Bafsa ba a Botšiša

Nka Ganetša Diteko Bjang?

▪ Karen ga a na metsotso e fetago e lesome a fihlile moletlong gomme o bona bašemane ba babedi ba tsena ba swere mekotla e mmalwa e megolo. Ga go yo a sa tsebego gore mekotla yeo e rwele eng. Pejana o be a kwele bašemane ba bangwe ba re go tlo ba le bjala bjo bontši moletlong wo. Ke therešo gore Karen ga se a botša batswadi ba gagwe taba yeo. O ile a ipotša gore bašemane bao ba a swaswa. Ge e le gabotse, go be go swanetše go ba le batho ba bagolo ka ntlong yeo—felo-tsoko ka ntlong.

Go sa letelwa, Karen o kwa lentšu leo a le tsebago ka morago ga gagwe. “O emetše’ng mo, selo se sa go senyetša batho meletlo?” Ge Karen a retologa, o bona mogwera wa gagwe e lego Jessica a swere mapotlelo a mabedi a bjala ao a sa tšwago go bulwa. Jessica o nea Karen le lengwe gomme o re, “O se ke wa mpotša gore o tšhaba go ithabiša go se nene!”

Karen o nyaka go gana. Eupša kgateletšo ya gore a dumele ke e kgolo go feta kamoo a bego a nagana. Ga a rate bjala. Ke feela gore Jessica ke mogwera wa gagwe gomme Karen ga a nyake go bonala e le motho yo a senyetšago ba bangwe moletlo, go etša ge Jessica a itše go bjalo. Ka ntle le moo, Jessica ke yo mongwe wa banenyana bao ba itshwerego gabotse. Le gona, ge e ba a e-nwa bjala, ke ka baka la’ng Karen a se a swanela go bo nwa? Karen o ipotša gore, ‘E fo ba bjala. Ga se gore re diriša dihlare-tagi goba re ba le dikopano tša botona le botshadi.’

GE O sa le yo monyenyane, diteko di tla ka ditsela tše dintši. Gantši di akaretša batho ba bong bjo bo sa swanego le bja gago. Ramon * yo a nago le nywaga e 17 o re: “Sekolong banenyana ba gapeletša batho go dira dilo. Ba rata go go phophola le go bona gore ba ka dira bjalo go fihla bokgoleng bofe. Ba gana go kgaotša!” Deanna, yoo le yena a nago le nywaga e 17, o bile le phihlelo e swanago. O re: “Mošemane yo mongwe o ile a tla go nna gomme a nkgokarela. Ke ile ka mmetha letsogo gomme ka re, ‘O dira’ng? Le go ntseba ga o ntsebe!’”

Le wena o ka lebeletšana le diteko, gomme go ka bonala eka ga di kgaotše. Go etša ge Mokriste yo mongwe a boletše, “diteko di swana le motho yo a kokotago ka go se kgaotše gaešita le ge o mo hlokomologa.” Na o kwa motho a kokota ka tsela yeo gantši go feta kamoo o ka ratago ka gona? Ka mohlala, na o lekwa ke se sengwe sa dilo tše latelago?

□  Go kgoga

□ Go nwa bjala

□ Go diriša dihlare-tagi

□ Go bogela diswantšho tšeo di kgothaletšago bootswa

□ Go tšea karolo boitshwarong bjo bo gobogilego bja tša botona le botshadi

□ Teko e nngwe ․․․․․

Ge e ba o swaile teko le ge e le efe go tše lego ka mo godimo, o se ke wa phetha ka gore ga o swanelwe ke go ba Mokriste. O ka ithuta go laola dikganyogo tše fošagetšego le go ganetša diteko. Bjang? Go a thuša go lemoga mothopo wa teko. Ela hloko mabaka a mararo.

1. Go se phethagale. Tshekamelo ya go dira sebe e tlwaelegile bathong ka moka ba sa phethagalago. Gaešita le moapostola Paulo—Mokriste yo a godilego tsebong—o ile a amogela ka potego gore: “Ge ke duma go dira se se lokilego, se sebe se gona go nna.” (Baroma 7:21) Ka gona, gaešita le motho yo a lokilego ka dinako tše dingwe o tla lemoga gore go na le “kganyogo ya nama le kganyogo ya mahlo.” (1 Johane 2:16) Eupša go dula o nagana ka teko ya go dira sebe go gakatša dilo ka gobane Beibele e re: “Kganyogo ge e emere e tswala sebe.”—Jakobo 1:15.

2. Ditutuetšo tše tšwago ka ntle. Re pota-potilwe ke diteko. Trudy o re: “Batho ba dula ba bolela ka dikopano tša botona le botshadi sekolong le mošomong. Gantši di dirwa gore di bonale di kgahliša e bile di thabiša thelebišeneng le difiliming. Ga se ka mehla go bontšhwago ditla-morago tše mpe tša tšona!” Trudy o tseba go tšwa phihlelong ya gagwe kamoo diteko tše bjalo di lego matla ka gona. O gopola gore: “Ke be ke nagana gore ke hweditše motho yo ke mo ratago ge ke be ke e-na le nywaga e 16. Mma o ile a dula le nna fase gomme a mpotša gore ge e ba dilo di ka tšwela pele ka mokgwa wo di bego di sepela ka wona, ke tla feleletša ke imile. Ke ile ka makatšwa ke gore mma a ka nagana selo se bjalo! Dikgwedi tše pedi ka morago, ke ile ka ima.”

3. “Dikganyogo tšeo di sepedišanago le bofsa.” (2 Timotheo 2:22) Mantšu a a ka akaretša kganyogo le ge e le efe yeo e tlwaelegilego ge o sa le yo mofsa, e bjalo ka go kganyoga go amogelwa ke ba bangwe goba go kganyoga gore ba bangwe ba bone gore o godile. Dikganyogo tšeo ka botšona ga se tše fošagetšego, eupša ge e ba di sa laolwe, di ka dira gore go be thata go ganetša diteko. Ka mohlala, go kganyoga gore ba bangwe ba bone gore o godile go ka dira gore o lahle melao ya boitshwaro yeo o e rutilwego ka gae. Se ke seo se diragaletšego Steve ge a be a e-na le nywaga e 17. O re: “Ke ile ka rabela kgahlanong le batswadi ba-ka gomme ka dira dilo ka moka tšeo ba bego ba nthutile gore ke se ke ka di dira—tše ka moka ke di dirile nakwana ka morago ga go kolobetšwa.”

Ke therešo gore ditutuetšo tšeo go boletšwego ka tšona ka mo godimo di matla. Lega go le bjalo, o ka fenya diteko. Bjang?

▪ Sa pele, lemoga teko yeo go lego thata gore o e fenye. (Mohlomongwe o ka ba o šetše o dirile bjalo ka mo godimo.)

▪ Ke moka, ipotšiše gore, ‘Ke neng moo go nago le kgonagalo e kgolo ya gore teko ye e fihle?’ Swaya bjo bongwe bja maemo a:

□ Ge ke le sekolong

□ Ge ke le mošomong

□ Ge ke le noši

□ Boemong bjo bongwe ․․․․․

 Go tseba nako yeo ka yona go ka diregago gore teko e fihle go ka ba gwa go thuša go e phema ka mo go feletšego. Ka mohlala, nagana ka boemo bja boikgopolelo bjo go boletšwego ka bjona mathomong a sehlogo se. Ke temošo efe yeo Karen a ilego a e newa ya gore go tla ba le mathata moletlong wo a bego a ile go ona? A ka be a ile a phema teko bjang ka mo go feletšego?

▪ Ka ge ga bjale o šetše o (1) lemogile teko le (2)  nako yeo ka yona go ka diregago gore e fihle, o šetše o loketše go gata mogato. Selo sa pele sa bohlokwa ke gore o tsebe kamoo o ka fokotšago goba wa fediša tsela yeo o ka kopanago le teko ka yona. Ngwala seo o ka se dirago ka mo tlase.

․․․․․

․․․․․

(Mehlala: Ge e ba ka mehla ge sekolo se tšwile o kopana le bana bao o tsenago sekolo le bona bao ba go gapeletšago go kgoga, mohlomongwe o ka fetoša tsela yeo o sepelago ka yona gomme wa phema go kopana le bona. Ge e ba ka mehla o hwetša melaetša yeo o sa e nyakego ya Inthanete yeo e nago le diswantšho tšeo di kgothaletšago bootswa, o ka nagana ka go reka mananeo a khomphutha ao a thibelago melaetša e bjalo gotee le mekero ka moka ya Inthanete yeo e romelago melaetša e bjalo. Le gona, o ka leka gore o be šedi ge o tlanya ditlhaka khomphutheng ge o dira nyakišišo.)

Ke therešo gore o ka se pheme diteko ka moka. Go ka direga gore go se go ye kae o lebeletšane le teko e matla kudu—mohlomongwe ka nako yeo o bego o sa e letela. O ka dira’ng ge go le bjalo?

Itokiše. Ge Jesu a be “a lekwa ke Sathane,” o ile a gana gatee-tee. (Mareka 1:13) Ka baka la’ng? Ka gobane o be a šetše a tseba seo a tlago go se dira ge diteko tšeo di tšwelela. Nagana ka seo. Jesu e be e se roboto. A ka ba a ile a ineela ditekong. Eupša o be a šetše a dirile phetho ya go kwa Tatagwe ka dinako tšohle. (Johane 8:28, 29) Jesu o be a bolela therešo ge a be a re: “Ke theogile legodimong, e sego go tlo dira thato ya-ka, eupša go dira thato ya yo a nthomilego.”—Johane 6:38.

Ka mo tlase, ngwala mabaka a mabedi ao ka ona o swanetšego go ganetša teko yeo o kopanago le yona gantši le ditsela tše pedi tšeo o ikemišeditšego go di diriša go e ganetša.

1. ․․․․․

2. ․․․․․

Gopola gore ge o ineela tekong, o fetoga lekgoba la dikganyogo tša gago. (Tito 3:3) Ke ka baka la’ng o swanetše go itumelela go laolwa ke dikganyogo tša gago? E-ba yo a godilego ka mo go lekanego gore o kgone go laola dikganyogo tša gago go e na le go di dumelela gore di go laole.—Bakolose 3:5.

Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa mokerong wa Inthanete wa www.watchtower.org/ype

[Mongwalo wa tlase]

SEO GO KA NAGANWAGO KA SONA

[Tlhaloso ya seswantšho go letlakala 18]

▪ Na dibopiwa tše phethagetšego di ka lekwa?—Genesi 6:1-3; Johane 8:44.

▪ Ge o ganetša teko, potego ya gago e ba le mafelelo afe go ba bangwe?—Diema 27:11; 1 Timotheo 4:12.

[Lepokisi go letlakala 17]

LEKA NYAKIŠOŠO YE

Tšea khamphase gomme o e bee gabotse e le gore lenaka la yona le šupe leboa. Ke moka, tšea magnet gomme o o bee ka thoko ga khamphase. Ke’ng seo se diregago? Lenaka la khamphase ga le sa šupa mo go swanetšego. Go e na le moo, le šupa ka lehlakoreng la magnet.

Letswalo la gago le swana le khamphase. Ge e ba le tlwaeditšwe gabotse, le tla go šupetša tsela ya maleba gomme la go thuša go dira diphetho tše nepagetšego. Eupša ditlwaelano tše mpe, go etša magnet, di na le matla ao a ka fetošago kahlolo ya gago ya se se nepagetšego le se se fošagetšego. Re ithuta’ng go se? Leka go phema batho le maemo ao a ka šitišagago kahlolo ya gago ya se se nepagetšego le se se fošagetšego!—Diema 13:20.

[Lepokisi go letlakala 17]

TŠHIŠINYO

Rulaganya tsela yeo o tlago go arabela ka yona ge motho yo mongwe a go leka gore o dire selo seo se fošagetšego. O se ke wa tshwenyega. Ga go nyakege gore o bolele selo seo se tla dirago gore o bonale eka o lokile kudu. Gantši seo se nyakegago ke gore o gane ka tsela e bonolo le e bontšhago kgodišego. Ka mohlala, ge e ba motho yoo o tsenago sekolo le yena a go nea motšoko, o ka re: “O se ke wa itshwenya. Ga ke kgoge!”

[Seswantšho go letlakala 18]

Ge o ineela tekong, o fetoga lekgoba la dikganyogo tša gago