Oya wamoʼeluaha Zura Niʼamoniʼö niʼogunaʼö ndra Samaduhuʼö Yehowa ba wamahaʼö yaʼira ba Zura Niʼamoniʼö. Hewaʼae simanö, na no tehenaigö Kitab Suci Terjemahan Dunia Baru ba li niʼogunaʼöma, daʼö zabölö omasi ndraʼaga börö me no tesura döi Lowalangi, tefaudu nösinia, ba alio aboto ba dödö zombaso.

•   No musura döi Lowalangi. Oya zamazökhi Sura Niʼamoniʼö si lö mamosumange Samaʼanö Mbua Wangera-ngera Sura Niʼamoniʼö. Duma-dumania, so sambua wamoʼeluaha Zura Niʼamoniʼö sanura 70 döi niha si fao ba wamazökhi yaʼia. Hizaʼi, lö lasura döi Samaʼanö Mbua Wangera-ngera mbuku andrö sotöi Lowalangi Yehowa!

   Hizaʼi, ba Zura Niʼamoniʼö Terjemahan Dunia Baru no tesura ngahönö döi Lowalangi moloʼö naskah siföföna. Ba, lö lasura töi niha solului ba wamoʼeluaha yaʼia.

•   Tefaudu Nösinia. Lö fefu nösi wamoʼeluaha Sura Niʼamoniʼö si tefaudu moloʼö naskah siföföna. Duma-dumania, so zamoʼeluaha Mataiʼo 23:15 simane daʼa, ”Alai ami, sangila amakhoita ba farizaiʼo, samini tödö! Me no sanöröi asi, awö danö, ami, ba wamaliʼö soloʼö huku khömi samösa niha, ba na no iʼoʼö, ba mibaliʼö ono narako, mendrua manö na sa moroi khömi.” Sindruhunia, ngawua wehede si no tesura ba teks siföföna yaʼia daʼö ”Gehena [eluahania ’Lembah Hinom’]”, tenga ”narako”. Nahia Lembah Hinom andre ahatö ba Yeruzalema. Muʼogunaʼö ia ba wanunu sasao. Iʼogunaʼö ngawua wehede Gehena andre Yesu ba woʼamaedolagö fanguhuku moroi khö Lowalangi. Te andrö wa lafoʼeluaha ngawua wehede ”narako” ira samoʼeluaha, börö me faduhu dödöra wa tehuku niha si lö sökhi ba galitö narako sagötö faʼara. Sindruhunia, tenga daʼö niwaʼö Zura Niʼamoniʼö. Imane Zura Niʼamoniʼö Terjemahan Dunia Baru, ”Alai ami, sangila amakhoita, ba farizaiʼo, samini tödö! Me no sanöröi asi, awö danö, ami, ba wamaliʼö soloʼö huku khömi samösa niha, ba na no iʼoʼö, ba mibaliʼö ono Ndraso Hinomo, mendrua manö na sa moroi khömi.”

•   Alio aboto ba dödöda. Nifotöi famoʼeluaha si sökhi, tenga ha asala tefaudu nösinia, hizaʼi moguna göi alio aboto ba dödö niha sombaso. Datafaigi sambua duma-dumania ba Mataiʼo 5:3, so wehede niʼogunaʼö Yesu yaʼia daʼö, ”Yaʼahowu zi numana tödö.” Tola manö ambö aboto ba dödö niha geluaha ngawua wehede andrö. Börö da’ö, ba wamoʼeluaha Buku Niʼamoniʼö Yunani Niha Keriso lafoʼeluaha nösi ayati daʼö tobali ”soʼameʼegö tödö soguna ba wamati”, irege alio aboto ba dödö niha geluahania.

 Ba Zura Niʼamoniʼö Terjemahan Dunia Baru no tesura döi Lowalangi, tefaudu nösinia, ba alio aboto ba dödöda. Baero daʼö, so zadöni dödöda nasa yaʼia daʼö, lö laʼandrö mböli na mubeʼe ba niha. Hadia mbuania? So zuta niha si tola mombaso Sura Niʼamoniʼö ba li niʼilara, farahu ba daʼö niha si tebai mowöli Sura Niʼamoniʼö.