“Mulungu . . . azeshangule misozi yonse m’menso mwao, nipo infwa ikankhalepo lini soti, pakaŵeve malilo, keno kubuula, nangu voŵaŵa. Vakale valuta.”​—Chivumbulutso 21:3, 4, Baibulo la dziko latsopano.

Mukaŵe na moyo wotemwesha koma soti nchito iweme.​—Yesaya 65:21-23.

Kukaŵeve matenda keno kutamana kwa mtundu uliwonse.​—Yesaya 25:8; 33:24.

Tikatemwe na moyo wosasila pamo na abanja ŵasu na ayasu.​—Salimo 37:11, 29.

Eee, tingazicetekele pa vikomo viŵili:

• Mulungu ali na mphamvu zokwanilisha malonjezo ŵake. M’Baibolo Yehova Mulungu yeka niye oitiwa kuti “Wamphamvu zonse,” pakuti yeve ali na mphamvu ziliye polekezhyela. (Chivumbulutso 15:3) Tetyo angakangiwe lini kukwanilisha malonjezo ŵake yowamya calo kuti ciŵe ciweme. N’nga ni mwayunenela Baibolo, “zinthu zonse zukwanilishika na Mulungu.”​—Mateyo 19:26.

• Mulungu niwofunishisha kukwanilisha malonjezo ŵake. Mwacisanzo, Yehova olaka-laka kuukisha ŵanthu ecifwa kuti akaŵe soti na moyo.​—Yobu 14:14, 15.

  Baibolo yunena soti kuti Mwana wa Mulungu Yesu enzopozhya olwala. Mwa ecitilanji zamene izo? Cikomo cakuti enzopangwa. (Maliko 1:40, 41) Yesu eonesha luweme minkhalidwe yaawisi pofunishisha kuyavya ŵanthu ozingwa.​—Yohane 14:9.

  Tetyo nise osimikizhya kuti Yehova na Yesu opangwa kutiyavya kuti tikaŵe na umoyo wotemwesha kunthangu.​—Salimo 72:12-14; 145:16; 2 Petulo 3:9.