Go ya ka mokgatlo wa World Wildlife Fund, magareng ga 1997 le 2011, kua Greater Mekong, e lego selete seo se akaretšago Cambodia, Laos, Myanmar, Thailand, Vietnam le profense ya Yunnan, China, go hweditšwe mehuta e mentši e mefsa ya dimela le diphoofolo, go akaretša le petla ya mahlo a bjalo ka leswika la rubi (Trimeresurus rubeus). Go mehuta yeo e hweditšwego ka 2011 feela, go be go na le dimela tše 82, digagabi tše 21, dihlapi tše 13, diphoofolo tša go phela ka meetseng le nageng tše 5 le diamuši tše 5.

Kuranta ya The Moscow Times e begile gore go gweba ka batho go fetogile bothata bjo bogolo “nageng ka moka ya European Union.” Batho ba rekišetšwa gore ba gobošwe ka tša thobalano, ba šome mošomo wa kgapeletšo e bile “go rekišwa ditho tša batho tša mmele mo go sego molaong.” Bao ba gwebago ka batho ba ikhola ka badiidi, bao ba hlokago mošomo le go se lekane ga banna le basadi.

Banyakišiši bao ba ilego ba nyakišiša ka bana le bafsa bao ba bogelago thelebišene ba phethile ka gore go e bogela kudu “go dira gore bana e be majelathoko ge ba gola.” Seo banyakišiši ba se hweditšego se thekga taba ya gore bana ga ba swanela go bogela “mananeo a thelebišene diiri tše fetago e tee goba tše pedi ka letšatši.”

Mo e nyakilego go ba “metse ka moka ya Alaska” e agilwe kgauswi le mabopo goba kgauswi le dinoka, gomme 86 lekgolong ya metse ye e hlaselwa ke mafula le kgogolego. Dipego di bontšha gore go hlatloga ga phišo go dira gore lehlwa leo le šireletšago metse le diege go hlamega, gomme seo se dira gore metse e hlaselwe ke dipula tše matla tša lehlabula.

Maria van der Hoeven, molaodi yo mogolo wa International Energy Agency o re go sa šetšwe tšhelete e ntšhi kudu yeo e dirišitšwego go tšweletša didirišwa tša thekinolotši tša go fehla mohlagase o hlwekilego tše bjalo ka tšeo di šomišago phefo goba letšatši, “mohlagase wo o tšweletšwago lehono o šilafetše go swana le wa nywaga e 20 e fetilego.”