Go Tloga go Beng Molaodi wa Mašole go ya go Beng ‘Mohlabani wa Kriste’

bjalo ka ge go anega Mark Lewis

“Thobela Mong’a-ka.” “Thobela Mohlomphegi.” Thobela Tona-kgolo.” Tše ke tše dingwe tša ditumedišo tšeo ke bego ke di diriša ge ke be ke le mofofiši wa sefofane le Molaodi-mogolo wa mašole a Royal Australian Air Force VIP. Ke be ke sepetša baemedi ba mmušo le bahlankedi ba mmušo ka sefofane go dikologa Australia le lefaseng ka bophara. Lega go le bjalo, gona bjale ke dira mošomo o putsago le go feta. Anke ke hlalose.

KE BELEGETŠWE kua Perth, ka Bodikela bja Australia ka 1951 gomme ka godišetšwa lapeng la sešole. Ge ke be ke e-na le nywaga e 15, ke ile ka tsenela sehlopha sa batho bao ba fofago ka difofane tšeo di se nago dientšene. Ye ke tsela yeo ke ilego ka thoma ka yona go fofa ka sefofane, e lego modiro woo ke ilego ka o dira ka nako e telele.

Kapejana ka morago ga moo, batswadi ba-ka ba ile ba kgaogana, gomme lapa la gešo la thubega. Molaodi-mogolo wa sehlopha sa mašole ao a fofago ka difofane tša ntwa le lapa la gagwe ba ile ba nkamogela gomme ka dula le bona ge ke be ke sa tsena sekolo se se phagamego. Mohlala wa gagwe o ile wa ntutueletša gore ke ithute go fofa ka difofane tša ntwa kua Royal Australian Air Force Academy.

Ke Ile ka Swanelegela go ba Mofofiši wa Sefofane

Ka morago ga nywaga e ka bago e tshela, ke ile ka aloga ke le lešole leo le fofago ka sefofane sa ntwa gomme ke e-na le degree ya tša thutamahlale le lengwalo leo le ntumelelago go fofiša sefofane. Mošomo wa-ka wa mathomo o be o akaretša go fofiša sefofane seo se bego se sepediša ditlabakelo tša mašole go dikologa Australia, Borwa bja Pacific le Borwa-bohlabela bja Asia. Gantši re be re fofa gare ga dithaba tše ditelele gomme re theogela meeding yeo e išago moo re bego re emiša difofane lefelong la go di emiša leo le nago le bjang. E be e le mošomo o kotsi. Sehlopha sa rena se ile sa lahlegelwa ke difofane tše mmalwa le batho ba nago le bokgoni nywageng yeo. Lega go le bjalo, masolo a rena a thušitše batho bao ba bego ba dula mafelong a lego lekatana. Re be re iša ditlabakelo tša go aga maporogo, diketepole tšeo di bego di dirišwa go aga ditsela, dijo le dilo tše dingwe tšeo di nyakegago nakong ya tšhoganetšo gaešita le dingaka le baoki. Le gona re be re sepetša batho bao ba babjago goba ba gobetšego maemong a tšhoganetšo.

Ka 1978, ke ile ka swanelegela go ba mohlahli wa bafofiši ba difofane gomme ka boela Sekolong sa go hlahla Bafofiši sa Mašole. Ge ke le moo, ke ile ka tsošološa segwera sa-ka le Diane, mohlologadi yo mofsa yo a nago le bana ba bararo. Ke be ke tsena le monna wa Diane ge re be re le Sekolong sa bofofiši eupša o ile a hwa kotsing ya sefofane. Ge ke be ke mo kgopela gore re nyalane, o ile a kgopela gore ke mo nee nako ya go naganišiša ka taba ye. O be a sa kgonthišege ge e ba a nyaka go nyalana le mofofiši yo mongwe gape.

Go sa dutše go le bjalo, ke ile ka amogela mošomo wa dikgwedi tše 12 wa go ba Moeletši wa ka Sephiring  wa Mmušiši-mogolo wa Australia. Go dula Ntlong ya Mmušo kua Canberra go ile gwa nthuša go kwešiša kamoo bophelo bja dipolitiki bo lego ka gona gomme gwa nnea sebaka sa go šoma kgaufsi le baetapele ba setšhaba, ba sešole le ba bodumedi. Ge mošomo wa-ka moo o fela, ke ile ka boela mošomong wa-ka bjalo ka mohlahli wa bafofiši. Kapejana ka morago ga moo, nna le Diane re ile ra nyalana ka 1980.

Ka 1982, ke ile ka amogela kabelo ya nywaga e mebedi ya go itlwaetša le mašole a United States Air Force bjalo ka mohlankedi wa tša tšhireletšego ya difofane le monyakišiši wa dikotsi tša difofane gomme go ile gwa romelwa lešole la United States go yo šoma legatong la-ka kua Australia. Mošomo woo o be o akaretša go fofa go dikologa United States le go fihla dinageng tša kgole tše swanago le Leboa la Ireland. O be o akaretša go nyakišiša ka dikotsi tša difofane le go lekodišiša tsela yeo difofane di dirwago le go fofišwa ka yona ka maikemišetšo a go kaonefatša tšhireletšego.

Go Boela Australia

Ka morago ga ge ke boetše Australia, lapa la rena le ile la oketšega gomme ra ba le bana ba bane ge morwedi wa rena e lego Kerry a be a belegwa. Ka baka la mošomo wa-ka, Diane e be e le mma le tate wa barwedi ba rena gomme bophelo bja lapa la rena bo be bo sa kgahliše. Nywaga e meraro ka morago ga moo, ke ile ka newa maemo a go ba molaodi wa sehlopha sa mašole sa Air Force VIP seo ke boletšego ka sona pejana. Ge Ntwa ya Kgogometšaneng ya Persia e thoma ka 1991, sehlopha sa-ka se ile sa thekga UN ntweng yeo, ke moka sa e thekga le go tše dingwe kua Pakistan, Afghanistan, Afrika le Isiraele.

Ka 1992, ke ile ka ba Mothuši wa Molaodi-mogolo wa Mašole. Go hlankela bjalo ka mothuši wa molaodi yo a phagamego kudu wa mašole kua Australia go nthušitše go kwešiša gakaone tswalano yeo e lego gona magareng ga mašole, dipolitiki le UN. Ke ile ka phetha ka gore UN e na le diphošo tše dintši. Lega go le bjalo, go be go bonala e le kholofelo e nnoši yeo re nago le yona ya gore go be le lefase le lekaone. Ke moka, diphetogo tšeo di bilego gona ka lapeng la-ka di ile tša dira gore ke fetoše pono ya-ka.

Dipotšišo tša Diane di a Arabja

Ka morago ga lehu la monna wa gagwe wa mathomo, Diane yo e bego e le Moroma Katholika, o ile a tsoma dikarabo tša dipotšišo tša gagwe eupša a se atlege. Lega go le bjalo, mathata a ile a gakala ge morwedi wa rena yo mogolo, Renee, a thoma go kgahlegela go ithuta ka ga matla a phagametšego a tlhago le maleatlana. Ge a be a le gabo mogwera wa gagwe, Diane o ile a bona kgatišo ya Phafoga! yeo e bolelago ka sehlogo se se tlago go latela seo se bolelago ka borapedi bja Sathane. * E be e le lekga la mathomo a bona Phafoga! Ge a be a le tseleng a e-ya gae, o be a ipotšiša gore, ‘Nka hwetša bjang kgatišo yeo?’

Ka morago ga matšatši a mararo, Dihlatse tša Jehofa di ile tša kokota legaeng la rena gomme Diane a hwetša makasine wa gagwe. Ka morago o ile a amogela thuto ya Beibele gomme a thoma go ya dibokeng tša Bokriste. Ke ile ka thabela gore o a ithuta gomme ka ba ka ya le yena dibokeng tše dingwe, eupša ke be ke sa nyake go ithuta Beibele. Ke be ke sa ipone ke le motho wa bodumedi. Ke be ke dumela go Modimo, eupša ke be ke bone boikaketši bjo bogolo kudu bodumeding moo ke ilego ka bona eka ga bo na mohola. Ka mohlala, ke be ke sa kwešiše lebaka leo ka lona baruti bao ba šomago le mašole ba ka kgothaletšago lerato le go ba le khutšo mola ba thekga ntwa.

Diane o be a tlogela dikopi tša Morokami le Phafoga! mafelong a itšego ka ntlong ka bohlale e le gore ke di bale. Ke ile ka bala tše dingwe tša tšona gomme ka di bušetša moo a bego a di beile ka šedi. Ke be ke sa nyake gore a nagane gore nka di kgahlegela. Ge tsebo ya-ka ya Beibele e dutše e gola, ke ile ka tshwenywa ke mangwalo a mabedi. Le lengwe e be e le Kutollo 19:17, 18 yeo e bolelago ka dinonyana tšeo di jago dinama tša “balaodi ba bahlabani.” Le lengwe e be e le Kutollo 17:3 yeo e bolelago ka “sebata sa mmala wa sekareleta.” Dihlatse di kwešiša sebata se e le leswao la UN, e lego pono yeo e bego e thulana le dikgopolo tša-ka ka mokgatlo woo wa ditšhaba-tšhaba. * Eupša ke ile ka leka go hlokomologa dipotšišo le ge e le dife tšeo ke bego ke e-na le tšona.

Ka 1993, Diane o ile a ntaletša gore ke be gona ge a kolobetšwa. Ke be ke sa letela taletšo ya gagwe. Ke ile ka mmotšiša gore, “Ge e ba o be o swanetše go kgetha, na o be o tla kgetha Jehofa goba nna?” O ile a araba ka gore: “Ke be ke tla kgetha Jehofa. Eupša  ke holofela gore nka se swanelwe ke go dira kgetho yeo. Ke le nyaka ka bobedi bophelong bja-ka.” Ke ile ka lemoga ka yona nako yeo gore ke swanetše go ithuta mo go oketšegilego ka motho yo yo mongwe yo e lego karolo ya bophelo bja gagwe. Mogolo wa Mokriste wa lefelong la gešo o ile a ithapela go ithuta Beibele le nna gomme ke ile ka dumela.

Ke ile ka ba le kgahlego e tseneletšego boporofeteng bja Beibele, kudu-kudu bjoo bo bolelago ka histori ya mašole le dipolitiki. Ka mohlala, nakong ya ge ke tlwaetšwa Sekolong sa Bafofiši, ke be ke ithutile ka katlego ya madira a Gerika ya bogologolo. Ga bjale ke ile ka ithuta gore karolo e kgolo ya histori yeo e be e ngwadilwe e sa le pele nywageng e makgolo go Daniele kgaolo 8. Ganyenyane-ganyenyane, boporofeta bjo gotee le bjo bongwe bo ile bja nkgodiša gore Beibele e buduletšwe ke Modimo.

Le gona, ke ile ka thoma go lebelela UN ka tsela e mpsha. Ke be ke tseba gore mašole a ka se rarolle mathata a batho, gore khutšo e ka se tlišwe ke tšhošetšo ya ntwa le gore UN e ka se rarolle dikarogano tša dipolitiki, tša bodumedi le setšhaba tšeo di bakago ntwa. Ke ile ka thoma go bona gore ke Modimo feela yo a ka rarollago mathata a batho. Ruri go be go bonala eka o šetše a thomile go dira bjalo borwarreng bja lefase ka bophara bja Dihlatse tša Jehofa. (Psalme 133:1; Jesaya 2:2-4) Ke ile ka ipotšiša gore, ‘Eupša na ke tla tlogela mošomo wa-ka wa bošole gomme ke hlankele Modimo?’

Go Emela Therešo ya Beibele

Ke ile ka swanelwa ke go dira phetho ka 1994 ge ke be ke ile kopanong ya selete ya Dihlatse tša Jehofa kua Sydney. Lenaneo la yona le be le akaretša terama yeo e theilwego Beibeleng ya moaparo wa mehleng ya Beibele, yeo e bego e gatelela kgetho yeo setšhaba sa bogologolo sa Isiraele se bego se swanetše go e dira ya magareng ga go hlankela Jehofa goba Baali, modimo wa Bakanana. Moporofeta wa Jehofa e lego Eliya o ile a hlohla Baisiraele ka gore: “Le tlo kxaotša neng xo hlotšetša ka dithokô tše pedi? Xe Modimo è le Morêna, xôna latêlang Yêna; xe Modimo è le Baali, xôna o lateleng.” (1 Dikxoši 18:21) Mantšu ao a ile a nkgoma pelo. Go etša Baisiraele, le nna ke be ke le phiri e mekoka mebedi. Ke be ke swanetše go dira kgetho: Na ke tla hlankela Jehofa goba ka tšwela pele ka mošomo wa-ka wa bošole?

Bošegong bjoo ge ke be ke otlela re lebile gae, ke ile ka botša Diane gore ke tla tlogela mošomo wa bošole gomme ka ba yo mongwe wa Dihlatse tša Jehofa. O ile a makatšwa ke phetho ya-ka yeo ke e dirilego go sa letelwa eupša o ile a nthekga ka mo go feletšego. Matšatši a mmalwa ka morago, phetho ya-ka e be e sa dutše e le bjalo, ka gona ka tsenya lengwalo la-ka la go tlogela mošomo.

Ka nako yeo ke be ke le Molaodi-mogolo wa mašole ao a Dutšego a Tlwaetšwa Sekolong sa Mašole kua Canberra, e lego motse-mošate. Ke be ke okamela tlwaetšo ya Mašole a Tlwaelegilego, a Lewatleng le ao a Fofago ka Difofane a ka bago 1 300. Letšatšing la mafelelo la sekolo, ke ile ka botša mašole ao a lego kgaufsi le go fetša dithuto tša ona le bahlahli ba bangwe gore ke tlogela bošole gomme ke ya go tsena ka ntlo le ntlo ke ruta batho Beibele ke le modiredi wa moithapi wa Mokriste. Tsebišo yeo e ile ya dira gore go be le dipoledišano tše di kgahlišago.

Go ba Modiredi wa Nako e Tletšego

Ke ile ka thoma modiro wa boboledi letšatši le le latelago ka morago ga ge ke tlogetše mošomo. Ka morago ga dikgwedi tše tharo, ka April 1995, ke ile ka kolobetšwa. Ke moka, gatee-tee ge sebaka se tšwelela, ke ile ka thoma go hlankela bjalo ka modiredi wa mmulamadibogo wa ka mehla e lego seo se bego se bolela gore ke tla fetša nako ya-ka e ntši ke le bodireding bja phatlalatša.

Go fetoga ga-ka go tloga go beng molaodi wa mašole go ya go beng ‘mohlabani wa Kriste’ go be go nyaka gore ke dire diphetogo tše dintši. (2 Timotheo 2:3) E nngwe ya dikabelo tša-ka tša mathomo e be e le go sepediša dimaekrofouno dibokeng tša Bokriste. Go e-na le go nea ba bangwe ditaelo, ke ile ka swanelwa ke go ithuta go kgopela go dira dilo tše itšego. Go naganela ba bangwe le lerato e ile ya ba dilo tša bohlokwa kudu go feta go dira dilo gabotse ka ntle le go senya nako le matla, gaešita le ge ka dinako tše dingwe ke sa dutše ke palelwa ke go leka-lekanya dika tše. Le gona, lapa la rena le ile la swanelwa ke go nolofatša bophelo ka baka la mogolo o monyenyane wo ke o hwetšago.

Ke ile ka thabela modiro wa boboledi e bile ke sa dutše ke o thabela. Ka letšatši le lengwe ge ke be ke nea bohlatse le morwedi wa rena wa nywaga e senyane  e lego Kerry, ke ile ka mo kgopela gore a šetše tsela yeo beng ba dintlo ba arabelago ka yona. Go se go ye kae, re ile ra lemoga gore batho ba bantši ba be ba se na kgahlego eupša ba bangwe ba be ba le botho e bile ba thabela. Seo se ile sa re kgothatša bobedi bja rena. Morwedi wa rena yo mongwe o ile a ithuta Beibele ka nakwana, eupša ga bjale o kgethile go se hlankele Jehofa.

Nna le Diane re ile ra kgothaletša Kerry gore a tsenele bodiredi bja nako e tletšego. Morago bjale ke sa tšwa go thabela tokelo ya go ya le yena Sekolong sa Tirelo ya Bobulamadibogo. E be e le lekga la pele a e-ya gomme nna ke be ke e-ya ka lekga la bobedi. Go thabiša gakaakang go mmona gotee le bafsa ba bangwe ba dira tšwelopele moyeng gomme ba phegelela bodiredi bja Bokriste!—Psalme 110:3.

Ditšhegofatšo tše Dintši

Ge ke lebelela morago, ke bona go swana le go se swane mo go lego gona magareng ga go hlankela sešoleng le go ba mohlabani wa Kriste. Mediro ye ka bobedi e nyaka potego e sa kwanantšhego, go kwa, go botega, boitayo le boikgafo. Gaešita le ge mašole a mantši a ka ikemišetša go hwela naga ya gabo ona le bagwera ba ona, go nyakega gore Bakriste ba therešo ba rate manaba a bona. (Mateo 5:43-48) Gaešita le ge mašole a ka newa difoka ka baka la tiro e tee feela yeo e bontšhago gore ke bagale, Bakriste ba therešo ba amogelwa ke Modimo ge ba kgotlelela tirelong ya bona ka potego—e lego seo se ka bolelago go bontšha sebete ge ba lebeletšane le kganetšo, go kwerwa gotee le diteko tše dingwe ka nako e telele. (Baheberu 10:36-39) Bakriste-gotee le nna ke batho ba beago mohlala o mobotse kudu bao ke ba tsebago.

Go fapana le ditumedišo tšeo ke boletšego ka tšona mathomong a kanegelo ye, matšatšing a ditumedišo tša-ka ke, “Dumela Kgaetšedi,” goba “Dumela Ngwanešo.” Ruri go tloga go thabiša go hlankela bodireding bja Bokriste le batho bao ba ratago Modimo e le ka kgonthe! Lega go le bjalo, tokelo e kgolo kudu ke ya go hlankela Modimo yo a Phagamego, Jehofa ka boyena! Ga go tsela e nngwe e kgotsofatšago kudu yeo nka dirišago bophelo bja-ka ka yona yeo nka e naganago.

[Mengwalo ya tlase]

[Mantšu a ipiletšago a tsopotšwego go letlakala 22]

Gaešita le ge mašole a mantši a ka ikemišetša go hwela naga ya gabo ona le bagwera ba ona, go nyakega gore Bakriste ba therešo ba rate manaba a bona

[Seswantšho go letlakala 20, 21]

Ke fofa ka sefofane sa Air Force VIP ka godimo ga Palamente kua Canberra

[Seswantšho go letlakala 23]

Terama e theilwego Beibeleng kopanong ya selete ya 1994 kua Sydney, Australia

[Seswantšho go letlakala 23]

Ke e-na le Kerry Sekolong sa Tirelo ya Bobulamadibogo

[Seswantšho go letlakala 23]

Ke e-na le Diane le Kerry lehono