Lefitiko 25:1-55
25 Jehofa a tšwela pele a bolela le Moshe Thabeng ya Sinai a re:
2 “Botša Baisiraele o re: ‘Mafelelong ge le fihla nageng yeo ke le neago yona, le khutšiše naga yeo, gomme le boloke sabatha ya Jehofa.
3 Le bjale peu mašemong a lena le be le thenele dirapa tša lena tša diterebe ka mengwaga e tshelelago, e bile le bune mašemo a lena.
4 Eupša ka ngwaga wa bošupa e be sabatha ya gore naga e khutše, e lego sabatha ya Jehofa. Le se ke la bjala peu mo mašemong a lena, e bile le se ke la thenela dirapa tša lena tša diterebe.
5 Le se ke la buna mabele ao a metšego ka morago ga gore le bune, e bile le se ke la kgobela diterebe tša mehlare yeo e sego ya thenelwa. E be ngwaga wa gore naga e khutše.
6 Eupša le ka ja dijo tšeo naga e tlago go di tšweletša ka sabatha ya yona. Di jewe ke lena, makgoba a lena, batho bao le ba hirilego, le batho bao e sego Baisiraele bao ba dulago le lena.
7 Le gona di jewe ke diruiwa tša lena le diphoofolo tšeo di lego nageng ya lena. Dilo ka moka tšeo di tšweletšwago ke naga yeo di jewe.
8 “‘Le bale mengwaga e šupago ya disabatha, mengwaga e šupago e balwe gašupa, gomme matšatši a mengwaga yeo e šupago ya disabatha e tla ba mengwaga e 49.
9 Ke moka le leletšeng lenaka godimo ka letšatši la lesome la kgwedi ya bošupa. Ka Letšatši la go Lebalelwa Dibe,* le letšeng lenaka gore le kwagale nageng ya lena ka moka.
10 Le tsebatšeng ngwaga wa bo-50 e le o mokgethwa, e bile le botše badudi ka moka ba nageng gore go na le tokologo. E tla ba Ngwaga wa Tokologo* mo go lena gomme yo mongwe le yo mongwe a boele nageng ya gabo le lapeng la gabo.
11 Ngwaga woo wa bo-50 e tla ba Ngwaga wa Tokologo go lena. Le se ke la bjala peu goba la buna mabele ao a metšego ka morago ga gore le bune mašemong a lena, goba la kgobela diterebe tša mehlare yeo e sego ya thenelwa,
12 ka gobane ke Ngwaga wa Tokologo. E be ngwaga o mokgethwa mo go lena. Mo mašemong le jeng tšeo naga e di tšweletšago.
13 “‘Ka Ngwaga wa Tokologo yo mongwe le yo mongwe a boele nageng ya gagwe.
14 Ge e ba o ka rekišetša motho yo mongwe selo se sengwe goba ge o ka reka selo se sengwe go yena, le se ke la ropana.
15 Ge motho a go rekišetša naga, o swanetše go nagana ka mengwaga yeo e šetšego pele e eba Ngwaga wa Tokologo. A go rekišetše yona go ya ka palo ya mengwaga yeo e šetšego pele le ka buna mašemo a lena.
16 Ge e ba go sa šetše mengwaga e mentšhi, a oketše theko ya yona, gomme ge e ba go šetše mengwaga e sego kae, a fokotše theko ya yona, ka gobane o go rekišetša tekanyo ya mabele ao naga yeo e ka a tšweletšago.
17 Le se ke la ropa batho ba bangwe, le boife nna Modimo wa lena ka gobane ke nna Jehofa Modimo wa lena.
18 Ge le ka latela ditaelo tša ka gomme la phela ka melao ya ka, le tla dula le šireletšegile mo nageng.
19 Naga e tla tšweletša dienywa tša yona gomme lena la ja la khora, la ba la dula go yona le šireletšegile.
20 “‘Eupša le se ke la tshwenyega gomme la re: “Re tlo ja’ng ka ngwaga wa bošupa ka ge e le mo re ka se bjale peu goba ra buna?”
21 Ka gobane ke tla le šegofatša ngwageng wa botshelela, gomme naga e tla tšweletša mabele a mengwaga e meraro.
22 Le ge le ka bjala peu ka ngwaga wa seswai, le tla tšwela pele le eja mabele ao le a bunnego ka ngwaga wa botshelela go fihla ka ngwaga wa senyane. Le tla tšwela pele le eja mabele ao go fihlela le bunne a maswa.
23 “‘Le se ke la rekišetša naga sa ruri ka gobane ke ya ka. Ka gobane go ya ka nna, lena le no swana le batšwantle.
24 Nageng ka moka yeo le tlago go dula go yona, motho yo a rekišago naga o tla ba le tshwanelo ya go e reka gape gore e be ya gagwe.
25 “‘Ge e ba motho yo mongwe a ka diila gomme a swanelwa ke go rekiša naga ya gagwe, yo mongwe wa batho bao ba tswalanago le yena kgauswi o swanetše go tla gomme a mo rekele naga yeo a e rekišitšego.
26 Motho yo a se nago yo a tswalanago le yena kgauswi gore a reke naga yeo e boele e be ya gagwe, eupša ka morago a hwetša tšhelete e lekanego gore a ka e reka gape,
27 gona a bale go tloga ka ngwaga wo a e rekišitšego ka wona gomme tšhelete yeo e šetšego a e bušetše go motho yo a mo rekišeditšego yona, ke moka yena a boele go yona.
28 “‘Eupša ge a sa hwetše tšhelete e lekanego yeo a ka e neago motho yo a mo rekišeditšego yona, naga yeo a e rekišitšego e dule e le ya motho yo a e rekilego go fihla ka Ngwaga wa Tokologo. Ke moka naga yeo e tla bušetšwa go yena ka Ngwaga wa Tokologo gomme a boela go yona.
29 “‘Ge e ba motho a ka rekiša ntlo ya gagwe yeo e lego motseng o ageleditšwego ka maboto, gona o tla dula a na le tshwanelo ya go e reka gape go fihlela ngwaga woo a e rekišitšego ka wona o fela.
30 Eupša ge e ba e ka se rekwe gape pele ngwaga o fela, gona ntlo yeo e lego motseng wo o agaleditšwego ka maboto, e tla ba thoto ya sa ruri ya motho yo a e rekilego go iša melokong ya gagwe ka moka. Ka Ngwaga wa Tokologo ga se ya swanelwa go lokollwa.
31 Eupša ge e ba ntlo yeo e rekišwago e se motseng wo o ageleditšwego ka maboto, e tla rekwa gape ka nako le ge e le efe go no swana le ge go dirwa bjalo ka naga. E swanetše go dula e na le tshwanelo ya go rekwa gape. Eupša ge e ba e ka se rekwe gape, e swanetše go lokollwa ka Ngwaga wa Tokologo.
32 “‘Ge e le Balefi, ba tla dula ba na le tshwanelo ya go reka gape dintlo tša metseng ya bona.
33 Ge naga ya Balefi e se ya rekwa gape, gona ntlo yeo e lego metseng ya Balefi e tla lokollwa ka Ngwaga wa Tokologo, ka gobane dintlo tšeo di lego metseng ya Balefi ke tša bona mo nageng ya Baisiraele.
34 Le gona mafelo ao diruiwa di fulago go ona go dikologa metse ya bona a se ke a rekišwa, ka gobane ke bohwa bja bona go ya go ile.
35 “‘Ge e ba motho yo mongwe yo a dulago kgauswi le wena a diila gomme a sa kgone go reka dilo tšeo a di hlokago, gona o mo thuše gore a tšwele pele a phela go swana le ge o be o tla thuša motho yo a tšwago nageng e nngwe yoo a dulago moo.
36 O se ke wa re ge o adimile motho selo se sengwe, wa re a se buše se oketšegile. O swanetše go boifa Modimo wa gago, gomme motho yoo o tla tšwela pele a phela a na le wena.
37 O se ke wa mo adima tšhelete gomme wa nyaka gore a e buše e oketšegile, le gona o se ke wa mo rekišetša dijo gore o hwetše tšhelete e nngwe.
38 Ke nna Jehofa Modimo wa lena yo a le ntšhitšego nageng ya Egepeta gore ke le nee naga ya Kanana, e le gore ke bontšhe gore ke nna Modimo wa lena.
39 “‘Ge e ba motho yo mongwe yo a dulago kgauswi le wena a ka diila gomme a go kgopela gore o mo reke gore e be lekgoba la gago, o se ke wa mo gapeletša go dira mošomo wa makgoba.
40 O mo sware bjalo ka motho yo o mo hirilego goba motho yo e sego Moisiraele yo a dulago mo go lena. A go hlankele go fihlela ka Ngwaga wa Tokologo.
41 Ke moka o tla go tlogela gomme a boela go batho ba gabo a na le bana ba gagwe. O swanetše go boela nageng ya borakgolokhukhu ba gagwe.
42 Ka gobane Baisiraele ke makgoba a ka ao ke a ntšhitšego nageng ya Egepeta. Ba se ke ba ithekiša ka tsela yeo lekgoba le rekišwago ka yona.
43 O se ke wa ba swara gampe, le gona o boife Modimo wa gago.
44 Makgoba a lena a banna le a basadi e be ao a tšwago ditšhabeng tšeo di le dikologilego, le ka reka lekgoba la monna goba la mosadi ditšhabeng tšeo.
45 Le gona le ka reka makgoba moo go batšwantle bao ba dulago le lena le go bana ba bona bao ba belegetšwego mo nageng ya lena, gomme e tla ba makgoba a lena.
46 Le ka a fetišetša go bana ba lena e le bohwa bja go ya go ile. Le ka a diriša gore a le šomele, eupša le se ke la swara Baisiraele ba gabo lena gampe.
47 “‘Eupša ge e ba motho yo e sego Moisiraele yo a dulago nageng ya gabo lena a ka huma, mola Moisiraele yo mongwe a diila gomme a swanelwa ke go ithekiša go motho yo e sego Moisiraele yo a dulago le lena, goba a ithekiša go yo mongwe wa bana ba motho yoo,
48 gona o tla dula a na le tshwanelo ya gore a rekwe gape ge a ithekišitše. Yo mongwe wa banababo a ka mo reka gape.
49 Goba a ka rekwa gape ke rangwane wa gagwe goba ramogolo wa gagwe, goba morwa wa rangwane wa gagwe goba wa ramogolo wa gagwe, goba a rekwa ke motho yo a tswalanego le yena kgauswi, e lego yo mongwe wa gabo.
“‘Goba ge e ba a ka huma, gona a ka itheka gape gore a lokologe.
50 A bale mengwaga go tloga ka ngwaga woo a ithekišitšego ka wona go fihla ka Ngwaga wa Tokologo. A dire seo a na le motho yo a mo rekilego, gomme tšhelete yeo a rekilwego ka yona e lekane le palo ya mengwaga yeo. Nakong yeo, matšatši a gagwe a go šoma a lekane le a motho yo a hirilwego.
51 Ge e ba go sa šetše mengwaga e mentšhi, gona a patele tšhelete yeo a bego a rekilwe ka yona go ya ka mengwaga yeo e sa šetšego.
52 Eupša ge e ba go šetše mengwaga e sego kae gore e be Ngwaga wa Tokologo, gona a ipalele yona gomme a mo patele tšhelete yeo a bego a tla rekwa gape ka yona gore a lokologe go ya le ka mengwaga yeo.
53 Ge feela a sa šomela mong wa gagwe, o swanetše go swarwa bjalo ka motho yo a hirilwego gomme a se ke a swarwa gampe.
54 Eupša ge e ba a ka se kgone go itheka gape ka tsela ye, gona yena le bana ba gagwe ba lokollwe ka Ngwaga wa Tokologo.
55 “‘Ka gobane Baisiraele ke makgoba a ka. Ke makgoba a ka ao ke a ntšhitšego nageng ya Egepeta. Ke nna Jehofa Modimo wa lena.
Mengwalo ya tlase
^ Goba “Letšatši la Poelano.”
^ Goba “Ngwaga wa Khunologo.” Bona Tlhaloso ya Mantšu.
