Bafsa ba a Botšiša

Ke Eng Seo ke Swanetšego go se Tseba ka Mekgwa ya go Dira Bagwera ka Inthanete?—Karolo 2

Ngwala dinomoro dilong tše di lego ka mo tlase go ya ka tatelano yeo o bonago di le bohlokwa ka yona.

․․․․․ ditaba tša ka tša khupamarama

․․․․․ nako ya ka

․․․․․ botumo bja ka

․․․․․ bagwera ba ka

KE SELO sefe go tše di lego ka mo godimo seo o ngwadilego nomoro ya pele go sona—seo o bonago se le bohlokwa kudu go wena? Karolo yeo ya bophelo bja gago gotee le tše dingwe tše tharo, di ka ba kotsing ge e ba o diriša mokgwa wa go dira bagwera ka Inthanete.

Na o swanetše go ba le akhaonto Wepesaeteng ya go dira bagwera ka Inthanete? Ge e ba o dula le batswadi ba gago, ke bona ba swanetšego go go direla phetho. * (Diema 6:20) Go etša mo e ka bago mokgwa o mongwe le o mongwe wa go diriša Inthanete, mokgwa wa go dira bagwera ka Inthanete o ka ba le mehola le dikotsi tša wona. Ge e ba batswadi ba gago ba sa nyake o o diriša, o swanetše go dumelelana le bona.—Baefeso 6:1.

Ka lehlakoreng le lengwe, ge e ba batswadi ba gago ba go dumelela go diriša mokgwa wa go dira bagwera ka Inthanete, o ka phema bjang dikotsi tša yona? Sehlogo se se fetilego sa “Bafsa ba a Botšiša” mo go Phafoga! se boletše ka dikarolo tše pedi tšeo o swanetšego go tshwenyega kudu ka tšona—ditaba tša gago tša khupamarama le nako ya gago. Sehlogong se, re tla bolela ka botumo bja gago le tsela yeo o kgethago bagwera ka yona.

BOTUMO BJA GAGO

Go hlokomela botumo bja gago go bolela go ba šedi gore o se nee batho ba bangwe mabaka a kwagalago a gore ba nagane dilo tše mpe ka wena. Ka mohlala, nagana o na le koloi e mpsha; ga se ya ngapega felo goba go potega. Na o ka se nyake gore e dule e le bjalo? O be o ka ikwa bjang ge e ba koloi ya gago e be e ka hlagelwa ke kotsi ka baka la go se šetše?

Selo se bjalo se ka direga ka botumo bja gago mokgweng wa go dira bagwera ka Inthanete. Ngwanenyana yo a bitšwago Cara o re: “Ge o ka phara senepe goba wa ngwala selo se sengwe o sa naganišiša, o ka senya botumo bja gago.” Ka mohlala, ela hloko kamoo botumo bja gago bo ka kgongwago ke . . .

● Dinepe tša gago. Moapostola Petro o ngwadile gore: “Dira gore batho ba dule ba go bona o itshwere gabotse.” (1 Petro 2:12, Contemporary English Version) O lemogile’ng ge o bogela dinepe Wepesaeteng ya go dira bagwera ka Inthanete?

 “Ka dinako tše dingwe ke hwetša motho yoo ke bego ke mo hlompha a pharile dinepe tša gagwe a bonagala a tagilwe.”—Ana, 19.

“Ke tseba banenyana bao ba rego ge ba tšea dinepe ba eme ka tsela yeo e gogelago tlhokomelo karolong e itšego ya mebele ya bona. Tsela yeo ba bonagalago ka yona diwepesaeteng tša go dira bagwera e fapana le tsela yeo ke ba tlwaetšego ka yona.”—Cara, 19.

O be o ka nagana’ng ka motho yoo dinepeng tša gagwe Wepesaeteng ya go dira bagwera (1) a bonagalago a apere ka tsela e tsošago kganyogo goba (2) a bonagalago a tagilwe?

1 ․․․․․

2 ․․․․․

● Seo o se bolelago. Baefeso 4:29 e re: “Anke polelo e bodilego [“polelo ya ditšhila,” International Standard Version] e se ke ya tšwa melomong ya lena.” Ba bangwe ba lemogile gore go bolela ka go fo phatloga, lesebo goba dipolelo tše di gobogilego di rothela dipoledišanong diwepesaeteng tša go dira bagwera.

“Batho ba lokologa kudu ge ba diriša mekgwa ya go dira bagwera ka Inthanete. Ba bona go le bonolo go ngwala mantšu a sa kgahlišego go e na le go a bolela. O ka no ba o sa rogane, eupša mantšu a gago a ka ba a bapala ka maikwelo a lerato, a tšhoša goba a le ditšhila.”—Danielle, 19.

O nagana gore ke ka baka la’ng batho ba lokologa kudu ge ba dutše khomphutheng?

․․․․․

Na ruri o swanetše go tshwenyega ka dinepe le mantšu ao o a pharago? Ee! Mofsa yo a lego mahlalagading yo a bitšwago Jane, o re: “Go dula go bolelwa ka taba ye sekolong. Re be re boledišana ka gore bathwadi ba tla nagana eng ka motho yo a kgopelago mošomo ka morago ga go lebelela akhaonto ya gagwe.”

Pukung ya Facebook for Parents, Dr. B. J. Fogg o bolela gore o dira sona seo ge a nyaka go thwala motho. O re: “Ke nyakišiša ka motho pele ke dira phetho ya go mo thwala. Ge e ba nka hwetša ditaba ka botlalo ka motho yo a nyakago mošomo gomme ka bona dilo tše di sa kgahlišego ka yena, ke thoma go se sa kgahlega. Nka se thwale motho yo bjalo. Ka baka la’ng? Ka gobane ke nyaka go šoma le batho bao ba kgonago go ahlola dilo gabotse.”

Ge e ba o le Mokriste, go na le selo se sengwe sa bohlokwa kudu seo o swanetšego go se ela hloko—kamoo dilo tšeo o di pharago di ka kgomago ba bangwe, go sa šetšwe gore ke badumedigotee le wena goba go se bjalo. Moapostola Paulo o ngwadile gore: “Ka tsela le ge e le efe ga re nee lebaka la go kgopša.”—2 Bakorinthe 6:3; 1 Petro 3:16.

Seo o ka se Dirago

Ge e ba batswadi ba gago ba go dumelela go diriša mokgwa wa go dira bagwera ka Inthanete, lebelela dinepe tšeo o di pharilego gomme o ipotšiše gore: ‘Dinepe tše di utolla’ng ka nna? Na ye ruri ke tsela yeo ke nyakago batho ba ntšea ka yona? Na nka lewa ke dihlong ge e ba batswadi ba ka, mogolo wa Mokriste goba motho yoo e ka bago mothwadi wa ka a ka bona dinepe tše?’ Ge e ba karabo ya gago potšišong yeo ya mafelelo e le ee, dira diphetogo. Se ke seo Kate wa nywaga e 21 a se dirilego. O re: “Mogolo wa Mokriste o ile a bolela le nna ka senepe sa ka seo batho ba se bonago ge ba tsena akhaontong ya ka gomme ke ile ka leboga thušo ya gagwe. Ke be ke tseba gore o nyaka go šireletša botumo bja ka.”

Le gona, hlahloba ka kelohloko dilo tšeo o di ngwalago—gotee le tšeo ba bangwe ba di ngwalago akhaontong ya gago. O se ke wa kgahlišwa ke “polelo ya bošilo” goba “metlae e lešago dihlong.” (Baefeso 5:3, 4) Jane wa nywaga e 19 o re: “Ka dinako tše dingwe batho ba ngwala mantšu a mabe goba ao a ka bolelago dilo tše pedi. Gaešita le ge di  sa bolelwe ke wena, di go bolela gampe ka gobane di akhaontong ya gago.”

Ge e le ka dinepe le mantšu ao o a pharago, o tla ipeela mellwane efe e le gore o šireletše botumo bja gago?

․․․․․

TSELA YEO O KGETHAGO BAGWERA KA YONA

Ge e ba o be o na le koloi e mpsha, na o be o tla dumelela motho yo mongwe le yo mongwe gore a namele? Ge e ba batswadi ba gago ba go dumelela go diriša mokgwa wa go dira bagwera ka Inthanete, o swanetše go dira phetho e swanago ge go tliwa tabeng ya gore ke bomang bao o tla ba laletšago—goba o tla ba dumelelago—gore e be bagwera ba gago. O tlo kgetha bjang?

“Batho ba bangwe ba tshwenyegile kudu ka go ikhweletša bagwera ba bantši—ba thaba kudu ge ba oketšega. Ba ka ba ba dira segwera le batho bao ba sa ba tsebego.”—Nayisha, 16.

“Mokgwa wa go dira bagwera ka Inthanete o go nea sebaka sa gore o ikgweranye le batho bao e sa lego o ba bona kgale. Eupša ka dinako tše dingwe batho ba bjalo go kaone ge o sa buše o tlwaelana le bona.”—Ellen, 25.

Seo o ka se Dirago

Tšhišinyo: Hlahloba gomme o dire diphetogo. Hlahloba lelokelelo la bagwera ba gago gomme o dire diphetogo ge go nyakega. Maemong ka moka, ipotšiše gore:

1. ‘Motho yo ke wa mohuta mang?’

2. ‘Motho yo o phara dinepe le mantšu a mohuta mang?’

3. ‘Na mogwera yo o ntutueletša go dira dilo tše dibotse bophelong?’

“Gantši ke hlahloba bagwera ba ka kgwedi le kgwedi. Ge e ba go na le yo mongwe moo yo ke sa mo kwešišego gabotse goba ke sa mo tsebego gabotse, ke phumola motho yoo lelokelong la bagwera ba ka.”—Ivana, 17.

Tšhišinyo: Ipeele mellwane ya go dira bagwera. Ipeele mellwane ya gore ke bomang bao o tla nyakago gore e be bagwera ba gago goba wa ba dumelela go ba bagwera ba gago, go etša ge o dira bophelong bja letšatši le letšatši. (1 Bakorinthe 15:33) Ka mohlala, kgarebe e bitšwago Leanne e re: “Mollwane wa ka ke wo: Ge e ba ke sa go tsebe, ga ke dumele o eba mogwera wa ka. Ge e ba ke bona selo se sengwe akhaontong ya gago seo ke sa se kwešišego gabotse, ke tla go phumola go bagwera ba ka gomme ka se sa go dumelela o eba mogwera wa ka.” Ba bangwe ba itiretše mellwane e bjalo.

“Ga ke fo dira bagwera le motho yo mongwe le yo mongwe. Seo se ka ba kotsi.”—Erin, 21.

“Batho bao nkilego ka tsena sekolo le bona ba ile ba kgopela go gwerana le nna Inthaneteng. Eupša ke be ke leka ka gohle ge ke be ke sa le sekolong gore ke se ke ka itlwaelanya le bona; go re’ng nka dumela gore e be bagwera ba ka gona bjale?”—Alex, 21.

Ka mo tlase, ngwala dilo tšeo e ka bago mellwane ya gago ya go dira bagwera.

․․․․․

Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa Wepesaeteng ya www.watchtower.org/ype

[Mongwalo wa ka tlase]

[Ntlhakgolo go letlakala 20]

Seema sa Beibele se re: “Ge e ba o swanetše go kgetha magareng ga botumo bjo bobotse le lehumo le legolo, kgetha botumo bjo bobotse.”—Diema 22:1, Today’s English Version

[Lepokisi go letlakala 22]

KE KA BAKA LA’NG O SA BOTŠIŠE BATSWADI BA GAGO?

Hlahloba sehlogo se le batswadi ba gago gotee le sehlogo se se fetilego sa “Bafsa ba a Botšiša.” Hlahlobang kamoo tsela yeo o dirišago Inthanete e kgomago (1) ditaba tša gago tša khupamarama, (2) nako ya gago, (3) botumo bja gago le (4) tsela yeo o kgethago bagwera ka yona.

 [Lepokisi go letlakala 23]

TEMOŠO GO BATSWADI

Bana ba lena ba ka tseba dilo tše dintši ka Inthanete go feta lena. Eupša ga ba na temogo go swana le lena. (Diema 1:4; 2:1-6) Go bjalo ka ge setsebi sa tšhireletšego ya Inthanete e lego Parry Aftab a boletše gore: “Bana ba tseba dilo tše dintši ka thekinolotši. Batswadi ba tseba dilo tše dintši ka bophelo.”

Nywageng e sa tšwago go feta, mekgwa ya go dira bagwera ka Inthanete e ile ya thoma go ata kudu. Na ngwana wa lena yo a lego mahlalagading o godile ka mo go lekanego monaganong gore a ka e diriša? Ke lena le swanetšego go dira phetho ye. Go swana le go otlela koloi, go ba le akhaonto ya panka goba go diriša karata ya mokitlana, mekgwa ya go dira bagwera ka Inthanete e na le dikotsi tša yona. Tše dingwe tša tšona ke dife?

DITABA TŠA KHUPAMARAMA. Bafsa ba bantši ga ba lemoge kotsi ya go phara tsebišo e ntši Inthaneteng. Ba bolela gore ba dula kae, ba tsena sekolo kae goba ba ba gona ka gae neng le gore ga ba be gona neng gomme seo se ka bea lapa la lena kotsing.

Seo le ka se dirago. Ge bana ba lena e be e sa le ba banyenyane, le ba rutile gore ba lebelele mahlakore ka bobedi pele ba tshela mmila. Ka ge ga bjale ba godile, ba ruteng kamoo ba ka dirišago Inthanete ka tsela e šireletšegilego. Balang tsebišo yeo e bolelago ka tšhireletšego tokollong yeo e tšweletšego sehlogong sa “Bafsa ba a Botšiša” sa Phafoga! ya July–September 2011. Le gona bonang Phafoga! (ya Seisemane) ya October 2008, matlakala 3-9. Ke moka le ahlaahle tsebišo ye le ngwana wa lena yo a lego mahlalagading. Katanelang go ba ruta “bohlale le tlhaologanyo” mabapi le tšhireletšego ya Inthanete.—Diema 3:21.

NAKO. Motho a ka lemalela mokgwa wa go dira bagwera ka Inthanete. Rick wa nywaga e 23 o re: “Ka morago ga matšatši a mmalwa ke na le akhaonto, ke be ke palelwa ke go kgaogana le yona. Ke feditše diiri tše dintši ke bogetše dinepe le ditaba tše dingwe.”

Seo le ka se dirago. Balang le go ahlaahla le bana ba lena sehlogo sa “Bafsa ba a Botšiša . . . Na ke Lemaletše Didirišwa tša Elektroniki?” seo se tšweletšego tokollong ya Phafoga! ya April–June 2011. Gatelelang kudu seo se lego lepokising la “Ke be ke Lemaletše Wepesaete Yeo go Dirwago Segwera go Yona,” go letlakala 26. Thušang ngwana wa lena yo a lego mahlalagading go ba yo a “lekanetšego mekgweng” gomme a kgomarele nako yeo le mo dumeletšego gore a e fetše a diriša Inthanete. (1 Timotheo 3:2) Mo gopotšeng gore bophelo bo sa le bose gaešita le ge a sa diriše Inthanete!

BOTUMO. Seema sa Beibele se re: “Mošemanyana ó lemoxwa ka medirô y’axwe.” (Diema 20:11, Beibele ya Sepedi) Ruri se ke sa therešo ka dilo tšeo di diregago Inthaneteng! Go oketša moo, ka ge mokgwa wa go dira bagwera ka Inthanete e le selo sa batho bohle, seo bana ba gago ba se pharago moo se kgoma botumo bja bona le lapa labo bona.

Seo le ka se dirago. Bafsa bao ba lego mahlalagading ba swanetše go tseba gore seo ba se pharago Inthaneteng se utolla gore ke batho ba mohuta mang. E bile ba swanetše go kwešiša gore dilo tšeo di diregago Inthaneteng di dula di le moo Inthaneteng. Dr. Gwenn Schurgin O’Keeffe o ngwadile ka pukung ya CyberSafe gore: “Bana ba thatafalelwa ke go kwešiša taba ya gore dilo tšeo di diregago Inthaneteng di dulela moo sa ruri, eupša go bohlokwa gore ba thome go lemoga seo. Tsela e nngwe ya go hlalosetša bana seo se diregago Inthaneteng ke ka go ba gopotša gore ge ba le moo ba se bolele dilo tšeo ba bego ba ka se di bolele ge ba se moo.”

BATHO BAO BA GWERANAGO LE BONA. Tanya wa nywaga e 23 o re: “Bafsa ba bantši bao ba lego mahlalagading ba rata go tuma, ka gona ba tla dumela go gwerana le batho bao ba sa ba tsebego goba bao ba se nago ditekanyetšo tša go phela.”

Seo le ka se dirago. Thušang morwa goba morwedi wa lena go ipeela mellwane ya go dira bagwera. Ka mohlala, Alicia wa nywaga e 22 ga a ikgweranye le bagwera ba bagwera ba gagwe. O re: “Ge e ba ke sa go tsebe goba ke sa ka ka go bona, gona nka se ikgweranye le wena e le feela ka gobane o gwerane le mogwera’ke.”

Banyalani bao ba bitšwago Tim le Julia ba ile ba itirela akhaonto e le gore ba hlahlobišiše batho bao morwedi wa bona a gweranago le bona le dilo tšeo a di pharago. Julia o re: “Re ile ra mo laela gore a re bee lelokelelong la bagwera ba gagwe. Go bjalo ka ge eka batho bao a ikgweranyago le bona ba dula le rena ka gae. Re nyaka go tseba gore ke bomang.”

[Seswantšho go letlakala 21]

Go fo swana le ge koloi e ka senyega ge e otlelwa bošaedi, botumo bja gago le bjona bo ka senyega ge o phara diswantšho goba mantšu a gobogilego Inthaneteng

[Seswantšho go letlakala 22]

Na o ka fo tšea motho kgopu ka gobane a go kgopetše le ge o sa mo tsebe? Ka gona, ke ka baka la’ng o ka dumela gore motho yo mongwe yo o sa mo tsebego e be mogwera wa gago?