Lefitiko 26:1-46
26 “‘Le se ke la itirela medimo le ge e le efe. Medimo yeo ka moka, ga e na mohola. Le se ke la bea seswantšho seo se betlilwego, kokwane e kgethwa, goba leswika leo le betlilwego nageng ya lena gore le tle le di rapele, ka gobane ke nna Jehofa Modimo wa lena.
2 Le boloke disabatha tša ka gomme le hlomphe sekgethwa sa ka. Ke nna Jehofa.
3 “‘Ge e ba le ka kwa melao ya ka le go phela ka ditaelo tša ka,
4 gona ke tla le nešetša dipula ka nako ya gona, gomme naga ya tšweletša dienywa tša yona, le mehlare ya naga ya enywa dienywa tša yona.
5 Puno ya lena e tla ba e ntšhi moo e lego gore le tla be le sa fola mabele ge go fihla nako ya go fula diterebe, e bile le tla be le sa fula diterebe ge go fihla nako ya go bjala peu. Le tla ja senkgwa la khora, la ba la dula le šireletšegile nageng ya lena.
6 Ke tla dira gore go be le khutšo nageng, e bile ga go na motho yo a tlago go le tšhoša ge le robetše. Ke tla fediša dibata tše šoro mo nageng, e bile ga go na motho yo a tlago go le hlasela ka tšhoša mo nageng ya lena.
7 Le tla rakediša manaba a lena gomme la a fenya ka tšhoša.
8 Ba bahlano go lena ba tla rakediša ba 100, gomme ba 100 go lena ba rakediša ba 10 000 (dikete tše lesome), e bile le tla fenya manaba a lena ka tšhoša.
9 “‘Ke tla le šegofatša gomme ka dira gore le be ba bantšhi mo nageng, e bile ke tla phetha kgwerano yeo ke e dirilego le lena.
10 Le tla ja mabele a ngwaga o fetilego, gomme le tla swanelwa ke go ntšha a kgale e le gore le tsenye a maswa.
11 Ke tla bea taberenakele ya ka mo gare ga lena gomme nka se le lahle.
12 Ke tla ba le lena, ka ba Modimo wa lena gomme lena la ba batho ba ka.
13 Ke nna Jehofa Modimo wa lena yo a le ntšhitšego nageng ya Egepeta gore le se sa ba makgoba a Baegepeta, ka roba joko ya lena gomme ka dira gore le be setšhaba seo se lokologilego.
14 “‘Eupša ge e ba le ka se ntheetše goba la se phele ka melao ye ya ka ka moka,
15 le gona ge e ba le ka gana ditaelo tša ka, la šišimišwa ke melao ya ka ka moka gomme la se e latele, e bile la se boloke kgwerano ya ka,
16 gona ke tla le otla ka go dira gore le boife ka baka la bolwetši bja mafahla le bolwetši bja go fiša kudu, ka dira gore mahlo a lena a se sa bona gabotse, gomme ka dira gore le felelwe ke matla. Le tla bjalela peu ya lena lefeela ka gobane manaba a lena a tla ja tšeo le di bjetšego.
17 Ke tla le galefela, gomme manaba a lena a tla le fenya. Bao ba le hloilego ba tla le gatelela, gomme le tla tšhaba le ge go se na motho yo a le kitimišago.
18 “‘Le ge dilo tše di sa le dire gore le ntheetše, ke tla le otla gašupa go feta peleng ka baka la dibe tša lena.
19 Ke tla dira gore le se sa ba le kgang e bile le se sa ikgantšha. Ke tla tswalela magodimo gore a se sa le nešetša pula,* gomme ka dira gore lefase le se sa tšweletša dimela.*
20 Le tla šomela lefeela ka gobane naga ya lena e ka se tšweletše tšeo le di bjetšego, gomme mehlare ya lena e ka se tšweletše dienywa.
21 “‘Eupša ge e ba le no tšwela pele le dira dilo tšeo ke rego le se ke la di dira e bile le gana go ntheetša, gona ke tla le otla gašupa go feta peleng ka baka la dibe tša lena.
22 Ke tla romela dibata go lena gomme tša bolaya bana ba lena, tša fetša diruiwa tša lena, tša ba tša le fokotša, e bile ditsela tša lena di tla senywa.
23 “‘Le ge ke le dira dilo tše eupša le sa nyake go fetoga, gomme le no tšwela pele le dira dilo tšeo ke rego le se ke la di dira,
24 gona le nna ke tla le hlanogela, ka le otla gašupa ka baka la dibe tša lena.
25 Ke tla itefeletša ka go dira gore manaba a lena a le hlasele, ka gobane ga se la boloka kgwerano yeo ke e dirilego le lena. Ge le tšhabela metseng ya lena, nna ke tla romela bolwetši gare ga lena, gomme manaba a lena a tla le fenya.
26 Ge ke le bolaiša tlala, gona basadi ba lesome ba tla le apeela senkgwa ka sebešo setee, gomme ba le kalela sona ba le nea se senyenyane. Le tla se ja, eupša le ka se khore.
27 “‘Eupša ge e ba le ka se ntheetše le ge le ka welwa ke dilo tše, e bile le no tšwela pele le dira dilo tšeo ke rego le se ke la di dira,
28 gona ke tla le hlanogela le go feta, gomme ke tla swanelwa ke go le otla gašupa ka baka la dibe tša lena.
29 Ka gona, le tla swanelwa ke go ja ditopo tša barwa ba lena le tša barwedi ba lena.
30 Ke tla fediša mafelo ao le rapelago medimo ya lena ya maaka* go wona, ka senya aletare yeo le dirago diorelo go yona, ka lahlela ditopo tša lena godimo ga medingwana ya lena e šišimišago yeo e sa phelego, ke tla le hlanogela ka gobane le ntšhišimiša.
31 Ke tla fediša metse ya lena le mafelo ao le rapelago go ona, gomme monkgo wa dihlabelo tša lena o ka se sa nthabiša.
32 Nna ke tla dira gore naga ya lena e be marope, gomme manaba a lena ao a dulago go yona a tla e lebelela a maketše.
33 Lena ke tla le gašanya gare ga ditšhaba, gomme ka dira gore manaba a lena a tle a lwe le lena ka tšhoša. E bile naga ya lena e tla fetoga marope, gomme metse ya lena ya senywa.
34 “‘Ge le le nageng ya manaba a lena, naga ya lena e tla khutša ka gobane e be e sa ka ya khutša. Ka nako yeo naga e tla khutša, ka ge e swanetše go boloka disabatha tšeo e sa kago ya di boloka.
35 Nakong ka moka ya ge naga ya lena e le marope e tla khutša, ka gobane ge le be le dula go yona ga se la ka la boloka molao wa sabatha. Ga se la ka la dira gore naga e khutše.
36 “‘Ke tla dira gore ba bangwe ba lena bao ba lego dinageng tša manaba a lena, ba tšhoge kudu. Le gona modumo wa matlakala ao a hlohloregago o tlo dira gore ba tšhabe. Ba tla tšhaba bjalo ka ge eka ba rakedišwa ke motho yo a swerego tšhoša, gomme ba wa go se na motho yo a ba rakedišago.
37 Le tla gatana bjalo ka ge eka le rakedišwa ke motho yo a swerego tšhoša, le ge go se na yo a le rakedišago. Le ka se kgone go lwa le manaba a lena.
38 Le tla hwela gare ga ditšhaba, la hwela nageng ya manaba a lena.
39 Ba bangwe ba lena bao ba tlago go phologa, ba tla tlaišega dinageng tša manaba a lena ka baka la molato wa bona, le ka baka la melato ya botatago bona.
40 Ke moka ba tla ipobola gore bona le botatago bona, ba ile ba no tšwela pela ba sa kwe melao ya ka, ba se tshepege gomme ba ntirela sebe.
41 Seo se ile sa dira gore le nna ke ba hlanogele gomme ke ba iše nageng ya manaba a bona.
“‘Mohlomongwe ka nako yeo ba* tla ikokobetša, gomme ba tla patela molato wa bona.
42 Ke tla gopola kgwerano yeo ke e dirilego le Jakobo, yeo ke e dirilego le Isaka, le yeo ke e dirilego le Aborahama. Le gona, nka se lebale naga yeo ke tshepišitšego go le nea yona.
43 Nakong ya ge le tla be le sa dule nageng ya lena, naga yeo e tla ba marope gomme e tla khutša ka gobane ga se ya ka ya khutša. Ka nako yeo, le tla be le patela molato wa lena ka gobane le ganne go kwa melao ya ka e bile la šišimišwa ke ditaelo tša ka.
44 Eupša le ge tše ka moka di direga, ge le le nageng ya manaba a lena, nna nka se tsoge ke le ganne goba go le lahla moo ke tla feleletšago ke le fedišitše, e lego seo se tlago go dira gore ke se boloke kgwerano ya ka le lena, ka gobane ke nna Jehofa Modimo wa lena.
45 Ke tla gopola kgwerano yeo ke e dirilego le borakgolokhukhu ba lena ka baka la lena, e lego bao ke ba ntšhitšego nageng ya Egepeta ditšhaba di ba lebeletše, e le gore ke bontšhe gore ke nna Jehofa Modimo wa bona.’”
46 Ye ke melao le ditaelo tšeo Jehofa a di neilego Baisiraele kua Thabeng ya Sinai a diriša Moshe.
Mengwalo ya tlase
^ Phetolelo ya lentšu ka lentšu e re, “ke tla dira gore magodimo a lena a swane le tshipi.”
^ Phetolelo ya lentšu ka lentšu e re, “ka dira gore lefase la lena le swane le koporo.”
^ Phetolelo ya lentšu ka lentšu e re, “ke tla fediša mafelo a lena a phagamego.”
^ Phetolelo ya lentšu ka lentšu e re, “dipelo tša bona tšeo di sego tša bolla.”
