, hizaʼi lö hadöi nifaluania, hadia gunania?+ Tebai iʼorifi ia famatinia andrö lö?+
15 Na so dalifusöda niha Keriso si lö nukha ba lö balazonia sero maʼökhö,
16 ba mimane khönia, ”Ofanö, yaʼohahau dödöu, yaʼösöndra nukhau hegöi balazou sero maʼökhö,” hadia gunania na lö mibeʼe zoguna khöra?+
17 Simane daʼö wamati, na lö bua-bua, ba mate.+
18 Te so zangumaʼö, ”Khömö so wamati ba khögu so mbua-bua. Oromaʼö khögu wamatimö si lö bua-bua ba uʼoromaʼö khöu göi wamatigu ba mbua-buagu.”
19 Hadia faduhu dödöu ha samösa Lowalangi? Sökhi daʼö. Faduhu göi dödö malaʼika si lö sökhi khönia ba ataʼu ira si fao fanizi-nizi.+
20 Hizaʼi, yaʼugö niha si bodo, hadia omasiʼö öʼila wa famati si lö bua-bua andrö zaya-zaya gölö?
21 Hadia tenga awena lafotöi niha satulö namada Aberahamo börö mbua-buania, me no ibeʼe nononia Izaʼaki tobali sumange ba naha wanunu sumange?+
22 Ba daʼö miʼila, famatinia iʼoʼö bua-buania ba moʼahonoa wamatinia börö mbua-buania.+
23 Börö daʼö, itörö niwaʼö ayati daʼa: ”Mamati Gaberahamo khö Yehowa,* andrö wa lafotöi ia niha satulö.”+ Lakaoni göi khönia si fahuwu khö Yehowa.*+
24 Ba daʼa miʼila wa atulö zi samösa niha börö mbua-bua, tenga ha börö wamati.
25 Simanö göi Rakhaba ira alawe sohorö-horö andrö, hadia tenga börö mbua-buania wa lafotöi ia satulö, me no itema zamauze ba nomonia si fao faʼasökhi dödö, aefa daʼö itolo ira ba wanörö lala böʼö ba woloi?+
26 Hulö mboto si lö noso,* mate.+ Simanö göi wamati andrö na lö bua-bua, mate.+
