Numeri 35:1-34
35 Jehofa a tšwela pele a bolela le Moshe leganateng la Moaba kgauswi le Noka ya Jorodane kua Jeriko, a re:
2 “Botša Baisiraele gore ba nee Balefi metse yeo ba tlago go dula go yona gore e be bohwa bja bona, le gona ba nee Balefi mafelo ao diruiwa tša bona di tlago go fula go ona kgauswi le metse yeo.
3 Ba tla dula metseng yeo, gomme mafelo ao e tla ba moo go fulago diruiwa tša bona, le diphoofolo tše dingwe ka moka tša bona.
4 Mafelo a metse yeo ao le tlago go a nea Balefi, ao ba tlago go fudiša diruiwa tša bona go ona, a tla ba bokgoleng bja dimithara tšeo e ka bago tše 450* go tloga ka leboto la motse woo go o dikologa.
5 Ka ntle ga motse le meteng dimithara tšeo e ka bago tše 900 lehlakoreng la ka bohlabela, lehlakoreng la ka borwa le meteng dimithara tšeo e ka bago tše 900, lehlakoreng la ka bodikela le meteng dimithara tšeo e ka bago tše 900, gomme lehlakoreng la ka leboa le meteng dimithara tšeo e ka bago tše 900, ke moka motse o be mo gare. Ao e tla ba mafelo ao ba tlago go fudiša diruiwa metseng ya bona.
6 “Metse yeo le tlago go e nea Balefi e tla ba e tshela yeo motho a tlago go tšhabela go yona ge a latofatšwa ka gore o bolaile motho. Le gona le ba neeng le metse e mengwe e 42.
7 Metse ka moka yeo le tlago go e nea Balefi e be e 48, yona gotee le mafelo ao ba tlago go fudiša diruiwa go ona.
8 Metse yeo le tlago go ba nea yona e tla ba yeo e tšwago go bohwa bja Baisiraele. Go moloko wo o nago le metse e mentšhi le tšee e mentšhi, gomme go moloko wo o se nago metse e mentšhi, le tšee e menyenyane. Moloko o mongwe le o mongwe o nee Balefi e mengwe ya metse ya bona go ya le ka bohwa bjo ba bo hweditšego.”
9 Jehofa a tšwela pele a bolela le Moshe a re:
10 “Tshelang Noka ya Jorodane le yeng nageng ya Kanana.
11 Kgethang metse yeo go lego bonolo go fihla go yona gore e be metse yeo motho a ka tšhabelago go yona ge e ba a bolaile motho yo mongwe ka phošo.
12 Metse yeo le tla tšhabela go yona ge le tšhaba motho yo a nyakago go lefetša yo a bolailwego gore mmolai yoo a se ke a bolawa go fihlela setšhaba se mo ahlola.
13 Metse e tshelelago yeo le tlago go ba nea yona, ke yona yeo le tlago go tšhabela go yona.
14 Le kgethe metse e meraro ka bohlabela bja Noka ya Jorodane le metse e meraro nageng ya Kanana, gore e be moo motho a tlago go tšhabela gona.
15 Metse yeo e tshelelago e tla ba mo go tšhabelago Baisiraele le batho bao e sego Baisiraele. Metse yeo ke ya gore motho yo mongwe le yo mongwe yo a ka bolayago yo mongwe ka phošo a tšhabele gona.
16 “‘Eupša ge e ba a iteile motho ka selo sa tšhipi gomme a hwa, gona motho yoo ke mmolai. Mmolai yoo o swanetše go bolawa.
17 Ge e ba a ka mo foša ka leswika leo le ka bolayago motho gomme motho yoo a hwa, gona ke mmolai. Mmolai yoo o swanetše go bolawa.
18 Le gona, ge e ba a mo iteile ka selo sa kota seo se ka bolayago motho gomme a hwa, gona ke mmolai. Mmolai yoo o swanetše go bolawa.
19 “‘Motho yo a lefeletšago yo a bolailwego, ke yena a tlago go bolaya mmolai yoo. Ge molefetši yoo a ka kopana le yena, a mmolaye.
20 Ge e ba motho a hwile ka ge mmolai a be a mo kgoromeditše ka baka la ge a be a mo hloile, goba a mo foša ka selo gore a hwe,
21 goba ka baka la ge a be a mo hloile a mo itia ka feisi gomme a hwa, gona motho yo a mo iteilego a bolawe. Ke mmolai. Motho yo a lefetšago yo a bolailwego a bolaye mmolai yoo ge a kopana le yena.
22 “‘Eupša ge e ba motho a bolaile yo mongwe ka phošo, ke gore ge e ba a mo kgoromeditše goba a mo foša ka selo a se a ikemišetša go mo gobatša e bile a se a hloya motho yoo,
23 goba ge e ba a ka foša leswika a sa mmone gomme leswika leo la mmolaya e bile a be a se a mo hloya goba a be a sa nyake go mmolaya,
24 gona setšhaba se ahlole motho yo a iteilego yo mongwe le motho yo a lefetšago yo a bolailwego go ya ka melao ye.
25 Setšhaba se šireletše mmolai yoo go motho yo a lefetšago yo a bolailwego, gomme setšhaba se mmušetše motseng wa gabo wo go tšhabelwago go wona mo a bego a tšhabetše gona. A dule moo go fihlela moperisita yo a phagamego a ehwa.*
26 “‘Eupša ge e ba mmolai a ka tšwela ka ntle ga mollwane wa motse wa gabo wo go tšhabelwago go wona wo a bego a tšhabetše go wona,
27 ke moka motho yo a lefetšago yo a bolailwego a mo hwetša ka ntle ga mollwane woo gomme a mmolaya, gona ga a na molato wa madi.
28 Ka gobane mmolai yoo o swanetše go dula motseng wa gabo wo go tšhabelwago go wona go fihlela moperisita yo a phagamego a ehwa. Eupša ka morago ga gore moperisita yo a phagamego a hwe, mmolai yoo a ka boela nageng ya gabo.
29 Ye ke melao yeo le tlago go e latela ge le ahlola melokong ya lena ka moka kae le kae mo le dulago gona.
30 “‘Mang le mang yo a bolailego motho a bolawe ge go na le dihlatse tša gore ke yena a bolailego motho yoo, eupša a se ke a bolawa ge go na le hlatse e tee feela.
31 Le se ke la tšea tšhelete ya go lopolla mmolai yo a swanelwago ke go hwa, ka gobane o swanetše go bolawa.
32 Le se ke la tšea tšhelete ya go lopolla motho yo a tšhabilego motseng wa gabo wo go tšhabelwago go wona, gomme la mo dumelela gore a boele a dule nageng ya gabo pele moperisita yo a phagamego a ehwa.
33 “‘Le se ke la šilafatša naga yeo le dulago go yona, ka gobane madi a šilafatša naga, ka ge Modimo a ka se le lebalele dibe ge go ka tšhollwa madi mo nageng ntle le ge e ba mmolai yoo a ka bolawa.
34 Le se ke la šilafatša naga yeo le dulago go yona, e lego naga yeo ke dulago go yona, ka gobane nna Jehofa ke dula gare ga setšhaba sa Baisiraele.’”
Mengwalo ya tlase
^ Phetolelo ya lentšu ka lentšu e re, “dikubiti tše 1 000. Bona Dit. B14.”
^ Phetolelo ya lentšu ka lentšu e re, “moperesita yo a phagamego yo a bego a tloditšwe ka makhura a makgethwa a ehwa.”