Lefitiko 13:1-59
13 Jehofa a bolela le Moshe le Arone a re:
2 “Ge e ba motho a ka ruruga goba a tšwa dišo goba a tšwa selonyana se se sehla mo mmeleng seo go ka diregago gore e ka ba e le bolwetši bja lephera, gona a tlišwe go moperisita Arone goba go yo mongwe wa barwa ba gagwe ba baperisita.
3 Moperisita a lekole ntho yeo e lego letlalong la gagwe. Ge boya bja moo go lego ntho bo fetogile bjo bošweu e bile go bonagala ntho yeo e tseneletše mo letlalong, gona ke bolwetši bja lephera. Moperisita a lekole ntho yeo gomme a tsebiše batho gore motho yoo ga se a hlweka.
4 Eupša ge e ba selonyana seo se se sehla seo se mo tšwelego mo letlalong e le se sešweu, e bile se bonagala se sa tsenelela mo letlalong gomme boya bjo bo lego go sona e se bjo bošweu, gona moperisita a bee molwetši yoo a nnoši matšatši a šupago.
5 Ka letšatši la bošupa moperisita a mo lekole, gomme ge e ba go bonagala ntho yeo e fodile e bile e se ya keka mo letlalong, gona moperisita a mmee a nnoši matšatši a mangwe gape a šupago.
6 “Moperisita a mo lekole gape ka letšatši la bošupa gomme ge e ba ntho yeo e fodile e bile e se ya keka, gona moperisita a tsebiše gore o hlwekile, e be e no ba sešo. Ka morago ga moo motho yoo a hlatswe diaparo tša gagwe gomme a hlweke.
7 Eupša ge e ba ka morago ga ge moperisita a tsebišitše gore motho yoo o hlwekile, sešo seo sa boa gape gomme sa keka mo mmeleng, gona o swanetše go boela go moperisita.
8 Ke moka moperisita a lekole sešo seo, gomme ge e ba se kekile mo mmeleng gona moperisita a tsebiše gore motho yoo ga se a hlweka. Ke lephera.
9 “Ge e ba motho a ka tšwa bolwetši bja lephera, gona a tlišwe go moperisita
10 gomme a mo lekole. Ge e ba a ka hwetša gore o rurugile gomme mo a rurugilego ke mo gošweu e bile go fetošitše boya bja moo gore e be bjo bošweu e bile go na le ntho yeo e bulegilego,
11 gona motho yoo o tšwile lephera leo le sa folego mmeleng wa gagwe. Moperisita o tla tsebiša batho gore ga se a hlweka. Ga se a swanela go mmea a nnoši ka gobane ga se a hlweka.
12 Ge e ba motho a ka tšwa lephera gomme moperisita a kgona go bona gore motho yoo o tšwile lephera go tloga hlogong go fihla maotong,
13 le gona ge moperisita a mo lekotše gomme a bone gore lephera leo le tletše mmele wa gagwe ka moka, gona a tsebiše batho gore motho yoo o hlwekile. Ka ge letlalo la gagwe ka moka le fetogile le lešweu go ra gore o hlwekile.
14 Eupša ge e ba a ka tšwa ntho e bulegilego mo letlalong la gagwe, motho yoo e tla ba yo a sa hlwekago.
15 Ge moperisita a bona gore ntho yeo e bulegile, a tsebiše batho gore motho yoo ga se a hlweka ka baka la ntho yeo ya gagwe e bulegilego. Ke lephera.
16 Eupša ge e ba ntho yeo e bulegilego e ka fetoga e tšhweu gape, gona motho yoo a tle go moperisita.
17 Moperisita a mo lekole gomme ge e ba ntho yeo ya gagwe e fetogile e tšhweu, gona moperisita a tsebiše batho gore motho yoo o hlwekile.
18 “Ge e ba motho a ka tšwa sešo mo mmeleng wa gagwe gomme sa fola,
19 eupša moo go bego go na le sešo seo gwa ruruga ya ba mo gošweu goba gwa tšwa selonyana se se sehla sa bošweu bjo bo nago le bohwibidu, gona motho yoo a ye go moperisita.
20 Moperisita a se lekole gomme ge e ba se bonagala se tseneletše mo letlalong gomme boya bjoo bo lego go sona bo fetogile bjo bošweu, gona moperisita a tsebiše batho gore motho yoo ga se a hlweka. Ke bolwetši bja lephera leo le tšwilego sešong.
21 Eupša ge e ba moperisita a ka re ge a se lekola a hwetša gore ga go na boya bjo bošweu mo go sona e bile ga se sa tsenelela mo letlalong, le gore se bonagala se fola, gona moperisita a mmee a nnoši matšatši a šupago.
22 Ge e ba sešo seo se kekile mo letlalong, gona moperisita a tsebiše batho gore motho yoo ga se a hlweka. O na le lephera.
23 Eupša ge e ba selo seo se se sehlana se se sa keka, gona o no ba a tšwele sešo. Moperisita a tsebiše batho gore motho yoo o hlwekile.
24 “Goba ge e ba motho a ka swa gomme a tšwa ntho, gomme ntho yeo ya tšwa selo seo se nago le bošweu bjo bo nago le bohwibidu goba ya ba se sešweu,
25 gona moperisita a se lekole. Ge e ba boya bja moo se tšwelego gona bo fetogile bjo bošweu e bile se bonagala se tseneletše mo letlalong, gona o tšwele lephera, moperisita o tla botša batho gore motho yoo ga se a hlweka. Ke bolwetši bja lephera.
26 Eupša ge moperisita a ka re ge a se lekola a hwetša gore ga go na boya bjo bošweu mo selong seo, le gore ga se sa tsenelela letlalong la gagwe e bile se a fola, gona moperisita a mmee a nnoši matšatši a šupago.
27 Moperisita a mo lekole gape ka letšatši la bošupa, gomme ge e ba selo seo se kekile mo mmeleng, gona moperisita a tsebiše batho gore motho yoo ga se a hlweka. Ke bolwetši bja lephera.
28 Eupša ge e ba selonyana seo se se sehla se se sa keka mo mmeleng e bile se fola, gona o no ba a rurugile mo a swelego gona. Moperisita a tsebiše batho gore motho yoo o hlwekile, ka gobane o no ba a rurugile moo a swelego gona.
29 “Ge e ba motho a ka tšwa ntho hlogong goba seledung,
30 gona moperisita a e lekole. Ge e ba ntho yeo e bonagala e tseneletše letlalong e bile moriri wa mo go lego ntho e le o mokheri e bile o le o mosesane, gona moperisita a tsebiše batho gore motho yoo ga se a hlweka, ke ntho ya hlogong goba ya seledung. Ke lephera la hlogong goba la seledung.
31 Eupša ge e ba moperisita a ka bona ntho yeo e se ya tsenelela letlalong e bile go se na moriri o moso mo go yona, gona moperisita a bee motho yoo a nnoši matšatši a šupago.
32 Moperisita a lekole ntho yeo ka letšatši la bošupa, ge e ba e se ya keka e bile go se na moriri o mokheri mo go yona e bile go bonagala ntho yeo e se ya tsenelela letlalong,
33 gona motho yoo a kote moriri goba ditedu, eupša a se ke a kota moo go nago le ntho. Ke moka moperisita a bee motho yoo a nnoši matšatši a mangwe gape a šupago.
34 “Ka letšatši la bošupa moperisita a lekole ntho yeo gape, gomme ge e ba e se ya keka e bile go bonagala e se ya tsenelela letlalong, gona moperisita a tsebiše batho gore o hlwekile, ke moka motho yoo a hlatswe diaparo tša gagwe gomme a hlweke.
35 Eupša ge e ba ntho yeo e ka boa gape gomme ya keka mo letlalong ka morago ga ge go šetše go tsebišitšwe gore motho yoo o hlwekile,
36 gona moperisita a mo lekole, gomme ge e ba ntho yeo e kekile mo letlalong, ga go hlokagale gore moperisita a bone ge e ba motho yoo a na le moriri o mokheri, ga se a hlweka.
37 Eupša ge e ba moperisita a bone gore ntho yeo ga se ya keka e bile go metše moriri o moso mo go yona, gona go ra gore ntho yeo e fodile. Motho yoo o hlwekile, gomme moperisita a botše batho gore o hlwekile.
38 “Ge e ba motho a ka tšwa dilonyana tše tšhweu mo letlalong,
39 gona moperisita a di lekole. Ge e ba dilonyana tšeo e le tše tshehla gona o no ba a tšwele dišo tšeo di sego kotsi letlalong. Motho yoo o hlwekile.
40 “Ge e ba monna a ka hlobega moriri gomme a tšwa lefatla, o hlwekile.
41 Ge e ba hlogo ya gagwe e hlobega meriri ka mo pele gomme a tšwa lefatla, gona o hlwekile.
42 Eupša ge e ba a ka tšwa ntho ya bošweu bjo bo nago le bohwibidu mo lefatleng goba mo phatleng, gona ke lephera leo le lego lefatleng goba phatleng.
43 Moperisita a mo lekole, gomme ge a ka hwetša gore ntho yeo e rurugile gomme e tšwele bošweu bjo bo nago le bohwibidu lefatleng goba phatleng e bile e bonagala bjalo ka lephera mo letlalong,
44 gona motho yoo ke molephera. Ga se a hlweka. Moperisita a tsebiše batho gore ga se a hlweka ka gobane o na le bolwetši bja lephera hlogong.
45 Ge e le motho yo a tšwelego lephera, a apare diaparo tšeo di gagogilego. A tlogele hlogo ya gagwe e le mahlafarara e bile a khupetše ditedu tša gagwe gomme a goeletše a re: ‘Ga se ka hlweka, ga se ka hlweka!’
46 O tla dula e le yo a sa hlwekago nakong ka moka ya ge a babja. Ka ge a se a hlweka ga se a swanela go dula le batho ba bangwe bao ba phetšego gabotse, o swanetše go dula ka ntle ga ditente.
47 “Ge e ba seaparo se ka tšwa lephera,* e ka ba e le seaparo sa wulu goba sa linene,
48 goba ge e ba lephera le ka tšwa lešeleng* leo le logilwego la linene goba la wulu goba letlalong la phoofolo goba selong le ge e le sefe seo se dirilwego ka letlalo,
49 se se ra gore ge e ba go ka tšwa mmala o mokheri woo o nago le botala goba o mohwibidu mo seaparong, letlalong la phoofolo, lešeleng la go logiwa goba selong le ge e le sefe seo se dirilwego ka letlalo la phoofolo gona ke bolwetši bja lephera, gomme se swanetše go bontšhwa moperisita.
50 Moperisita a lekole lešela leo gomme ge e ba le na le lephera, a le beele ka thoko matšatši a šupago.
51 Ge a ka re a lekola lephera leo ka letšatši la bošupa gomme a bona gore le kekile mo seaparong, lešeleng leo le logilwego goba letlalong la phoofolo (go sa šetšwe gore letlalo leo ke la go dira eng), gona lephera leo ke le lešoro. Selo seo ga se sa hlweka.
52 A fiše seaparo goba lešela leo le logilwego ka wulu goba linene goba selo le ge e le sefe seo se dirilwego ka letlalo la phoofolo seo go nago le lephera go sona, ka gobane lephera leo ke le lešoro. Se swanetšwe go fišwa mollong.
53 “Eupša ge e ba moperisita a ka re ge a se lekola a hwetša lephera leo le se la keka mo seaparong, lešeleng goba selong le ge e le sefe seo se dirilwego ka letlalo,
54 gona moperisita a laele gore selo seo se nago le lephera se hlatswiwe gomme a se beele ka thoko matšatši a mangwe gape a šupago.
55 Ke moka moperisita a lekole selo seo se nago le lephera ka morago ga gore se hlatswiwe gabotse. Ge e ba se se sa fetoga goba lephera leo le se la keka, gona ga se sa hlweka. Se swanetše go fišwa ka mollo ka gobane se jelwe ke lephera ka ntle goba ka gare.
56 “Eupša ge e ba moperisita a se lekotše gomme a hwetša lephera leo le se sa bonagala gabotse ka morago ga gore selo seo se hlatswiwe gabotse, gona a gagole karolo yeo e bego e na le lephera seaparong goba letlalong goba lešeleng.
57 Eupša ge e ba lephera leo le sa tšwelela karolong e itšego ya seaparo goba lešeleng goba selong le ge e le sefe seo se dirilwego ka letlalo, gona go ra gore le a keka gomme selo le ge e le sefe seo se nago le lephera se swanetše go fišwa mollong.
58 Eupša ge e ba lephera leo le se sa bonagala seaparong, lešeleng goba selong le ge e le sefe seo se dirilwego ka letlalo seo se hlatswitšwego gona se hlatswiwe la bobedi gomme e tla ba se se hlwekilego.
59 “Wo ke molao wa bolwetši bja lephera ge bo le seaparong seo se dirilwego ka wulu goba ka linene, lešeleng goba selong le ge e le sefe seo se dirilwego ka letlalo la phoofolo e le gore moperisita a tsebiše batho gore se hlwekile goba ga se sa hlweka.”
Mengwalo ya tlase
^ Lephera leo go bolelwago ka lona mo e ka ba e le mohuta wa mouta, le ge go sa tsebje gabotse ka taba ye. Bona Tlhaloso ya Mantšu.
^ Phetolelo ya lentšu ka lentšu e re, “digaraneng tša lešela tšeo di yago godimo le ka mahlakoreng.”
