KATHMANDU, Nepal—Dihlatse tša Jehofa go tšwa Bangladesh, India, Japane, Jeremane, Switzerland le United States di rulagantše modiro wa tlhakodišo go thuša batho bao ba phologilego tšhišinyego e kgolo ya lefase yeo e hlasetšego naga ya Nepal ka April 25, 2015, mo go hwilego batho ba dikete go akaretša mosadi wa Hlatse le bana ba gagwe ba babedi. Tšhišinyego ya bobedi e ile ya hlasela naga ya Nepal ka May 12, 2015, lega go le bjalo, tšhišinyegong ye ga go na Hlatse yeo e gobetšego kudu goba yeo e hwilego ebile ga go na dithoto tša tšona tšeo di senyegilego kudu.

Letšatši ka morago ga tšhišinyego ya mathomo, baemedi bao ba tšwago ofising ya Dihlatse tša Jehofa ya Nepal ba ile ba etela diphuthego tša motseng wa Kathmandu e lego lefelo leo le hlasetšwego kudu ke tšhišinyego ye go bona seo ba ka thušago ka sona. Tšhišinyego ye e sentše o šoro magae a 38 a Dihlatse gomme ya senya magae a mangwe a 126. Bao ba lahlegetšwego ke magae a bona ba dula magaeng a barapedigotee le bona, mafelong a bona a borapedi a bitšwago Diholo tša Mmušo le ditenteng tšeo di hlomilwego mafelong a itšego. Ofisi ya Nepal e ile ya thoma go nea bahlaselwa dijo, gomme ka morago e ile ya amogela dilo tše oketšegilego tša go thuša go tšwa Bangladesh, India le ditoropong tša Nepal e lego Birgunj, Damauli, Mahendranagar le Pokhara. Komiti ya Tlhakodišo e rulaganya modiro wo o tšwelago pele wo o dirwago ke baithaopi ba Dihlatse go tšwa India, Japane le Nepal wa go aga mafelo a bodulo a nakwana bakeng sa bahlaselwa.

Mmoleledi wa Dihlatse tša Jehofa tša Nepal, Reuben Thapaliya, o boletše gore: “Ga se ra tshwenyega feela ka dilo tšeo bahlaselwa ba ba di hlokago eupša re tshwenyegile gape le ka go ba homotša ka Beibele. Go oketša maitekong a rena a go ba nea dijo, meetse le madulo, re rulagantše gore ba hwetše thušo ka gore re ba etele le go ba kgothatša ka mangwalo.” Go thoma ka May 2-5, 2015 Gary Breaux e lego moemedi yo a tšwago ntlongkgolo ya Dihlatse tša Jehofa ya lefase ka bophara, o ile a ya tikologong yeo e hlasetšwego ke kotsi gomme a etela diphuthego le malapa ao a hlasetšwego. Ka May 4, 2015, Mna. Breaux o ile a nea polelo e kgethegilego yeo e theilwego Beibele moo diphuthego tše dingwe di bego di theeditše lenaneo le di bego di kgokagantšwe ka bidio. Go oketša mo, Kenji Chichii e lego moemedi yo a tšwago ofising ya lekala ya Dihlatse tša Jehofa ya Japane, o ile a fihla ka May 5, 2015 go etela malapa ao a wetšwego ke kotsi ye le go kgothatša ka dipolelo tšeo di theilwego Beibeleng.

Ofisi ya lekala ya Dihlatse tša Jehofa ya Jeremane e ile ya rulaganya sehlopha sa Dihlatse go yo thuša ka tša kalafo, gomme sehlopheng se go be go na le dingaka le baoki. Sehlopha se sa go tšwa Yuropa se ile sa šoma le Komiti ya Tlhakodišo ya Nepal go oka balwetši bao ba bego ba le Diholong tša Mmušo tša lefelong leo le wetšwego ke kotsi. Sehlopha se ile sa hwetša ditlabakelo tša kalafo go tšwa go Dihlatse tša Bangladesh, India le Japane.

J. R. Brown, e lego mmoleledi wa Dihlatse tša Jehofa ntlongkgolo ya tšona ya lefase ka bophara, o boletše gore: “Re sa tšwela pele re dira maiteko a go thuša batho ka gobane re lemogile gore baphologi ba kotsi ye e šoro gantši ba hloka le kgothatšo ya mangwalo go feta go fo ba nea dilo tšeo ba di hlokago. Barapedigotee le rena ba Nepal le baphologi ba bangwe ba tšhišinyego ye ba ka kgodišega gore re tla dula re ba thuša ka seo ba se hlokago le go ba kgothatša ka Beibele. Re tla dula re nagana ka bona le go ba bea dithapelong tša rena.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Jeremane: Wolfram Slupina, mogala +49 6483 41 3110

Japane: Ichiki Matsunaga, mogala +81 46 233 0005

Nepal: Reuben Thapaliya, mogala +977 9813469616