Ekisodo 23:1-33
23 “O se ke wa bolela taba yeo e sego nnete. O se ke wa thuša motho yo mongwe ka go ba hlatse ya maaka yeo e nyakago go gobatša motho yo mongwe.
2 O se ke wa dira selo se sebe, feela ka gobane se dirwa ke batho ba bantšhi. Ge o le tshekong, ga se wa swanela go nea bohlatse bja maaka e le gore motho yo mongwe a swarwe ka go hloka toka, feela ka gobane o nyaka go kgahliša batho ba bantšhi.
3 O se ke wa emelela modiidi tshekong feela ka gore e le modiidi.
4 “Ge o ka kopana le poo ya lenaba la gago goba tonki ya gagwe e timela, o e bušetše go yena.
5 Ge o ka bona tonki ya motho yo a go hloilego e wele le morwalo wa yona, gona o se ke wa e tlogela. O thuše motho yoo go e rola morwalo.
6 “O se ke wa ahlola ka go hloka toka ge o ahlola modiidi.
7 “O be kgole le ditaba tša maaka. O se ke wa bolaya motho yo a se nago molato e bile o se ke wa bolaya yo a lokilego, ka gobane motho yo a dirago selo se sebe sa go swana le seo, nka se re o lokile.
8 “O se ke wa tšea pipamolomo, ka gobane pipamolomo e ka dira gore motho yo a ahlolago a se ke a ahlola gabotse, e bile e ka dira gore motho yo a lokilego a fetoše diphetho tša gagwe.
9 “O se ke wa gatelela motho yo a tšwago nageng e nngwe, ka gobane le wena o tseba gabotse gore bophelo bja go dula nageng yeo e sego ya geno bo bjang, ka ge le ile la dula nageng yeo e sego ya gabo lena kua Egepeta.
10 “O leme nageng ya gago ka mengwaga e tshelelago, gomme o kgobele tšeo o di bunnego nageng yeo.
11 Eupša ka ngwaga wa bošupa, o e tlogele gore o se ke wa e lema. Batho ba geno bao ba diilago ba je dilo tšeo di lego mo go yona. Diphoofolo tša nageng tšona, di je tšeo ba di šadišitšego. O dire bjalo ka serapa sa gago sa diterebe le ka mehlare ya gago ya mehlware.
12 “O dire mošomo wa gago ka matšatši a tshelelago, eupša ka letšatši la bošupa o se ke wa šoma, e le gore poo ya gago le tonki ya gago di khutše, le makgoba a gago gotee le bao ba tšwago dinageng tše dingwe le bona ba khutše.
13 “Le kgonthišetše gore le dira dilo ka moka tšeo ke le boditšego tšona, le se ke la bitša maina a medimo e mengwe. Go se be le yo a kwago seo se etšwa molomong wa gago.
14 “O ntirele monyanya gararo ka ngwaga.
15 O dire Monyanya wa Dinkgwa tše di sa Omelwago. Bjalo ka ge ke go laetše, o fetše matšatši a šupago o eja dinkgwa tše di sa omelwago, o dire seo nakong e beilwego ka kgwedi ya Abibi, ka gobane o tšwile Egepeta ka yona. Go se be le yo a tlago pele ga ka a lekeleditše matsogo.
16 Le dire le Monyanya wa go Buna dienywa tša mathomo tšeo le di šometšego ka thata mašemong a lena. Le gona mafelelong a ngwaga, le dire Monyanya wa go Kgoboketša tšeo le di bunnego tšeo le di šometšego ka thata mašemong a lena.
17 Banna ka moka ba tšwelele gararo ka ngwaga pele ga Morena, e lego Jehofa.
18 “Ge o ntlišetša sehlabelo, o se ke wa se tliša se na le senkgwa seo se nago le komelo. Le gona, makhura ao le mphago ona ge le ntirela monyanya, le se ke la a bea bošego ka moka go fihla mesong.
19 “Dienywa tša mathomo tše dibotsebotse tšeo di tšwago mašemong a lena, le di tlišeng ntlong ya Jehofa Modimo wa lena.
“O se ke wa fufutša putšanyana ka maswi a mmago yona.
20 “Ke roma morongwa gore a go ete pele e le gore a go šireletše, a be a go fihliše lefelong leo ke go lokišeditšego lona.
21 Le mo theetšeng dilong ka moka tšeo a di bolelago. Ge le ka tlogela go mo kwa, a ka se le swarele dibe tša lena, ka gobane o tla ka leina la ka.
22 Eupša ge e ba le ka mo kwa dilong ka moka, la ba la dira dilo ka moka tšeo ke le botšago tšona, gona ke tla ba lenaba la manaba a lena, gomme ka hlakiša bao ba le hlakišago.
23 Gobane morongwa wa ka o tla le eta pele a le iša go Baamore, Bahethe, Baperetse, Bakanana, Bahefe le Bajebusi, gomme nna ke tla ba fediša.
24 O se ke wa khunamela medimo ya bona goba wa goketšwa go e hlankela. Le gona, o se ke wa dira dilo tša go swana le medimo ya bona, eupša o e phušole o be o senye dikokwane tša bona tše kgethwa.*
25 Le hlankele nna Jehofa Modimo wa lena gomme ke tla šegofatša dijo tša lena le meetse a lena, ka ba ka tloša bolwetši mo go lena.
26 Nageng ya lena go ka se be le mosadi yo a senyegelwago ke mpa goba yo a sa kgonego go belega bana. Ke tla dira gore le phele go fihlela le tšofala.
27 “Pele le ka fihla, ke tla dira gore ditšhaba tšeo di mpoife, ka gakantšha batho ka moka bao le tlago go ya go bona gomme ka dira gore manaba a lena ka moka a le tšhabele.
28 Pele le ka fihla, ke tla dira gore Bahefe, Bakanana le Bahethe ba tšhoge kudu gomme ka dira gore ba le tšhabe.
29 Nka se ba rake pele ga lena ka ngwaga wa mathomo, e le gore naga e se fetoge lešope gomme dibata tša naga ya ba tše dintšhi.
30 Ke tla ba raka ganyenyane-ganyenyane go fihlela le eba ba bantšhi gomme le tšea naga gore e be ya lena.
31 “Naga yeo ke tlago go le fa yona, e tla thoma Lewatleng le Lehwibidu gomme ya fihla Lewatleng la Bafilisita, le go tloga lešokeng go fihla Nokeng ya Eforate, ka gobane ke tla dira gore le fenye ditšhaba tšeo gomme la di raka.
32 O se ke wa dira kgwerano le bona goba le medimo ya bona.
33 Ba se ke ba dula nageng ya gago, e le gore ba se go dire gore o ntirele sebe. Ge o ka hlankela medimo ya bona, gona dilo di ka se go sepelele gabotse.”
Mengwalo ya tlase
^ Goba “dikokwane tša bona tše kgethwa.”
