Nisura Yohane 14:1-31
14 ”Böi fawuka dödömi.+ Miʼamati khö Lowalangi+ ba miʼamati göi khögu.
2 Oya nahia ba nomo Namagu. Na löʼö, tatu no ufatunö khömi. Mofanö ndraʼo ba wangehaogö naha khömi.+
3 Na no mofanö ndraʼo ba wangehaogö naha khömi, ufulido ba uʼohe ami ba nomogu, irege ba zi so yaʼo ba daʼö göi so ami.+
4 Mendrua manö me miʼila lala hezo so möi ndraʼo.”
5 Imane Toma,+ ”He Soʼaya, lö maʼila hezo möi ndraʼugö. Hewisa wa maʼila lala andrö?”
6 Imane khönia Yesu, ”Yaʼodo lala,+ yaʼodo waʼaduhu,+ ba yaʼodo waʼauri.+ Lö sondrugi Ama na lö itörö ndraʼo.+
7 Na no aboto ba dödömi ndraʼo ba no aboto göi ba dödömi Namagu. Iʼotarai iadaʼa, no aboto ba dödömi ia, ba no miʼila ia.”+
8 Imane Filifo, ”He Soʼaya, foromaʼö khöma Nama, ba no tobönö daʼö.”
9 Imane khönia Yesu, ”He Filifo, no ara fao ndraʼo khömi, hadia lö saboto ba dödöu nasa haniha ndraʼodo? Dozi si no mangila yaʼo ba no göi iʼila Nama.+ Hana wa öwaʼö, ’Foromaʼö khöma Nama’?
10 Hadia lö faduhu dödöu wa ba dödö Nama so ndraʼo awö wa ba dödögu so Nama?+ Fefu zi no ufatunö khömi tenga moroi ba gera-eragu samösa.+ Hizaʼi, iʼogunaʼö ndraʼo Ama ba wamalua halöwönia me no ha sambua gohitö dödöma.
11 Yafaduhu dödömi me uwaʼö, ba dödögu so Nama, ba dödö Nama so ndraʼo. Na löʼö, yafaduhu dödömi ba halöwö si no ufalua.+
12 Sindruhu-ndruhu niwaʼögu, dozi samati khögu ba ifalua halöwö nifaluagu, ba ifalua halöwö sabölö ebua nasa+ börö me möi ndraʼo khö Nama.+
13 Fefu hadia niʼandrömi ba döigu hasambalö ufalua, enaʼö tefolakhömi Nama börö Nono.+
14 Gofu hadia niʼandrömi ba döigu, hasambalö ufalua.
15 ”Na miʼomasiʼö ndraʼo, miʼoʼö goroisagu.+
16 Uʼandrö khö Nama ba ibeʼe khömi zanolo* tanö böʼö si lö faröi khömi sagötö faʼara,+
17 yaʼia daʼö eheha niʼamoniʼö sangombakha sindruhu.+ Lö tesöndra ba gulidanö geheha daʼa börö me lö iʼila ia ulidanö mazui aboto ba dödönia.+ Hizaʼi, aboto ba dödömi, börö me so khömi geheha andrö ba lö tebulö ia khömi.
18 Lö uröi ami,* hasambalö ufulido khömi.+
19 Ba zi lö ara tö, lö iʼila ndraʼo ulidanö, hizaʼi yaʼami dania zangila yaʼo,+ börö me sauri ndraʼo ba sauri göi dania ami.
20 Na luo daʼö, aboto ba dödömi wa ba dödö Nama so ndraʼo awö wa ba dödögu so ami, simanö göi ba dödömi so ndraʼo.+
21 Dozi sanemaʼö oroisagu ba samalua yaʼia, daʼö niha sangomasiʼö yaʼo. Niha sangomasiʼö yaʼo, iʼomasiʼö ia Amagu, ba uʼomasiʼö göi ia ba uforomaʼö ndraʼo khönia.”
22 Imane khönia Yuda+ nifotöi Tadaiʼo, ”He Soʼaya, hadia zalua wa öforomaʼö ndraʼugö khöma, hana wa tenga ba gulidanö?”
23 Imane Yesu, ”Niha sangomasiʼö yaʼo, iʼoʼö wehedegu.+ Iʼomasiʼö ia Amagu ba möi ndraʼaga khönia ba toröiga khönia.+
24 Niha si lö mangomasiʼö yaʼo, lö iʼoʼö wehedegu. Fehede nirongomi tenga fehedegu hizaʼi fehede Nama samatenge yaʼo.+
25 ”No uwaʼö khömi daʼa sagötö fao ndraʼo khömi.
26 Sanolo andrö yaʼia geheha niʼamoniʼö nifatenge Nama ba döigu, daʼö zamahaʼö yaʼami ba samasugi ba dödömi ngawalö zi no ufatunö khömi.+
27 Uröi khömi waʼohahau dödö.+ Ubeʼe khömi waʼohahau dödögu. Faʼohahau dödö nibeʼegu khömi faböʼö moroi ba nibeʼe niha gulidanö andre. Böi mibusi tödö mazui ataʼu ami.
28 No mirongo me uwaʼö, ’Mofanö ndraʼo ba ufulido khömi.’ Na miʼomasiʼö ndraʼo, ba omuso dödömi börö me khö Nama möido. Abölö ebua Nama moroi khögu.+
29 Iadaʼa no ufatunö khömi fatua lö alua daʼö, enaʼö faduhu dödömi na no alua dania.+
30 Lö saʼae oya huhuogu khömi, börö me tohare zamatörö ulidanö+ andre hewaʼae lö faʼabölö khönia ba wamatörö yaʼo.+
31 Hizaʼi enaʼö aboto ba dödö niha gulidanö wa uʼomasiʼö Nama, ufalua niwaʼö Nama khögu.+ Aine, mofanö ita moroi ba daʼa.
