Amose 5:1-27
5 “Lena ba ntlo ya Isiraele, ekwang seo ke le botšago sona ke diriša koša ya sello, ke re:
2 “Isiraele yeo e lego kgarebe e wele mobung wa yona.Ga e kgone go tsoga gape.
Batho ka moka ba e tlogetše,Ga go na motho yo a e tsošago.’
3 “Gobane Mmuši Morena Jehofa o re:
‘Motse wo o rometšego mašole a sekete ntweng o tlo šala ka a lekgolo,Gomme wo o rometšego mašole a lekgolo o tlo šala ka a lesome. Dilo tše di tlo diragalela batho ba Isiraele.’
4 “Nna Jehofa ke botša batho ba Isiraele ke re:
‘Boelang le ntlhankeleng gore le tle le dule le phela.
5 Le se ke la ya Bethele go yo nyaka thušo,E bile le se ke la ya Giligala goba la fetela Beresheba,Ka gobane batho ba Giligala ba tlo išwa bothopša,Gomme Bethele yona e tlo fedišwa.
6 Boelang le ntlhankeleng nna Jehofa gore le tle le dule le phela.E le gore ke se tlo fediša batho ba ntlo ya Josefa bjalo ka ge eka ba fedišwa ke mollo,Mollo woo wa fiša Bethele gomme gwa se be le yo a o timago.
7 Lena le fetoša toka gore e be lengana,*E bile le e lahletše fase.
8 Yo a dirilego sehlopha sa dinaledi seo se bitšwago Kima le seo se bitšwago Kesile,Yo a fetošago leswiswi le leso kudu gore e be seetša sa mesong,Yo a dirago gore mosegare e be leswiswi go swana le bošego,Yo a kgobokeletšago meetse a lewatle go yena,Gomme ka morago a a tšhollela lefaseng.Yena yoo leina la gagwe ke Jehofa.
9 O tla fediša bao ba nago le matla,A fediša le mafelo ao a šireleditšwego.
10 Ba hloile yo a ba kgalemelago kgorong ya motse,E bile ba hloile le bao ba bolelago nnete.
11 Ka ge le gapeletša badiidi gore ba patele go lema mašemong,E bile le ba gapeletša gore ba le fe mabele.Le ka se dule dintlong tšeo le di agilego ka maswika ao a betlilwego,Le gona le ka se nwe beine ya diterebe tše dibose tšeo le di bjetšego.
12 Ka gobane ke a tseba gore le ile la ntlhanogela gantšhi,Le gore dibe tša lena ke tše dintšhi bjang.Le tlaiša baloki,Le kgopela batho tšhelete ya pipamolomo,E bile ga le ahlole badiidi gabotse kgorong.
13 Ka nako yeo, bao ba lego bohlale ba tlo homola,Ka gobane e tla be e le nako ya masetlapelo.
14 Dirang dilo tše di lokilego e sego tše mpe,E le gore le tle le dule le phela.
Ka gona Jehofa Modimo wa madira o tla ba le lena,Bjalo ka ge le bolela gore o na le lena.
15 Hloyang dilo tše mpe, le rate dilo tše dibotse.Anke baahlodi ba bontšhe toka ge ba ahlola kgorong.
Mohlomongwe Jehofa Modimo wa madiraO tla gaugela ditlogolwana tša Josefa tšeo di tlago go phologa.’
16 “Ka gona Jehofa Modimo wa madira, yena Jehofa, o re:
‘Go tla ba le dillo mafelong ka moka a go rekišetša,Diterateng ka moka batho ba tla re, “Joo! Joo!”
Ba tla bitša balemi gore ba tle ba lle,Gomme ba tla hira le batho gore ba tle ba lle ba hlabošitše mantšu.’
17 ‘Go tla ba le sello dirapeng ka moka tša diterebe,Ka gobane ke tla feta nageng ya lena gore ke le otle.’ Ke nna Jehofa ke bolelago se.
18 ‘Go madimabe bao ba dumago gore letšatši la Jehofa le tle!
Ka gona, letšatši la Jehofa le tla ba bjang go lena?
E tla ba la leswiswi, gwa se be le seetša.
19 Letšatšing leo lena le tlo swana le monna yo a tšhabago tau gomme a gahlana le bere,Le gona ge a re o tsena ka ntlong a ithekga lebotong ka seatla sa gagwe, noga ya mo loma.
20 Letšatši la Jehofa e tlo ba la leswiswi e sego la seetša.Le gona e tlo ba le leso, le ka se tage.
21 Ke hloile menyanya ya lena ya borapedi e bile e a ntšhišimiša,Le gona ga ke thabele monkgo wa dihlabelo tšeo le di dirago ge le kopane.
22 Le ge le ka ntirela dihlabelo la nnea le dimpho,Nka se di thabele.Le gona nka se amogele dihlabelo tša lena tša go dira khutšo tšeo le di dirago ka diphoofolo tšeo di nonnego.
23 Tlogelang go opela dikopelo tša lena tša mašata,Le gona ga ke nyake go kwa mmino wa diletšo tša lena.
24 Anke toka e elele bjalo ka meetse,Le bjalo ka noka yeo e dulago e ela.
25 Lena ba ntlo ya Isiraele, na ga se lena le ilego la nnea dihlabelo le dimphoKua lešokeng ka mengwaga e 40?
26 Le tlo rwala Sakuthe le Kaiwane,E lego diswantšho tša medingwana ya dinaledi yeo le itiretšego yona.
27 Ke tla le iša bothopša nageng yeo e lego kgole le Damaseko.’ Mantšu a a bolelwa ke yoo leina la gagwe e lego Jehofa, yena Modimo wa madira.”
Mengwalo ya tlase
^ Lengana ke semela sa go baba.
