KA GE GO bontšhitšwe tiragalong yeo e lego ka mo godimo, ga se ditiragalo tše dintšhi tšeo di kgahlago ba mekero ya ditaba kudu go swana le ge motho yo a tumilego a re o ratana le motho wa bong bjo bo swanago le bja gagwe goba gore ke motho yo a ratanago le banna le basadi. Batho ba bangwe ba reta batho ba bjalo ka baka la sebete sa bona; mola ba bangwe ba ba nyatša ka baka la mekgwa ya bona e gobogilego. Lega go le bjalo, batho ba bantšhi ba lebelela go ratana ga batho ba bong bjo bo swanago e fo ba go kgetha go phela ka tsela e fapanego. Daniel yo a nago le mengwaga e 21 o re: “Ge ke be ke sa le sekolong, le bana bao ba bego ba sa ratane le batho ba bong bjo bo swanago le bja bona ba be ba nagana gore ge motho a na le bothata ka taba ya go ratana ga batho ba bong bjo bo swanago, gona o na le kgethollo e bile o ahlola ba bangwe.” a

Seo batho ba se naganago ka taba ya go ratana ga batho ba bong bjo bo swanago se ka fapana go tloga molokong o mongwe go ya go o mongwe goba go ya ka dinaga. Eupša Bakriste ga ba ‘išwe kua le kua ke phefo e nngwe le e nngwe ya thuto.’ (Baefeso 4:14) Go e na le moo, ba kgomarela seo Beibele e se rutago.

Beibele e re’ng ka go ratana ga batho ba bong bjo bo swanago? Le gona ge e ba o phela ka melao ya Beibele ya boitshwaro, o ka araba bjang bao ba bolelago gore o na le kgethollo, o yo a ahlolago batho goba gore o hloile bao ba ratanago le batho ba bong bjo bo swanago le bja bona? Ela hloko dipotšišo tše di latelago le ditsela tšeo o ka arabago ka tšona.

Beibele e bolela ka mo go kwagalago gore Modimo o rerile gore thobalano e thabelwe feela ke monna le mosadi bao ba nyalanego. (Genesi 1:27, 28; Lefitiko 18:22; Diema 5:18, 19) Beibele e ganetša bootswa go sa šetšwe gore ke bja batho bao ba ratanago le batho ba bong bjo bo swanago le bja bona goba bja bao ba ratanago le bong bjo bo sa swanego le bja bona. b​—Bagalatia 5:19-21.

Ge motho a ka go botšiša gore: “Pono ya gago ke efe ka go ratana ga batho ba bong bjo bo swanago?”

O ka araba ka gore: “Ga se ka hloya batho bao ba ratanago le batho ba bong bjo bo swanago le bja bona, eupša nka se amogele boitshwaro bja bona.”

✔ Gopola se: Ge e ba o hlahlwa ke melao ya Beibele ya boitshwaro, gona seo ke kgetho ya gago e bile o na le tshwanelo ya go e kgomarela. (Joshua 24:15) O se ke wa hlabja ke dihlong ka baka la pono ya gago.​—Psalme 119:46.

Ee, go bjalo. Beibele e re: “Godišang batho ba mehuta ka moka” goba go etša ge Today’s English Version e fetolela temana ye ka gore, ‘Hlomphang batho ka moka.’ (1 Petro 2:17) Ka gona, Bakriste ga se ba hloya batho bao ba ratanago le batho ba bong bjo bo swanago le bja bona. Ba bontšha batho ka moka botho, go akaretša le bao ba ratanago le batho ba bong bjo bo swanago le bja bona.​—Mateo 7:12.

Ge motho a ka go botšiša gore: “Na pono ya gago ka go ratana ga batho ba bong bjo bo swanago ga e kgothaletše go kgetholla batho bao ba ratanago le batho ba bong bjo bo swanago le bja bona?”

O ka araba ka gore: “Le gatee. Ke hloile boitshwaro bja go ratana ga batho ba bong bjo bo swanago le bja bona, e sego batho.”

✔ O ka oketša ka gore: “Ka mohlala, ke kgetha go se kgoge. Ge e le gabotse, go kgoga go a nšišimiša. Eupša a re re wena o a kgoga gomme o ikwa ka tsela e fapanego. Nka se go kgetholle ka pono ya gago ya go kgoga, go fo swana le ge ke tseba gore le wena o ka se nkgetholle ka pono ya ka ya go se kgoge, na ga go bjalo? Ke ka mo go swanago le ka tsela yeo re lebelelago go ratana ga batho ba bong bjo bo swanago.”

Jesu ga se a kgothaletša balatedi ba gagwe go amogela tsela e nngwe le e nngwe ya go phela. Go e na le moo, o rutile gore tsela e lebišago bophelong e bulegetše ‘yo mongwe le yo mongwe yo a dumelago go yena.’ (Johane 3:16) Go dumela go Jesu go akaretša go latela melao ya Modimo ya boitshwaro yeo e ganetšanago le tsela e itšego ya go dira dilo​—go akaretša le go ratana ga batho ba bong bjo bo swanago.​—Baroma 1:26, 27.

Ge motho a ka re: “Batho bao ba ratanago le batho ba bong bjo bo swanago le bja bona ba ka se fetoše dikganyogo tša bona, ba belegwe ba le bjalo.” 

O ka araba ka gore: “Beibele ga e bolele selo ka tsela yeo batho bao ba ratanago le batho ba bong bjo bo swanago le bja bona ba bopegilego ka yona, eupša e dumela gore mekgwa e mengwe ke e tseneletšego kudu moo go ka bago thata go e tlogela. (2 Bakorinthe 10:4, 5) Beibele e botša Bakriste gore ba se ke ba ratana le batho ba bong bjo bo swanago le bja bona le ge ba bangwe ba kgahlwa ke seo.”

✔ Tšhišinyo: Go e na le gore o ngangišane ka seo se bakago dikganyogo tša go ratana ga batho ba bong bjo bo swanago, gatelela gore Beibele e ganetša boitshwaro bjoo. O ka re: “O a tseba batho ba bantšhi ba re motho o rata bošoro ka baka la tsela yeo a godišitšwego ka yona. (Diema 29:22) Le ge se e ka ba e le therešo, eupša Beibele e re re se ke ra galefa. (Psalme 37:8; Baefeso 4:31) Na molao woo ga se wa loka feela ka baka la gore batho ba bangwe ba rata bošoro?”

Go nagana ka tsela yeo go theilwe ponong e fošagetšego ya gore batho ba swanetše go kgotsofatša maikwelo a bona a thobalano. Eupša Beibele e bolela gore ba ka kgetha go se kgotsofatše dikganyogo tša bona tšeo di sa swanelago tša thobalano ge e ba ba tloga ba nyaka go dira bjalo.​—Bakolose 3:5.

Ge motho a ka re: “Le ge o sa ratane le motho wa bong bjo bo swanago le bja gago eupša o swanetše go fetoša tsela yeo o lebelelago batho bao ka yona.”

O ka araba ka gore: “A re re ga ke rate go petšha eupša wena o a go rata. Na e be e tla ba mo go kwagalago go nkgapeletša gore ke fetoše pono ya ka, feela ka gobane batho ba dimilione ba kgetha go petšha?”

✔ Gopola se: Batho ba bantšhi (go akaretša le batho bao ba ratanago le batho ba bong bjo bo swanago le bja bona) ba na le dilo tšeo ka tlhago ba tsebago gore ga di amogelege tše bjalo ka boradia, go hloka toka goba ntwa. Beibele e ganetša boitshwaro bjo bjalo; e bile e ganetša mehuta e itšego ya boitshwaro bja tša thobalano go akaretša le go ratana ga batho ba bong bjo bo swanago.​—1 Bakorinthe 6:9-11.

Beibele e na le tekatekano e bile ga e kgetholle. E fo ba e laela batho ka moka gore ba ‘tšhabe bootswa,’ se se akaretša batho bao ba ratanago ka bong bjo bo swanago goba bao ba ratanago le ba bong bjo bo sa swanego le bja bona.​—1 Bakorinthe 6:18.

Ge e le gabotse, batho ba dimilione bao ba ratanago le batho ba bong bjo bo fapanego le bja bona, bao ba ratago go latela melao ya Beibele ba bontšha boitshwaro go sa šetšwe diteko le ge e le dife tšeo ba ka lebeletšanago le tšona. Palo ya bona e akaretša bontšhi bja bao ba sego lenyalong le bao go ka diregago gore ba se tsene lenyalong gotee le ba bantšhi bao ba nyalanego le balekane ba golofetšego bao ba sa kgonego go ba le thobalano. Ba kgona go phela ba thabile ntle le go kgotsofatša dikganyogo tša bona tša thobalano. Bao ba nago le dikganyogo tša go ratana le batho ba bong bjo bo swanago le bja bona, le bona ba ka kgona go itshwara ge e ba ba tloga ba nyaka go kgahliša Modimo.​—Doiteronomio 30:19.