Lefitiko 22:1-33
22 Jehofa a tšwela pele a bolela le Moshe a re:
2 “Botša Arone le barwa ba gagwe gore ba hlomphe dilo tše kgethwa tšeo Baisiraele ba di tlišago go nna, e bile ba se ke ba šilafatša leina la ka le lekgethwa. Ke nna Jehofa.
3 O ba botše o re: ‘Ge e ba mo melokong ya lena ka moka, go ka ba le motho le ge e le ofe yo a ka batamelago dilo tše kgethwa tšeo Baisiraele ba di neelago Jehofa, mola a se a hlweka, a bolawe. Ke nna Jehofa.
4 Go se be le motho le ge e le ofe wa leloko la Arone yo a jago dilo tše kgethwa ge a se a hlweka. Motho yo ga se a hlweka ge e ba a na le lephera, a ediša, a kgwathile motho yo a sego a hlweka ka baka la setopo goba e le monna yo a tšwago matšhedi,
5 goba motho yo a kgwathago diphedi tše di sa hlwekago tšeo di sepelago ka dihlopha, goba motho yo a kgwathago motho yo a šilafaditšwego ke selo le ge e le sefe.
6 Motho yo a kgwathago selo le ge e le sefe sa dilo tšeo e be yo a sa hlwekago go fihla mantšiboa gomme a se ke a ja selo le ge e le sefe se sekgethwa, eupša a hlape.
7 Ge letšatši le sobetše, e tla ba yo a hlwekilego gomme ka morago ga moo a ka ja tše dingwe tša dilo tše kgethwa ka gobane ke dijo tša gagwe.
8 Le gona a se ke a ja nama ya phoofolo le ge e le efe yeo e hwilego goba selo le ge e le sefe seo se bolailwego ke diphoofolo tša nageng, e le gore se se mo šilafatše. Ke nna Jehofa.
9 “‘Ba kwe molao wa ka gomme ba se ke ba šilafatša dilo tše kgethwa, e le gore ba se ke ba dira sebe gomme ba hwa. Ke nna Jehofa yo a ba dirago gore e be ba bakgethwa.
10 “‘Go se be le motho yo e sego wa leloko la baperisita yo a jago selo le ge e le sefe se sekgethwa. Le gona motho yo a tšwago nageng e nngwe yo a dulago le moperisita goba motho yo a hirilwego, a se ke a ja selo le ge e le sefe se sekgethwa.
11 Eupša ge moperisita a ka reka motho ka tšhelete ya gagwe, motho yoo a ka di ja. Ge e le makgoba ao a belegetšwego ntlong ya gagwe, le ona a ka ja dijo tša gagwe.
12 Ge morwedi wa moperisita a ka nyalwa ke monna yo e sego moperisita, a se ke a ja dilo tše kgethwa tšeo di neetšwego.
13 Eupša ge morwedi wa moperisita e ka ba mohlologadi goba a hlalwa pele a eba le bana, gomme a boela ntlong ya tatagwe, a ka ja tše dingwe tša dijo tša tatagwe. Eupša go se be le motho yo e sego wa leloko la baperisita yo a di jago.
14 “‘Ge motho a ka ja selo se sekgethwa ka phošo, gona a tle a bušetše selo seo a se jelego go moperisita, gomme a oketše ka karolo ya bohlano ya selo seo.
15 Ka gona baperisita ba se ke ba šilafatša dilo tše kgethwa tšeo Baisiraele ba di neelago go Jehofa,
16 gomme batho ba otlwa ka ge baperisita ba ba dumeletše go ja dilo tša bona tše kgethwa. Ka gobane ke nna Jehofa yo dirago gore e be ba bakgethwa.’”
17 Jehofa a tšwela pele a bolela le Moshe a re:
18 “Botša Arone le barwa ba gagwe gotee le Baisiraele ka moka o re: ‘Ge Moisiraele goba motho yo e sego Moisiraele yo a dulago mo go lena, a tliša sebego sa gagwe sa keno goba sa go ithaopa e le sebego sa go fišwa go Jehofa,
19 gona a tliše seruiwa se setona seo se phetšego gabotse go tšwa mohlapeng wa dikgomo, wa dinku, goba wa dipudi, e le gore Modimo a amogele sehlabelo sa gagwe.
20 Le se ke la neela seruiwa le ge e le sefe seo se nago le bosodi ka gobane se tla dira gore le se amogelwe.
21 “‘Ge motho a ka tlišetša Jehofa sehlabelo sa go dira khutšo le yena e le gore a phethe keno goba e le sehlabelo sa go ithaopa, gona a tliše seruiwa seo se phetšego gabotse go tšwa mohlapeng wa gagwe wa dikgomo, wa dinku goba wa dipudi, e le gore se tle se amogelwe. Se se ke sa ba le bosodi le ge e le bofe.
22 Le se ke la neela sebego ka seruiwa seo se foufetšego, seo se gobetšego, seo se nago le ntho, seo se nago le sešo seo se tšwago boladu, seo se tšwilego lekhwekhwe, goba seo se tšwilego dipudi. Le se ke la neela sebego sa mohuta wo go Jehofa goba la direla Jehofa sebego sa mohuta wo godimo ga aletare.
23 Ge e le poo goba nku yeo e nago le setho se setelele kudu go feta se sengwe goba se se kopana kudu go feta se sengwe, o ka e dira sebego sa go ithaopa, eupša e ka se amogelwe e le sebego sa go phetha keno.
24 Eupša le se ke la neela Jehofa phoofolo yeo dithaka tša peu ya yona di gobetšego, di kgatletšwego, di fagotšwego goba di ripilwego, le se ke la e neela nageng ya gabo lena.
25 Motho yo e sego Moisiraele yo a dulago nageng ya gabo lena, a se ke a neela le ge e le efe ya diruiwa tše go Modimo wa lena, ka gobane se golofetše e bile se na le bosodi. Nka se se amogele.’”
26 Jehofa a tšwela pele a bolela le Moshe a re:
27 “Ge namane goba nku e tona e nyenyane goba putšanyana e ka tswalwa, gona e tšwele pele e dula le mmago yona ka matšatši a šupago, eupša go tloga ka letšatši la seswai go ya pele e tla amogelwa e le sebego sa go fišwa ka mollo seo se direlwago Jehofa.
28 Ge e le poo le nku, le se ke la di hlaba ka letšatši letee le bana ba tšona.
29 “Ge le direla Jehofa sehlabelo sa go leboga, le se dire ka tsela yeo e tla dirago gore a le amogele.
30 Se jewe ka lona letšatši leo. Le se ke la šadiša selo le ge e le sefe sa sona go fihla mesong. Ke nna Jehofa.
31 “Le kwe melao ya ka gomme le e latele. Ke nna Jehofa.
32 Le se ke la šilafatša leina la ka le lekgethwa, e le gore Baisiraele ba tle ba tsebe gore ke nna yo mokgethwa. Ke nna Jehofa yo a dirago gore le be ba bakgethwa,
33 yena yo a le ntšhitšego nageng ya Egepeta e le gore ke le bontšhe gore ke nna Modimo wa lena. Ke nna Jehofa.”
