Lefitiko 3:1-17
3 “‘Ge e ba motho a neela Jehofa kgomo e tona goba e tshadi e le sehlabelo sa go dira khutšo le Modimo,* gona o swanetše go neela yeo e phetšego gabotse.
2 A bee seatla sa gagwe godimo ga hlogo ya kgomo yeo a tlago go e neela e le sebego, gomme e hlabelwe kgauswi le mojako wa taberenakele. Barwa ba Arone bao e lego baperisita ba foketše madi a yona mahlakoreng ka moka a aletare.
3 Motho yoo a neele Jehofa dilo tše di latelago e le karolo ya sehlabelo sa go dira khutšo le yena sa go fišwa ka mollo: Lekhura leo le khupeditšego mala, makhura ka moka ao a lego maleng,
4 le dipshio tše pedi gotee le makhura ao a lego godimo ga tšona. A tloše lekhura leo le lego sebeteng gotee le dipshio.
5 Barwa ba Arone ba se beše se thunye muši aletareng godimo ga sebego sa go fišwa seo se lego godimo ga dikgong tšeo di lego mollong. Ke sebego seo se thunyago muši wo o nkgago bose wo o yago go Jehofa.
6 “‘Ge e ba a neela Jehofa nku goba pudi e tona goba e tshadi e le sehlabelo sa go dira khutšo le yena, gona a tliše yeo e phetšego gabotse.
7 Ge e ba sebego sa gagwe e le nku e tona, gona a e tliše pele ga Jehofa.
8 A bee seatla sa gagwe godimo ga hlogo ya phoofolo yeo e tlago go neelwa e le sebego gomme e hlabelwe pele ga taberenakele. Barwa ba Arone ba foketše madi a yona mahlakoreng ka moka a aletare.
9 A neele Jehofa lekhura e le sehlabelo sa go dira khutšo le yena sa go fišwa ka mollo. Mo kgauswi le lerapo la mokokotlo, a tloše mosela ka moka o nonnego, lekhura leo le khupeditšego mala, makhura ka moka ao a lego maleng,
10 le dipshio tše pedi gotee le makhura ao a lego godimo ga tšona. A tloše le lekhura leo le lego sebeteng gotee le dipshio.
11 Moperisita a e beše e thunye muši e le aletareng gore e be dijo, e be sebego sa go fišwa ka mollo seo se direlwago Jehofa.
12 “‘Ge e ba sebego sa gagwe e le pudi, gona a e tliše pele ga Jehofa.
13 A bee seatla sa gagwe godimo ga hlogo ya yona gomme e hlabelwe pele ga taberenakele. Ke moka barwa ba Arone ba foketše madi a yona mahlakoreng ka moka a aletare.
14 Karolo yeo a tlago go e neela Jehofa e le sebego sa go fišwa ka mollo e be lekhura leo le khupeditšego mala, makhura ka moka ao a lego maleng,
15 le dipshio tše pedi gotee le makhura ao a lego godimo ga tšona. A tloše le lekhura leo le lego sebeteng gotee le dipshio.
16 Moperisita a e beše e thunye muši e le aletareng gore e be dijo, e be sebego sa go fišwa ka mollo seo se nkgago bose. Makhura ka moka ke a Jehofa.
17 “‘Molao wa go ya go ile melokong ya lena ka moka kae le kae moo le dulago gona šo: Le ka mohla le se ke la ja makhura le ge e le afe goba madi le ge e le afe.’”
Mengwalo ya tlase
^ Goba “sehlabelo sa mohlakanelwa.”
