Bohlale bo a Goeletša
“Na bohlale ga bo goeletše, gomme temogo yona ya hlaboša lentšu la yona? Bohlale bo eme mafelong a phagamego, kgauswi le tsela le magahlanong a ditsela. Bo goeletša bo le . . . moo go tsenwago gona.”—DIEMA 8:1-3.
BOHLALE bo bohlokwa kudu. Ge nkabe e se ka bohlale re be re tla dulela go dira diphošo. Eupša bohlale bja kgonthe bo ka hwetšwa kae? Mongwadi wa puku ya Diema o be a naganne ka bohlale bjo bo sa bapišwego le selo bja Mmopi wa rena. Go oketša moo, bohlale bja Gagwe bo ka hwetšwa ke batho ka moka ka pukung e kgethegilego, e lego Beibele. Ela hloko dilo tše di latelago:
The World Book Encyclopedia e re Beibele “ke puku yeo e abilwego ka bontši kudu historing. E fetoletšwe ka makga a mantši, le ka maleme a mantši kudu go feta puku le ge e le efe e nngwe.” Ga bjale Beibele e hwetšagala e feletše goba ka karolo ya yona ka maleme a ka bago a 2 600, e lego seo se dirago gore e hwetšwe ke batho ba ka godimo ga 90 lekgolong.
Le gona bohlale bo “[tšwela pele] bo goeletša” ka tsela ya kgonthe. Go Mateo 24:14, re bala gore: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo [bja lefase le] bo tla tla.”
‘Ditaba tšeo tše dibotse’ ke bohlale bja kgonthe ka gobane di re botša ka tharollo e bohlale ya Modimo ya mathata a batho, e lego Mmušo wa Gagwe. Mmušo woo wa Modimo o tla buša lefase ka moka—lefase le tla ba le pušo e tee. (Daniele 2:44; 7:13, 14) Ke ka baka leo Jesu Kriste a rapetšego ka gore: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”—Mateo 6:9, 10.
Dihlatse tša Jehofa di tšea e le tokelo go bolela ka Mmušo wa Modimo dinageng tše 239! Ee, bohlale—bohlale bja Modimo—ka kgonthe bo a “goeletša,” gaešita le “moo go tsenwago gona.” Na o a bo kwa?
