Numeri 29:1-40
29 “‘Letšatšing la pele la kgwedi, ka kgwedi ya bošupa le sware kopano e kgethwa. Le se ke la dira mošomo le ge e le ofe o boima. Ka letšatši leo le letše diphalafala.
2 Le neele sebego sa go fišwa sa monkgo o bose wo o yago go Jehofa sa powana e tee, nku e tona le dikwana tše tona tše šupago tšeo e nngwe le e nngwe e nago le ngwaga o tee, gomme ka moka e be tšeo di phetšego gabotse.
3 Sebego sa tšona sa mabele sa folouru yeo e šitšwego gabotse yeo e tswakilwego ka makhura e be folouru ya dikhilograma tše e ka bago tše tharo le seripa bakeng sa poo le folouru ya dikhilograma tše e ka bago tše pedi bakeng sa nku e tona,
4 gotee le folouru ya mo e ka bago khilograma e tee bakeng sa kwana e nngwe le e nngwe e tona ya dikwana tše šupago.
5 Le neele le phookwana ya sebego sa sebe e le gore Modimo a le lebalele dibe.
6 Dilo tše di neelwe go oketša go sebego sa go fišwa sa kgwedi le kgwedi le sebego sa sona sa mabele gotee le sebego seo se dirwago ka mehla sa go fišwa le sebego sa sona sa mabele gotee le dibego tša tšona tša dino. Di neelwe go ya ka mokgwa wo di dirwago ka wona ka mehla e le sebego sa go fišwa sa monkgo o bose wo o yago go Jehofa.
7 “‘Ka letšatši la lesome la kgwedi ye ya bošupa le sware kopano e kgethwa, gomme le bontšhe gore le nyamile ka baka la dibe tša lena. Le se ke la dira mošomo le ge e le ofe.
8 Le neele Jehofa sebego sa go fišwa seo se nkgago bose sa powana e tee, nku e tee e tona le dikwana tše tona tše šupago tšeo e nngwe le e nngwe e nago le ngwaga o tee, gomme ka moka e be tšeo di phetšego gabotse.
9 Ke moka dibego tša tšona tša mabele tša folouru yeo e šitšwego gabotse yeo e tswakilwego ka makhura, e be folouru ya mo e ka bago dikhilograma tše tharo le seripa bakeng sa poo le folouru ya mo e ka bago dikhilograma tše pedi bakeng sa nku e tona,
10 gotee le folouru ya mo e ka bago khilograma bakeng sa kwana e nngwe le e nngwe e tona ya dikwana tše šupago.
11 Le neele le putšanyana e tee ya sebego sa sebe go oketša go sebego sa sebe seo se neelwago letšatšing la ge le lebalelwa dibe, le sebego seo se neelwago ka mehla sa go fišwa le sebego sa sona sa mabele gotee le dibego tša tšona tša dino.
12 “‘Ka letšatši la bo-15 la kgwedi ya bošupa le sware kopano e kgethwa. Le se ke la dira mošomo le ge e le ofe o boima, le gona le keteke monyanya wa go hlompha Jehofa ka matšatši a šupago.
13 Sebego sa go fišwa ka mollo sa monkgo o bose wo o yago go Jehofa seo le tlago go se neela e be dipowana tše 13, dinku tše tona tše pedi le dikwana tše tona tše 14 tšeo e nngwe le e nngwe e nago le ngwaga o tee, gomme ka moka e be tšeo di phetšego gabotse.
14 Dibego tša tšona tša mabele tša folouru yeo e šitšwego gabotse yeo e tswakilwego ka makhura, e be folouru ya mo e ka bago dikhilograma tše tharo le seripa bakeng sa poo e nngwe le e nngwe ya dipoo tše 13, le folouru ya mo e ka bago dikhilograma tše pedi bakeng sa dinku tšeo tše tona tše pedi,
15 gotee le folouru ya mo e ka bago khilograma bakeng sa kwana e nngwe le e nngwe e tona ya dikwana tše 14.
16 Le neele le putšanyana ya sebego sa sebe go oketša go sebego sa go fišwa seo se neelwago ka mehla, sebego sa sona sa mabele le sebego sa sona sa dino.
17 “‘Ka letšatši la bobedi le neele dipowana tše 12, dinku tše tona tše pedi le dikwana tše tona tše 14 tšeo e nngwe le e nngwe e nago le ngwaga o tee, gomme ka moka e be tšeo di phetšego gabotse.
18 Le neele le dibego tša tšona tša mabele le dibego tša tšona tša dino bakeng sa dipoo, dinku tše tona le dikwana tše tona go ya ka palo ya tšona ka mokgwa wo di neelwago ka gona ka mehla.
19 Le gona le neele le putšanyana ya sebego sa sebe go oketša go sebego sa go fišwa seo se neelwago ka mehla, sebego sa sona sa mabele le sebego sa sona sa dino.
20 “‘Ka letšatši la boraro le neele dipoo tše 11, dinku tše tona tše pedi le dikwana tše tona tše 14 tšeo e nngwe le e nngwe e nago le ngwaga o tee, gomme ka moka e be tšeo di phetšego gabotse.
21 Le neele le dibego tša tšona tša mabele le dibego tša tšona tša dino bakeng sa dipoo, dinku tše tona le dikwana tše tona go ya ka palo ya tšona ka mokgwa wo di neelwago ka gona ka mehla.
22 Le gona le neele le pudi ya sebego sa sebe go oketša go sebego sa go fišwa seo se neelwago ka mehla, sebego sa sona sa mabele le sebego sa sona sa dino.
23 “‘Ka letšatši la bone le neele dipoo tše lesome, dinku tše tona tše pedi le dikwana tše tona tše 14 tšeo e nngwe le e nngwe e nago le ngwaga o tee, gomme ka moka e be tšeo di phetšego gabotse.
24 Le neele le dibego tša tšona tša mabele le dibego tša tšona tša dino bakeng sa dipoo, dinku tše tona le dikwana tše tona go ya ka palo ya tšona ka mokgwa wo di neelwago ka gona ka mehla.
25 Le gona le neele le putšanyana ya sebego sa sebe go oketša go sebego sa go fišwa seo se neelwago ka mehla, sebego sa sona sa mabele le sebego sa sona sa dino.
26 “‘Ka letšatši la bohlano le neele dipoo tše senyane, dinku tše tona tše pedi le dikwana tše tona tše 14 tšeo e nngwe le e nngwe e nago le ngwaga o tee, gomme ka moka e be tšeo di phetšego gabotse.
27 Le neele le dibego tša tšona tša mabele le dibego tša tšona tša dino bakeng sa dipoo, dinku tše tona le dikwana tše tona go ya ka palo ya tšona ka mokgwa wo di neelwago ka gona ka mehla.
28 Le gona le neele le pudi ya sebego sa sebe go oketša go sebego sa go fišwa seo se neelwago ka mehla, sebego sa sona sa mabele le sebego sa sona sa dino.
29 “‘Ka letšatši la botshelela le neele dipoo tše seswai, dinku tše tona tše pedi le dikwana tše tona tše 14 tšeo e nngwe le e nngwe e nago le ngwaga o tee, gomme ka moka e be tšeo di phetšego gabotse.
30 Le neele le dibego tša tšona tša mabele le dibego tša tšona tša dino bakeng sa dipoo, dinku tše tona le dikwana tše tona go ya ka palo ya tšona ka mokgwa wo di neelwago ka gona ka mehla.
31 Le gona le neele le pudi ya sebego sa sebe go oketša go sebego sa go fišwa seo se neelwago ka mehla, sebego sa sona sa mabele le sebego sa sona sa dino.
32 “‘Ka letšatši la bošupa le neele dipoo tše šupago, dinku tše tona tše pedi le dikwana tše tona tše 14 tšeo e nngwe le e nngwe e nago le ngwaga o tee, gomme ka moka e be tšeo di phetšego gabotse.
33 Le neele le dibego tša tšona tša mabele le dibego tša tšona tša dino bakeng sa dipoo, dinku tše tona le dikwana tše tona go ya ka palo ya tšona ka mokgwa wo di neelwago ka gona ka mehla.
34 Le gona le neele le pudi ya sebego sa sebe go oketša go sebego sa go fišwa seo se neelwago ka mehla, sebego sa sona sa mabele le sebego sa sona sa dino.
35 “‘Ka letšatši la seswai le sware kopano e kgethwa. Le se ke la dira mošomo le ge e le ofe o boima.
36 Sebego sa go fišwa ka mollo sa monkgo o bose wo o yago go Jehofa seo le tlago go se neela e be poo e tee, nku e tona le dikwana tše tona tše šupago tšeo e nngwe le e nngwe e nago le ngwaga o tee, gomme ka moka e be tšeo di phetšego gabotse.
37 Le neele le dibego tša tšona tša mabele le dibego tša tšona tša dino bakeng sa poo, nku e tona le dikwana tše tona go ya ka palo ya tšona ka mokgwa wo di neelwago ka gona ka mehla.
38 Le gona le neele le pudi ya sebego sa sebe go oketša go sebego sa go fišwa seo se neelwago ka mehla, sebego sa sona sa mabele le sebego sa sona sa dino.
39 “‘Le neele Jehofa dilo tše menyanyeng ya lena, go oketša go dibego tša lena tša dikeno, dibego tša lena tša go ithaopa tšeo le di neelago e le dibego tša lena tša go fišwa, dibego tša lena tša mabele, dibego tša lena tša dino le dihlabelo tša lena tša go dira khutšo le Modimo.’”
40 Moshe a botša Baisiraele dilo ka moka tšeo Jehofa a bego a mo laetše tšona.
