Puhala ne Moua e Tautolu e Tohi Tapu

He hao mo e hako agaia e Tohi Tapu ti hoko mai ki a tautolu mogonei, ko e mena ofoofogia. Ne oti e tohi e Tohi Tapu he molea e 1,900 tau kua mole. Fakamau hifo ai he tau koloa ne leva ni ti popo​​—talaga mai he tau kā papyrus mo e tau kili manu​—​ti tohi fakamua foki he tau vagahau ne gahoa ni e tagata ne iloa he vahā nei. Eketaha lahi foki e tau pule he tau motu ti hoko ke he tau takitaki lotu ke moumou katoatoa e Tohi Tapu.

MAEKE fēfē e tohi nei ke hao mai ti eke mo tohi ne mua e talahaua ke he tau tagata? Manamanatu ke he ua e puhala.

Loga e Lagaki Ati Hao Ai

Ko e tau tagata ne leveki e tau fakamauaga fakamua he Tohi Tapu, ko e tau Isaraela ne mataala lahi ke puipui e tau vakai fakamua ia ti loga e lagaki ne taute. Ne poaki ke he tau patuiki ha Isaraela ke tohi hifo maana e “tohi he fakatufono nai mai he tohi na ha i mua he tau ekepoa ko e tau tagata Levi.”​​—Teutaronome 17:18.

Tokologa e tau Isaraela ne fiafia lahi ke totou e tau Tohiaga Tapu he mailoga e lautolu ko e Kupu he Atua. Ti eketaha e tau tohikupu pulotu ke lagaki fakamitaki ai. Taha he tau tohikupu ia ko Esera ne ofania lahi e Atua ne hagaao ki ai “ko e tohikupu iloilo foki a ia ke he fakatufono a Mose, ne foaki mai ai e Iehova ko e Atua a Isaraela.” (Esera 7:6) Ko e tau tagata Masorete ne lagaki e tau Tohiaga Tapu Heperu, po ke “Maveheaga Tuai” he vahāloto he senetenari ke onoaki mo e hogofuluaki V.N., ne hokotia ke totou e tau matatohi ne lagaki ke ua hepe ha mena. Ko e tau puhala lagaki fakamakutu pihia ne lagomatai ke fakamau e hakotika mo e fakahao e Tohi Tapu pete he lali fakalahi e tau fī ke moumou ai.

Ma e fakatai, he 168 F.V.N., ne lali e pule Asuria ko Antiochus IV ke moumou oti e tau lagaki he tau Tohiaga Tapu Heperu ka moua e ia i Palesitaina katoa. Pehē e tagata fakamau tala tuai i Iutaia: “Ko e tau tohi vakai he fakatufono ne moua e lautolu ia ne hēhē ti tugi ai.” Pehē he The Jewish Encyclopedia: “Ne eketaha e tau tagata ne kotofa ke taute e matagahua nei . . . Ko e tagata ne fai Tohi Tapu . . . ne fakahala he tamate ai.” Ka e hao e tau lagaki he tau Tohiaga Tapu ti moua he tau Iutaia i Palesitaina mo e tau tagata ne nonofo he falu motu.

Nakai leva he oti e gahua he tau tohikupu he Tau Tohiaga Tapu Heleni Kerisiano, po ke “Maveheaga Foou,” ne loga lahi e tohi ha lautolu ne omoomoi he agaaga tapu, tau perofetaaga, mo e tau fakamauaga tuai. Tuga anei, tohia e Ioane e Evagelia haana i Efeso po ke tata ki ai. Ka ko e vala he Evagelia ia, vala ne talahau e tau tagata pulotu ne taute he kavi 50 e tau fakamui he oti e tohi e ia, ne moua ai he matakavi mamao ko Aikupito. Kitia mai he mouaaga ia ko e tau Kerisiano he tau motu mamao ne moua e tau lagaki ne nakaila leva ia e omoomoi he agaaga tapu.

Ne loga e lagaki he Kupu he Atua ne tufa ti lafi foki ke he haoaga he loga e senetenari he mole e magahala he Keriso. Ma e fakatai, he kamata e pogipogi ia Fepuari 23 he tau 303 V.N., ne talahau ai ko e Roman Emperor Diocletian ne onoono ke he tau kautau haana ne moumou e tau gutuhala he fale tapu ti tugi e tau Tohiaga Tapu. Manatu a Diocletian to utakehe katoatoa e ia e tau Kerisiano he moumou e tau tohi fakatapu. He aho hake, ne poaki a ia ke he Roman Empire katoa ke tugi oti e tau Tohi Tapu ki mua he toloaga tagata. Ka e fai lagaki ne hao ti liu taute foki. Ti laulahi he ua e Tohi Tapu he vagahau Heleni ne liga talaga he nakai leva e mole e taute fakakelea e Diocletian, ne hao ke hoko mai ke he mogonei. Taha i Rome; mo e taha he British Library i London, i England.

Pete he nakaila fai fakamauaga tuai fakamua atu he Tohi Tapu ne kua moua, ne totou afe e tau lagaki ne tohi lima he Tohi Tapu katoa po ke tau vala ne kua hao ti hoko mai ke he mogonei. Ne tuai lahi mahaki falu. Kua hiki kia e fekau ne fakamau hifo he tau tohiaga fakamua ha kua lagaloga e lagaki? Pehē e pulotu ko W. H. Green hagaao ke he tau Tohiaga Tapu Heleni: “Liga mitaki ke talahau ko e tohi tuai ni anei he tau tohi tuai ne mua atu e hakotika he lagaki.” Hagaao ke he Tau Tohiaga Tapu Heleni Kerisiano, ko e takitaki ne leveki e tau fakamauaga tuai he Tohi Tapu, ko Sir Frederic Kenyon, ne tohia: “Ne tote lahi e vahāloto he magaaho ne taute e tau tohi fakamuaaki mo e laulahi he tau lagaki ne taute ati nakai fai kehekehe ai, ti kua utakehe tuai e tuahā na hakotika nakai e tau Tohiaga Tapu ne moua e tautolu mogonei. Ko e hakotika mo e moolioli he tau tohi he Maveheaga Foou ne kua lata mogoia ke talia katoatoa ai.” Pehē foki a ia: “Ti iloa ai kua moolioli e tohiaga he Tohi Tapu. . . . Nakai maeke ke talahau pihia ke he ha tohi tuai foki he lalolagi.”

Fakaliliuaga he Tohi Tapu

Ko e matapatu ke uaaki ne lagomatai e Tohi Tapu ko e tohi talahaua lahi he tagata, ha kua moua ai ke he loga e vagahau. Ti felauaki mooli e mena nei mo e finagalo he Atua ma e tau tagata he tau motu mo e tau vagahau oti kana ke iloa mo e tapuaki ki a ia “mo e agaga mo e fakamoli.”​​—Ioane 4:23, 24; Mika 4:2.

Ko e fakaliliuaga fakamua he Tau Tohiaga Tapu Heperu ko e lagaki Septuagint faka-Heleni. Ne taute ai ke lata mo e tau Iutaia ne vagahau Heleni ne nakai nonofo i Palesitaina, ne oti e taute he kavi ua e senetenari ato kamata e fekafekauaga ha Iesu he lalolagi. Ko e Tohi Tapu katoa, putoia e Tau Tohiaga Tapu Heleni Kerisiano, ne fakaliliu ke he loga e tau vagahau he gahoa ni e senetenari he mole e tohi ai. Ka e fakamui, ko e tau patuiki mo e tau ekepoa ne lata ke eketaha ke foaki ke he tau tagata e Tohi Tapu, ne nakai taute pihia e lautolu. Ne lali a lautolu ke toka e tau mamoe ha lautolu he pouli fakaagaaga he nakai fakaatā e Kupu he Atua ke fakaliliu ke he tau vagahau loga.

He nakai fetataiaki mo e Lotu mo e Motu, ko e tau tagata loto malolō ne foaki e tau momoui ha lautolu ke fakaliliu e Tohi Tapu ke he tau vagahau ne fakaaoga he tau tagata tokologa. Ma e fakatai, he 1530, ko e tagata Peritania ko William Tyndale, ne fakaako mai i Oxford, ne fakaliliu e Penetatuka, ko e tau tohi lima fakamua he tau Tohiaga Tapu Heperu. Pete e lahi e totokoaga, ko ia e tagata fakamua ne fakaliliu e Tohi Tapu mai he vagahau Heperu ke he vagahau Peritania. Ko Tyndale foki e tagata Peritania fakamua ne fakaaoga e higoa Iehova. Ko e pulotu Spanish ke he Tohi Tapu ko Casiodoro de Reina ne matematekelea tumau e moui he favale e tau tagata totoko he Katolika he fakaliliu e ia e taha Tohi Tapu Spanish fakamua. Ne fenoga atu a ia ki England, Germany, France, Holland, mo Switzerland he lali ke taute ke oti e gahua fakaliliu haana. *

Kua matutaki mogonei ke fakaliliu e Tohi Tapu ke he loga atu foki e vagahau, ti totou miliona e lagaki ne lolomi. He hao e Tohi Tapu ti eke mo tohi talahaua lahi, ne fakakite e mooli he talahauaga he aposetolo ko Peteru ne omoomoi he agaaga tapu: “Kua fifigo e motietie, kua mokulu foki hana fiti; Ka ko e kupu he Atua kua tumau ia tukulagi ni.”​​—1 Peteru 1:24, 25.

[Matahui Tala]

[Puha/​Tau Fakatino]

KO E FAKALILIUAGA FE HAAKU KA TOTOU?

Loga e vagahau ne loga e tau fakaliliuaga he Tohi Tapu. Falu fakaliliuaga ne uka mo e tuai e vagahau ne fakaaoga. Falu fakaliliuaga ne fakakū he foli ke fakamukamuka ka totou ka e nakai hagaaki ke he hako. Falu ne teitei ni ke fakaliliu kupu hokoia.

Ko e fufuta foou he vagahau Peritani he New World Translation of the Holy Scriptures, ne taute fakailoa he Tau Fakamoli a Iehova, ne taute fakahako he komiti mai he tau vagahau fakamua ne tohi ai. Ko e Tohi Tapu nei, ne fakavē ki ai e fakaliliuaga he kavi 60 foki e vagahau. Ko e tau tagata fakaliliu he tau vagahau ia ne eketaha fakalahi ke fakatatai atu ai ke he tau tohiaga he kamataaga. Ko e foliaga he New World Translation ke fakaaoga e tau kupu he fakamauaga fakamua ka e nakai galo e manatu uho. Ne eketaha e tau tagata fakaliliu ke maama he tau tagata ne totou e Tohi Tapu he vahā nei ke tuga ne maama he tau tagata ne totou ai he tau vahā Tohi Tapu.

Falu tagata pulotu ke he tau vagahau ne kumikumi e tau fakaliliuaga foou he Tohi Tapu​​—putoia e New World Translation​—​ke moua ha mena hepe mo e nakai lagotatai. Taha he tau pulotu ia ko Jason David BeDuhn, ko e porofesa lagomatai ke he kumikumiaga he tau lotu he Northern Arizona University i United States. He 2003 ne lolomi e ia e tohi ne 200 e lau he tau kumikumiaga ke he hiva e “Tohi Tapu ne fakaaoga lahi he tau tagata vagahau Peritania.” * Ne kumikumi a ia ke he loga he tau talahauaga he Tohi Tapu ne nakai fetataiaki, ko e tau mena ia ne “nakai lagotatai ti liga tauhele ke he fakaliliuaga.” He tau vala kupu takitaha, ne fakatatai e ia e tau tohiaga Heleni mo e tau fakaliliuaga takitaha faka-Peritania, ti kumi e ia e tau kupu ne nakai lautatai ne lali ke huhui e kakano. Ko e heigoa e onoonoaga haana?

Ne fakamaama e BeDuhn ko e tau tagata laulahi mo e loga e pulotu ke he Tohi Tapu ne fuafua teao e kehekehe he New World Translation (NW) ne lagā mai ha ko e nakai tatai he tau lotu ati lauia e tau tagata fakaliliu. Ka e pehē a ia: “Loga he tau fekehekeheaki kua puna mai ha kua hakotika e fakaliliuaga he NW.” Pete he nakai talia e BeDuhn e falu fakaliliuaga he New World Translation, ne pehē a ia ko e Tohi Tapu nei “kua mua atu e hakotika ka fakatatai ke he falu fakaliliuaga.” Fakahigoa e ia ko e fakaliliuaga “kua ofoofogia e mitaki.”

Ko Dr. Benjamin Kedar, ko e pulotu Heperu i Isaraela ne pihia foki e talahauaga ke he New World Translation. He 1989 ne pehē a ia: “Ko e tohi nei kua eketaha ke fakamaama fakahako e uho manatu. . . . Nakaila moua e au he New World Translation ha manatu ne tohi i loto ke hiki e maamaaga ka totou ai.”

Hūhū ki a koe: ‘Ko e heigoa e foliaga haaku he totou e Tohi Tapu? Manako nakai au ke mukamuka ka totou ka e hagaaki fakatote ke he hakotika. Po ke manako au ke totou e tau manatu ne kua tata lahi ke he tau tohiaga ne omoomoi he agaaga tapu he kamataaga?’ (2 Peteru 1:20, 21) Lata e fakaliliuaga ka fifili e koe ke fakavē ke he foliaga haau.

[Matahui Tala]

[Fakatino]

Ko e “New World Translation of the Holy Scriptures” ne moua ke he loga e vagahau

[Fakatino]

Tau fakamauaga tuai Masorete

[Fakatino]

Ko e vala he Luka 12:7, “ . . . ua matakutaku ai a mutolu; kua mua a mutolu ke he tau manu ikiiki loga.”

[Fakatino Credit Lines]

Foreground page: National Library of Russia, St. Petersburg; second and third: Bibelmuseum, Münster; background: © The Trustees of the Chester Beatty Library, Dublin