Nisura Yohane 3:1-36
3 So samösa Warizaiʼo sotöi Nikodemo+ sondröniaʼö niha Yahudi.
2 Möi ia ifalukhaisi Yesu ba zi bongi+ imane, ”He Rabi,+ maʼila wa nifatenge Lowalangi ndraʼugö si tobali samahaʼö, börö me lö sangila mamalua tandra sahöli-höli dödö+ simane yaʼugö baero na fao khönia Lowalangi.”+
3 Itema linia Yesu, ”Sindruhu niwaʼögu khöu, na lö ifuli tumbu zi samösa niha,*+ tebai iʼila Wamatörö Lowalangi.”+
4 Imane Nikodemo, ”Hewisa wa ifuli tumbu niha satua? Hewisa wa tola ifuli ia ba dalu ninania ba tumbu mangawuli?”
5 Itema linia Yesu, ”Sindruhu niwaʼögu, na lö tumbu zi samösa niha moroi ba nidanö+ hegöi moroi ba geheha,+ tebai tefaʼamöi ia ba Wamatörö Lowalangi.
6 Si tumbu moroi ba niha yaʼia daʼö niha, ba si tumbu moroi ba geheha niʼamoniʼö yaʼia daʼö eheha.
7 Böi ahöli-höli dödömi na umane hasambalö ifuli zui tumbu ami.
8 Ilau ia angi gofu hezo isawa, örongo rurunia ba lö öʼila hezo iʼotarai ba hezo numalö ia. Simanö göi dozi niha niʼadonogö moroi ba geheha niʼamoniʼö.”+
9 Manofu Nikodemo, ”Hewisa wa tola alua daʼö?”
10 Imane Yesu, ”Samahaʼö iraono Gizaraʼeli ndraʼugö. Hana wa lö öʼila?
11 Sindruhu niwaʼögu, mawaʼö hadia zaboto ba dödöma, ba mafaduhuʼö hadia niʼilama, hizaʼi lö mitema wamaduhuʼöma.
12 Na lö faduhu dödöu ba ginötö ututunö ngawalö zanandrösa ba gulidanö, hewisa wa faduhu dödöu na ututunö sanandrösa ba zorugo?
13 Lö niha si no irai möi ba zorugo,+ hizaʼi Ono niha andrö iʼotarai ba zorugo.+
14 Simane Moze me ifazawa gulö ba danö si mate,+ simanö göi Nono niha lö tola löʼö tefazawa ia,+
15 enaʼö fefu niha si faduhu tödö khönia tola lasöndra waʼauri si lö aetu.+
16 ”Simanö sa waʼomasi Lowalangi nösi gulidanö, itehegö Nononia si ha sambua,+ enaʼö lö tekiko dozi samati khönia, ba lasöndra waʼauri si lö aetu.+
17 Wa ifatenge Lowalangi Nononia ba gulidanö tenga enaʼö ihuku gulidanö, hizaʼi enaʼö teʼorifi niha gulidanö börö ia.+
18 Gofu haniha zamati khönia, lö tehuku.+ Haniha manö zi lö mamati ba no tehuku, börö me lö mamati ia ba döi Nono Lowalangi si ha sambua.+
19 Daʼa dane-dane wa lahuku ira: no möi ba gulidanö haga andrö,+ hizaʼi abölö laʼomasiʼö zogömi-gömi moroi ba haga, börö me si lö sökhi nifaluara.
20 Haniha manö zamalua si lö sökhi, fatuwu ia haga, ba lö möi ia ba haga enaʼö lö oroma* gamuatania.
21 Ba gofu haniha zamalua satulö, möi ia ba haga+ andrö enaʼö oroma gamuatania si tefaudu ba zomasi Lowalangi.”
22 Aefa daʼö, mofanö Yesu fao ira ndra nifahaʼönia ba mbanua side-ide ba Yudea. Toröi ia ba daʼö khöra mato hauga hari ba ibayagö idanö niha.+
23 Ibayagö idanö niha Yohane ba Gaino sahatö ba Zalima, börö me oya nidanö ba daʼö.+ Ato niha si tohare ba labayagö ira idanö.+
24 Me luo daʼö lö nasa nibeʼe ba gurunga Yohane.+
25 Samuza inötö, fabuʼa-buʼa ndra nifahaʼö Yohane khö ndra niha Yahudi sanandrösa ba gowasa fangehao mboto.
26 Möi ira khö Yohane ba lamane, ”He Rabi, faigi atö niha si fao khömö yefo Nidanö Yoridano nifaduhuʼömö,+ ibayagö idanö niha iadaʼa, ba fefu niha laʼondrasi ia.”
27 Itema lira Yohane, ”Lö hadöi si tola iʼokhögö niha na lö tebeʼe khönia moroi ba zorugo.
28 Yaʼami samösa zamaduhuʼö wa no uwaʼö, ’Tenga Keriso ndraʼo,+ hizaʼi yaʼo nifatenge fatua lö tohare ia.’+
29 Sokhö niʼowalu yaʼia daʼö marafule.+ Omuso sibai dödö zi fahuwu khö marafule me mozizio ira ba zingania ba larongo wehedenia. Simanö göi ndraʼodo, afönu waʼomuso dödögu.
30 Itugu oya nifaluania, ba itugu alö nifaluagu.”
31 Abölö alawa zi tohare moroi si yawa+ moroi ba danö böʼö fefu, hizaʼi si otarai ba gulidanö moroi ba gulidanö, ifatunö ngawalö zanandrösa ba gulidanö. Abölö alawa zi tohare moroi ba zorugo ba danö böʼö fefu.+
32 Ifaduhuʼö hadia zi no iʼila ba si no irongo,+ hizaʼi samösa lö sanemaʼö nifaduhuʼönia.+
33 Haniha zanemaʼö famaduhuʼönia andrö, no ifaduhuʼö* wa atulö Lowalangi andrö.+
34 Nifatenge Lowalangi ifaʼema wehede Lowalangi,+ börö me fahöna* wameʼenia eheha niʼamoniʼö.
35 Iʼomasiʼö Nononia+ Ama ba no itouʼö fefu ba dangania.+
36 Niha samati khö Nono isöndra waʼauri si lö aetu+ ba si lö mamati khö Nono, lö isöndra waʼauri,+ irasoi wönu Lowalangi sagötö faʼara.+
Nisura ba gahe zura
^ Mazui te ”si tumbu moroi si yawa”.
^ Mazui ”lö laʼoʼaya”.
^ Sin.: ”ifotandro”.
^ Mazui ”me tenga nisuʼa”.
