Nisura Yohane 13:1-38
13 Fatua lö alua Gowasa Fasa, aboto ba dödö Yesu wa no irugi inötönia+ wondröi ulidanö ba mangawuli ia khö Nama.+ Börö me iʼomasiʼö zoloʼö yaʼia ba gulidanö, andrö lö tebulö iʼomasiʼö ira irugi gamozua.+
2 Me manga ira bongi daʼö, no möi Gafökha ba dödö Yuda Kariota+ ono Zimoni, ba wemanga böli Yesu.+
3 Börö me aboto ba dödö Yesu wa no ibeʼe fefu hadia ia ba dangania Ama, mendrua manö me khö Lowalangi iʼotarai ba mangawuli zui ia khö Lowalangi,+
4 mosindro ia me manga ira nasa bongi daʼö ba iheta mbarunia tanö baero. Aefa daʼö, ihalö andru ifaliʼö ba löwi-löwinia.+
5 Ifoʼösi karawa faoma idanö ba isasai gahe ndra nifahaʼönia, aefa daʼö iʼosi faoma andru si no ifaliʼö ba löwi-löwinia.
6 Me ofeta ia khö Zimoni Fetero, manofu Wetero imane, ”Hadia ösasai gahegu Soʼaya?”
7 Imane Yesu, ”Lö aboto ba dödöu geluaha nifaluagu iadaʼa, dania awena aboto ba dödöu.”
8 Imane Fetero, ”He Soʼaya, tenga sinangea ösasai gahegu.” Imane Yesu, ”Na lö usasai gahemö,+ ba tebai faoʼö khögu.”
9 Imane Simoni Fetero, ”He Soʼaya, böi ha ahegu ösasai, sasai danga awö högögu.”
10 Imane Yesu, ”Lö saʼae musasai mboto niha si no mondri, ha ahenia zinangea musasai, börö me lö si taʼunö mbotonia. No muhaogö ami, hizaʼi lö fefu moroi ba gotaluami ahori sökhi.”
11 Iʼila haniha zi manga mbölinia,+ andrö wa iwaʼö, ”Lö fefu moroi ba gotaluami ahori sökhi.”
12 Me no aefa isasai gahera, ifuli ifake mbarunia sebua, modadao ia föna meza imane, ”Hadia aboto ba dödömi hana wa ufalua daʼa khömi?
13 Mikaoni ndraʼo ’Samahaʼö’ ba ’Soʼaya’, atulö niwaʼömi andrö.+
14 Na yaʼo manö usasai gahemi+ hewaʼae mikaoni khögu Soʼaya ba Samahaʼö, lö tola löʼö göi faoma misasai gahe nawömi.+
15 No ubeʼe khömi duma-duma enaʼö mifalua göi zi no ufalua khömi.+
16 Sindruhu-ndruhu niwaʼögu khömi, lö abölö ebua zawuyu moroi khö zokhö yaʼia, ba lö abölö ebua nifatenge moroi khö zamatenge yaʼia.
17 No aboto ba dödömi daʼa fefu, ba abölö ohahau dödömi na mifalua.+
18 Tenga khömi fefu manandrösa wehedegu andre. Uʼila haniha nifiligu. Hizaʼi ba zimane daʼa, itörö zi so ba zura andre:+ ’Niha si falulu khögu wemanga roti, tobali si faʼudu khögu.’*+
19 Iadaʼa ufatunö khömi fatua lö alua, enaʼö na alua dania faduhu dödömi wa khögu manandrösa ayati daʼö.+
20 Sindruhu-ndruhu niwaʼögu, haniha zanemaʼö niha nifatengegu, no itemaʼö göi ndraʼo.+ Ba haniha zanemaʼö yaʼo, no itemaʼö göi zamatenge yaʼo.”+
21 Me no aefa iwaʼö daʼö Yesu, abu sibai dödönia, ba lö ibiniʼö khöra wangombakha, ”Sindruhu niwaʼögu, so dania samösa moroi ba gotaluami zi manga mböligu.”+
22 Faoma fatöngö ndra nifahaʼö börö me lö laʼila haʼökhö manandrösa wehedenia.+
23 Samösa nifahaʼö niʼomasiʼö Yesu,+ no fasinga ira wedadao.
24 Ifahökö ia Fetero khö nawönia andrö imane, ”Fatunö khöma haʼökhö manandrösa wehede daʼö.”
25 Börö daʼö, ifahatö ia nifahaʼö andrö khö Yesu ba wanofu, ”He Soʼaya, haniha yaʼö?”+
26 Imane Yesu, ”Niha nibeʼegu roti si no uʼungugö, daʼö ia.”+ Aefa daʼö, iʼungugö roti ba ibeʼe khö Yuda ono Zimoni Kariota.
27 Me no aefa ihalö roti Yuda, möi Zatana ba dödönia.+ Imane Yesu khö Yuda, ”Aliokö falua hadia zi so ba dödömö andrö.”
28 Hizaʼi, samösa lö sangila ba gotaluara hadia geluaha wehede Yesu khönia.
29 So zangumaʼö, börö me Yuda zololohe naha gefe,+ ifarou ia Yesu ba wowöli soguna khöra na alua gowasa mazui ba wameʼe fanolo ba niha si numana.
30 Me no ihalö roti andrö, iʼanemaiʼö mofanö Yuda. No bongi saʼae me luo daʼö.+
31 Me no mofanö ia imane Yesu, ”Tefolakhömi Nono niha iadaʼa,+ ba tefolakhömi Lowalangi börö ia.
32 Lowalangi zamolakhömi yaʼia,+ ba ifolakhömi ba zi lö ara tö.
33 He iraonogu, lö ara tö wefaoda. Miʼalui dania ndraʼo, hizaʼi uwaʼö khömi iadaʼa simane niwaʼögu ba niha Yahudi, ’Tebai möi ami ba zi so yaʼo.’+
34 Ubeʼe khömi goroisa si bohou: Faoma miʼomasiʼö nawömi. Simane fangomasiʼögu yaʼami,+ yasimanö göi wangomasiʼömi awömi.+
35 Ba daʼö aboto ba dödö niha fefu wa no nifahaʼögu ami na faoma miʼomasiʼö nawömi.”+
36 Manofu khönia Zimoni Fetero, ”He Soʼaya, hezo möiʼö?” Imane Yesu, ”Tebai faoʼö khögu iadaʼa ba zi möi yaʼo, hizaʼi öʼoʼö sa dania ndraʼo.”+
37 Imane Fetero, ”He Soʼaya, hana wa tebai fao ndraʼo khöu iadaʼa? Utehegö mate ndraʼo* salahimö.”+
38 Imane Yesu, ”Hadia sindruhu ötehegö mate ndraʼugö salahigu? Yafaduhu dödöu ba wehedegu, fatua lö miwo zilatao, ba no tölu kali öʼosilöʼögö ndraʼo.”+
