Bontšha ‘Batho ba Mehuta Yohle’ Kwelobohloko
GE Jesu a be a ruta barutiwa ba gagwe go bolela ditaba tše dibotse, o ile a ba lemoša gore ga se batho ka moka bao ba tlago go nyaka go theetša molaetša wa bona. (Luka 10:3, 5, 6) Ge re bolela ditaba tše dibotse, re ka kopana le batho bao ba lego bogale goba bao ba sa re amogelego gabotse. Ke therešo gore ge batho ba arabela ka tsela yeo, re ka thatafalelwa ke go ba kwela bohloko.
Motho yo a nago le kwelobohloko o kgona go bona dilo tšeo batho ba bangwe ba di hlokago le mathata a bona, o a ba šokela e bile o nyaka go ba thuša. Lega go le bjalo, ge re thoma go se sa kwela batho bohloko, re ka se sa ba botša ditaba tše dibotse ka mafolofolo gomme seo se tla dira gore re se ke ra ba thuša. Re ka bapiša mafolofolo a rena le mollo. E le gore mollo o dule o tuka, o swanetše go bešetšwa. Ka mo go swanago, e le gore re dule re le mafolofolo modirong wo, re swanetše go ba le kwelobohloko.—1 Bathes. 5:19.
Re ka dira’ng gore re bontšhe batho kwelobohloko le ge go dira seo go se bonolo? Anke re ahlaahleng mehlala e meraro yeo re ka e ekišago. Re tlo ithuta ka mohlala wa Jehofa, wa Jesu le wa moapostola Paulo.
EKIŠA KWELOBOHLOKO YA JEHOFA
Ke go tloga kgale Jehofa a kgotleletše batho ba bolela maaka ka yena. Lega go le bjalo, o dula a “bontšha botho go ba sa lebogego le ba kgopo.” (Luka 6:35) O re bontšha botho bja gagwe ka go se re felele pelo. Jehofa o nyaka gore “mehuta yohle ya batho” e phološwe. (1 Tim. 2:3, 4) Le ge Modimo a hloile dilo tše mpe, batho ba bohlokwa kudu go yena gomme ga a nyake gore go be le yo a hwago.—2 Pet. 3:9.
Jehofa o a tseba gore Sathane o kgona go foufatša batho gore ba se tsebe therešo. (2 Bakor. 4:3, 4) Batho ba bantši ba rutilwe dithuto tša maaka go tloga e sa le ba banyenyane, gomme seo se dira gore go be thata gore ba amogele therešo. Jehofa o tloga a nyaka go thuša batho bao. Re tseba seo bjang?
Nagana kamoo Jehofa a bego a lebelela Baninife ka gona. Le ge ba be ba rata bošoro, Jehofa o ile a re go Jona: “Bjale o re nna ke se kwele motse o mogolo wa Ninife bohloko, woo o nago le badudi ba fetago dikete tše lekgolo-masomepedi (120 000) bao le gatee ba sa tsebego phapano magareng ga seatla sa bona sa le letona le sa le letshadi?” (Jona 4:11) Jehofa o ile a kwela Baninife bao bohloko ka ge ba be ba sa mo tsebe, ka gona o ile a roma Jona gore a yo ba nea temošo.
Go swana le Jehofa, le rena re swanetše go lebelela batho ba le bohlokwa. Re ka mo ekiša ka go leka go thuša bao ba ka re theetšago, gaešita le ge go bonagala eka ba ka se amogele therešo.
EKIŠA KWELOBOHLOKO YA JESU
Go swana le Tatagwe, Jesu o ile a kwela batho bohloko, kudukudu bao ba bego ba nyaka go ithuta ka Modimo. Beibele e re: “Ge a bona mašaba a a šokela, gobane a be a šokiša gomme a gašane go swana le dinku tše di se nago modiši.” (Mat. 9:36) Jesu o be a kwešiša gore ke ka baka la eng ba be ba šokiša. O be a tseba gore baetapele ba bona ba bodumedi ba be ba sa ba sware gabotse e bile ba ba ruta maaka. Le ge Jesu a be a tseba gore ba bantši ba be ba tlo dumelela dilo tše itšego di ba šitiša go ba balatedi ba gagwe, seo ga se sa ka sa mo thibela go ba “ruta dilo tše dintši.”—Mar. 4:1-9.
O se ke wa ferekana ge motho a sa nyake go theetša molaetša wa rena
Maemo a motho a ka fetoga gomme a nyaka go theetša molaetša wa rena
Ge batho ba sa amogele molaetša wa rena, re swanetše go leka go kwešiša gore ke ka baka la eng ba sa o amogele. Ba bangwe ba ka ba ba lebelela Beibele goba bodumedi ka mo go fošagetšego ka baka la ge ba bona batho ba bangwe bao ba ipitšago Bakriste ba dira dilo tše mpe. Mohlomongwe ba bangwe ba ka ba ba boditšwe maaka ka ditumelo tša rena. Ba bangwe ba ka ba ba tšhaba gore batho ba tikologong ya gabo bona goba ba leloko ba tla ba kwera.
Batho ba bangwe ba ka ba ba kile ba diragalelwa ke dilo tšeo di ba kwešitšego bohloko kudu bophelong. Moromiwa yo a bitšwago Kim o re: “Karolong e itšego ya tšhemo ya gabo rena, batho ba bantši ba ile ba lahlegelwa ke dithoto tša bona ka moka ka baka la ntwa. Ga ba na kholofelo ka bokamoso. Ba tshwenyegile e bile ga ba tshepe motho. Gantši tikologong ye re kopana le batho bao ba sa ratego molaetša wa rena. Ka letšatši le lengwe ge ke be ke le tšhemong, batho ba bangwe ba ile ba ntlhasela.”
Kim o thušwa ke’ng gore a tšwele pele a kwela batho bohloko le ge ba mo swara gampe? O re: “Ge batho ba sa ntshware gabotse, ke leka go gopola lengwalo la Diema 19:11, leo le rego: ‘Temogo ya motho e fokotša bogale bja gagwe.’ Go gopola maemo a batho ba tšhemong ya gabo rena, go nthuša gore ke ba kwele bohloko. Le gona ga se batho ka moka bao ba sa re amogelego gabotse. Yona tikologong yeo, go na le batho ba bangwe bao ba ratago go ithuta Beibele.”
O swanetše go ipotšiša gore: ‘Ke be ke tla arabela bjang molaetšeng wa Mmušo wa Modimo ge nkabe ke se Hlatse ya Jehofa?’ Ka mohlala, ke be ke tla dira’ng ge e ba ke botšwa maaka ka Dihlatse tša Jehofa gantši? Mohlomongwe maemong a bjalo le wena o be o ka se arabele gabotse, gomme ba bangwe ba swanelwa ke go go bontšha kwelobohloko. Ge re ka gopola taelo ya Jesu ya gore re swanetše go swara ba bangwe kamoo re nyakago ba re swara ka gona, gona re tla ba kwela bohloko gaešita le ge go se bonolo go dira bjalo.—Mat. 7:12.
EKIŠA KWELOBOHLOKO YA PAULO
Moapostola Paulo o ile a kwela batho bohloko gaešita le ge ba be ba mo tlaiša. Ka baka la’ng? Ka gobane ga se a ka a lebala gore e be e le motho wa mohuta mang pele a fetoga Mokriste. O itše: “Ke be ke le morogaki, motlaiši le motho wa mereba. Lega go le bjalo, ke gaugetšwe, gobane ke dirile ka go se tsebe le ka go hloka tumelo.” (1 Tim. 1:13) Paulo o be a tseba gore Jehofa le Jesu ba mo gaugetše. Ga go pelaelo gore o be a kgona go bona batho bao ba swanago le yena pele e ka ba Mokriste.
Ka dinako tše dingwe Paulo o be a kopana le batho bao ba bego ba dumela ka mo go tseneletšego dithuto tša maaka. O ile a ikwa bjang? Ditiro 17:16 e re ge Paulo a be a le Athene, “moya wa gagwe [o ile] wa huduega ge a bona motse o tletše medingwana ya diswantšho.” Lega go le bjalo, Paulo o ile a diriša yona medingwana yeo e bego e mo tena go ruta batho ka Modimo. (Dit. 17:22, 23) O ile a fetofetoša mekgwa ya gagwe ya go ruta gomme a bolela ka ditsela tše di fapafapanego le batho bao ba sa swanego e le gore “ka mešegofela [a] phološe ba bangwe.”—1 Bakor. 9:20-23.
Ge re bolela le batho bao ba sa nyakego go re theetša goba bao ba dumelago dithuto tša maaka, re ka ekiša Paulo. Re ka diriša seo re se tsebago ka bona gore re ba botše “ditaba tše dibotse tša se sekaone.” (Jes. 52:7) Kgaetšedi yo a bitšwago Dorothy o re: “Batho ba bantši tikologong ya gabo rena ba rutilwe gore Modimo o sehlogo e bile o ahlola batho. Ge ke ba botša ka molaetša wa Beibele, ke thoma ka go ba reta gore ba tloga ba dumela gore Modimo o gona, ke moka ka ba bontšha seo Beibele e se bolelago ka lerato la Jehofa le dilo tšeo a tshepišago go tlo re direla tšona nakong e tlago.”
“TŠWELA PELE O FENYA BOBE KA BOTSE”
Ge bofelo bja lefase le bo dutše bo batamela, re ka letela gore batho ba bangwe ‘ba fetelele ka bobe.’ (2 Tim. 3:1, 13) Eupša mekgwa ya bona ga se ya swanela go dira gore re se sa ba le kwelobohloko goba re se sa thaba. Jehofa a ka re nea matla a gore re ‘tšwele pele re fenya bobe ka botse.’ (Baroma 12:21) Mmulamadibogo yo a bitšwago Jessica o re: “Gantši ke kopana le batho bao ba se nago boikokobetšo, bao ba re nyatšago le go nyatša molaetša wa rena. Se se ka go ferekanya. Ka gona, pele ke thoma go boledišana le motho ka Beibele, ke rapela Jehofa ka pelong gomme ka mo kgopela gore a nthuše go lebelela motho yoo ka tsela yeo a mo lebelelago ka yona. Se se nthuša gore ke se ke ka dula ke nagana ka gore ke ikwa bjang, eupša ke nagane kamoo nka thušago motho yo ke boledišanago le yena.”
Re tšwela pele re tsoma bao ba nyakago go tseba ditaba tše dibotse
Ba bangwe ba feleletša ba amogetše thušo ya rena gomme ba ithuta therešo
Le gona re swanetše go nagana kamoo re ka kgothatšago Bakristegotee le rena ge re dutše re šoma le bona modirong wo wa go bolela ditaba tše dibotse. Jessica o re: “Ge yo mongwe wa rena ba se ba mo amogela gabotse ka ntlong yeo a bego a swanetše go bolela ka go yona, ga ke dulele go bolela ka seo. Go e na le moo, ke bolela ka mafelelo a mabotse a modiro wa rena, le ge batho ba bangwe ba sa arabele gabotse.”
Jehofa o a tseba gore re kopana le mathata ge re le tšhemong. O thaba kudu ge re ekiša kgaugelo ya gagwe! (Luka 6:36) Ke therešo gore Jehofa a ka se bontšhe batho kwelobohloko ka mo go sa felego. Re kgodišegile gore o tseba nako ya maleba ya go fediša lefase le le lebe. Re sa letile gore nako yeo e fihle, re swanetše go swarega ka go botša batho ditaba tše dibotse. (2 Tim. 4:2) A re tšweleng pele re botša batho ditaba tše dibotse ka mafolofolo gomme re bontšheng ‘batho ba mehuta yohle’ kwelobohloko.
