Lefitiko 10:1-20
10 Ka morago, barwa ba Arone e lego Nadaba le Abihu, ba ile ba tliša diorelo. Yo mongwe le yo mongwe o ile a di tliša ka sebjana sa gagwe gomme a tsenya magala ka go sona a ba a tsenya le diorelo tšeo. Ke moka barwa bao ba Arone ba dira mollo woo Jehofa a sego a ba laela gore ba o dire.
2 Mollo wo o tšwago go Jehofa o ile wa ba fiša, gomme ba hwela pele ga Jehofa.
3 Ke moka Moshe a re go Arone: “Jehofa o itše: ‘Bao ba lego kgauswi le nna ba swanetše go gopola gore ke nna yo mokgethwa, e bile setšhaba ka moka se tla ntagafatša.’” Ke moka Arone a ikhomolela.
4 Ka gona Moshe a bitša Mishaele le Elisafane, e lego barwa ba Usiele rangwane wa Arone, a re go bona: “Etlang mo le tlo rwala banababo lena le ba tloše pele ga lefelo le lekgethwa le ba išeng ka ntle ga ditente.”
5 Ka gona, ba tla ba ba rwala ba sa apere diaparo tša bona tša boperisita ba ba iša ka ntle ga ditente, ba dira bjalo feela ka ge Moshe a boletše.
6 Ke moka Moshe a bolela le Arone le barwa ba gagwe ba bangwe e lego Eleasara le Ithamara a re: “Le se ke la tlogela dihlogo tša lena di le mahlafarara, le gona le se ke la kgeila diaparo tša lena e le gore le se ke la hwa le gore Modimo a se ke a galefela setšhaba ka moka. Banababo lena e lego setšhaba ka moka sa Isiraele, bona ba tla llela barwa ba babedi ba Arone bao Jehofa a ba bolailego ka mollo.
7 Le se ke la tšwa ka mojako wa taberenakele ka gobane le tlo hwa, ka gore Jehofa o le tloditše ka makhura.” Ka gona ba dira kamoo Moshe a boletšego ka gona.
8 Jehofa a bolela le Arone a re:
9 “Wena le barwa ba gago ge le tsena ka taberenakeleng, le se ke la nwa beine goba bjala e le gore le se ke la hwa. Wo ke molao wa go ya go ile melokong ya lena ka moka.
10 Molao wo o tla le thuša gore le tsebe phapano magareng ga selo se sekgethwa le seo e sego se sekgethwa, le magareng ga selo seo se hlwekilego le seo se sa hlwekago,
11 gomme le tla kgona go ruta Baisiraele ditaelo ka moka tšeo Jehofa a ba boditšego tšona a diriša Moshe.”
12 Moshe a bolela le Arone le barwa ba gagwe bao ba bego ba šetše, e lego Eleasara le Ithamara a re: “Tšeang sebego sa mabele seo se šadišitšwego dibegong tša go fišwa ka mollo tšeo di direlwago Jehofa. Le se je se sa omelwa, le se jele kgauswi le aletare ka gobane ke selo se sekgethwakgethwa.
13 Le se jele lefelong le lekgethwa ka ge e le karolo ya lena le ya barwa ba lena yeo e tšwago dibegong tša Jehofa tša go fišwa, ka gobane se ke seo Modimo a ntaetšego gore ke le botše sona.
14 Wena le barwa ba gago le barwedi ba gago, le je le leoto la karolo e kgethwa le sehuba sa sebego sa go tšokotšwa. Le di jele lefelong leo le hlwekilego ka gobane dilo tše o di neilwe e le karolo ya gago le ya barwa ba gago go tšwa dihlabelong tša go dira khutšo le Modimo tša Baisiraele.
15 Ba tliše leoto la sebego se sekgethwa le sehuba sa sebego sa go tšokotšwa le dibego tša makhura tša go fišwa ka mollo, e le gore sebego sa go tšokotšwa se tšokoletšwe pele le morago pele ga Jehofa. E tla ba karolo ya lena le barwa ba lena go ya go ile, feela bjalo ka ge Jehofa a be a laetše.”
16 Ge Moshe a botšiša gore pudi ya sebego sa sebe e kae, o ile a hwetša e fišitšwe. Ke moka a galefela Eleasara le Ithamara e lego barwa ba Arone bao ba bego ba šetše, a re go bona:
17 “Ke ka baka la’ng le se la ja sebego sa sebe? Nkabe le se jetše lefelong le lekgethwa ka ge e le selo se sekgethwakgethwa, le gona Modimo o le neile sona gore le tloše molato wa setšhaba e le gore Jehofa a se lebalele dibe tša sona.
18 Ga go na motho yo a tlišitšego madi a sona lefelong le lekgethwa. Nkabe le se jetše ka lefelong le lekgethwa, feela bjalo ka ge ke laetšwe.”
19 Arone a araba Moshe a re: “Tseba gore lehono setšhaba se tlišitše sebego sa sona sa sebe le sebego sa sona sa go fišwa go Jehofa. Bjale ka morago ga dilo tše ka moka tšeo di ntiragaletšego, ge nkabe ke jele sebego sa sebe lehono, na seo se be se tla thabiša Jehofa?”
20 Ge Moshe a ekwa seo a kgotsofala.
