Ekisodo 38:1-31
38 A dira aletare ya dibego tša go fišwa ka kota ya mohlare wa mošwana. Mahlakore a yona a mane a be a lekana. Botelele bja yona e be e le dimithara tše e ka bago tše pedi,* bophara bja yona e le dimithara tše e ka bago tše pedi, gomme botelele bja yona go ya godimo e le mo e ka bago mithara o tee.
2 Ke moka a e direla manaka dikhoneng tša yona tše nne. Manaka ao a a dira ka yona kota yeo a dirilego aletare ka yona gomme a e penta ka koporo.
3 Ka morago ga moo a dira dibjana ka moka tša aletare, a dira dipaketana tša go olela molora, digarafo, dibjana, diforoko le dibjana tša go swara magala. Dibjana tša yona ka moka a di dira ka koporo.
4 Le gona, a dira sefo ka koporo a e bea ka tlasenyana moo e felelago gona kgauswi le bogare bja aletare.
5 A dira mekgoko e mene dikhoneng tša yona tše nne kgauswi le sefo ya koporo, gore go tsenywe dikota tša go e rwala.
6 Ka morago ga moo a dira dikota ka mohlare wa mošwana gomme a di penta ka koporo.
7 A tsenya dikota tšeo mekgokong ka mahlakoreng ka bobedi a aletare gore e rwalwe ka tšona. A dira aletare yeo gore e be lepokisi la mapolanka le le bulegilego.
8 Ke moka a dira sekotlelo sa go hlapela ka koporo, le selo seo se bewago go sona a se dira ka koporo. A diriša diipone tšeo di dirilwego ka koporo tšeo di bego di tlišitšwe ke basadi bao ba bego ba hlankela mojakong wa taberenakele.
9 A direla taberenakele lapa. Ka lehlakoreng la ka borwa la taberenakele, a dira digareteine tšeo di dirilwego ka linene e boletiana ya dimithara tše e ka bago tše 44 ka lehlakoreng letee.
10 E be e na le diphilara tše 20 le maotwana a 20 a koporo ao a nago le mašoba. Dihuku tša diphilara tšeo le dilo tša go di kopanya e be e le tša silifera.
11 Lehlakore la ka leboa le lona le be le na le digareteine tša dimithara tše e ka bago tše 44 ka botelele. Diphilara tša lona tše 20 le maotwana a lona ao a nago le mašoba e be e le tša koporo. Dihuku tša diphilara tšeo le dilo tša go di kopanya e be e le tša silifera.
12 Eupša digareteine tša ka lehlakoreng la ka bodikela tšona e be e le dimithara tše e ka bago tše 22 ka botelele. Go be go na le diphilara tše lesome le maotwana a lesome ao a nago le mašoba, gomme dihuku tša diphilara tšeo le dilo tša go di kopanya e be e le tša silifera.
13 Bophara bja lapa leo ka thoko ya ka bohlabela e be e le dimithara tše e ka bago tše 22.
14 Digareteine tša ka lehlakoreng le lengwe e be e le tša dimithara tše e ka bago tše šupa. Di be di na le diphilara tše tharo le maotwana a mararo ao a nago le mašoba.
15 Digareteine tša ka lehlakoreng le lengwe la keiti ya lapa le tšona e be e le tša dimithara tše e ka bago tše šupa. Di be di na le diphilara tše tharo le maotwana a mararo ao a nago le mašoba.
16 Digareteine ka moka go dikologa lapa e be le tša linene e boletiana.
17 Maotwana ao a nago le mašoba a diphilara e be e le a koporo. Dihuku tša diphilara tšeo le dilo tša go di kopanya e be e le tša silifera, ka godimo ga tšona di pentilwe ka silifera gomme diphilara ka moka tša lapa di be di na le dilo tša go bofa tša silifera.
18 Gareteine ya mojakong wa tente e be e dirilwe ka garane e talalerata, wulu ya mmala o mophepolo, garane e khwibidukhwibidu le linene e boletiana. E be e le ya dimithara tše e ka bago tše senyane ka botelele, gomme e le dimithara tše e ka bago tše pedi ka botelele go ya godimo. Botelele bja yona bo lekana le digareteine tša lapa.
19 Diphilara tša yona tše nne le maotwana a tšona a mane ao a nago le mašoba e be e le tša koporo. Dihuku tša yona e be e le tša silifera gomme karolo ya tšona ya ka godimo le dilo tša go di kopanya di be di pentilwe ka silifera.
20 Dipikiri ka moka tša tente ya taberenakele le tšeo di šomišitšwego go dira lapa e be e le tša koporo.
21 Moshe o ile a laela gore go balwe dilo tša ka taberenakeleng, e lego taberenakele yeo e bego e na le diphaphathi tša maswika.* Balefi bao ba bego ba eteletšwe pele ke Ithamara morwa wa moperisita Arone ke bona ba badilego dilo tšeo.
22 Betsalele morwa wa Uri, morwa wa Huru wa moloko wa Juda, o dirile dilo ka moka tšeo Jehofa a bego a di laetše Moshe.
23 O be a na le Oholiaba morwa wa Ahisamake wa moloko wa Dani, yo e bego e le setsebi sa mošomo wa diatla e bile a kgona go kgabiša le go loga ka garane e talalerata, wulu ya mmala o mophepolo, garane e khwibidukhwibidu le linene e boletiana.
24 Gauta ka moka yeo e dirišitšwego mošomong ka moka wa lefelo le lekgethwa e be e lekana le gauta ya sebego sa go tšokotšwa, e lego dikhilograma tše 1 000* go ya ka tsela ya go kala ya lefelong le lekgethwa.
25 Silifera yeo e bego e tlišitšwe ke banna bao ba bego ba ngwadišitše maina a bona ge ba be ba balwa, e be e le ya dikhilograma tše 3 440* go ya ka tsela ya go kala ya lefelong le lekgethwa.
26 Motho yo mongwe le yo mongwe yo a badilwego, go tloga ka wa mengwaga e 20 go ya godimo, o ile a tliša digrama tše tshela tša silifera* go ya ka tsela ya go kala ya lefelong le lekgethwa gomme batho bao e be e le ba 603 550 (dikete tše makgolotshela-tharo-makgolohlano-masomehlano).
27 Gwa dirwa maotwana ao a nago le mašoba a lefelong le lekgethwa, le maotwana ao a nago le mašoba a diphilara tšeo gareteine e bego e fegilwe go tšona ka silifera ya dikhilograma tše 3 420.* Maotwana ao a nago le mašoba a 100 a be a lekana le dikhilograma tše 3 420 gomme leotwana le lengwe le lengwe leo le nago le mašoba le lekana le dikhilograma tše 34,2.*
28 O ile a tšea silifera ya dikhilograma tše 20* a dira dihuku tša diphilara gomme a penta karolo ya tšona ya ka godimo ke moka a kopanya diphilara tšeo ka dintlhana tša tšona.
29 Koporo yeo e bego e neetšwe go dira sebego sa go tšokotšwa e be e le dikhilograma tše 2 420* (dikete tše pedi-makgolonne-masomepedi).
30 A dira maotwana ao a nago le mašoba a mojako wa taberenakele ka koporo yeo, a dira le aletare ya koporo, sefo ya yona ya koporo, dibjana ka moka tša aletare,
31 maotwana ao a nago le mašoba a lapa le maotwana ao a nago le mašoba a mojako wa lapa, dipikiri ka moka tša taberenakele le dipikiri ka moka tšeo di šomišitšwego go dira lapa.
Mengwalo ya tlase
^ “Kubiti e tee” e lekana le disenthimithara tše 44,5.
^ Phetolelo ya lentšu ka lentšu e re, “Bohlatse,” e lego maswika ao a bego a ngwadilwe melao ya Modimo.
^ Phetolelo ya lentšu ka lentšu e re, “ditalente tše 29 le dishekele tše 730.” Talente e tee e lekana le dikhilograma tše 34,2, shekele e tee e lekana le digrama tše 11,4. Bona Dit. B14.
^ Phetolelo ya lentšu ka lentšu e re, “ditalente tše 100 le dishekele tše 1 775.”
^ Phetolelo ya lentšu ka lentšu e re, “seripa sa shekele.”
^ Phetolelo ya lentšu ka lentšu e re, “ditalente tše 100.”
^ Phetolelo ya lentšu ka lentšu e re, “talente e tee.”
^ Phetolelo ya lentšu ka lentšu e re, “dishekele tše 1 775.”
^ Phetolelo ya lentšu ka lentšu e re, “ditalente tše 70 le dishekele tše 2 400.”
