Totou miliona ne manako lahi ke momoui he lagi. Talahau e Iesu ko e haana tau aposetolo tua fakamooli ka nonofo i ai. Ato mate a ia, ne mavehe e ia ke taute taha mena ma lautolu ke nonofo mo e haana Matua he lagi.​​​—Totou Ioane 14:2.

Ko e ha e tau tagata he lalolagi ka fakaliliu tutū mai ke moui ki luga he lagi? Ko e heigoa ha lautolu ka taute i ai? Ne talaage e Iesu ke he haana tau aposetolo to eke a lautolu mo tau patuiki. To pule a lautolu ke he lalolagi.​​​—Totou Luka 22:28-30; Fakakiteaga 5:10.

Laulahi he tau motu, ne tokofiha ni e tagata ka pule. Ha kua fakaliliu tutū mai e Iesu e tau tagata ke momoui ke he lagi ke maeke a lautolu ke pule ke he lalolagi, ne amanaki foki a tautolu to tokogahoa ka fifili. (Luka 12:32) Ne talahau fakatonu he Tohi Tapu ko e tokofiha ka pule mo Iesu.​​​—Totou Fakakiteaga 14:1.

Nakai ni ko lautolu ka o ke he lagi ka fai taui. Ko e tau tagata tua fakamooli he Kautu ha Iesu ka moua e moui nakai fai fakaotiaga he parataiso he lalolagi kua fakafoou. (Ioane 3:16) Ko e falu ka huhū atu ke he Parataiso he hao mai he moumouaga he fakatokaaga kelea nei. To huhū atu e falu ka fakaliliu tutū mai.​​​—Totou Salamo 37:29; Ioane 5:28, 29.