1. Ke’ng seo ka moka ga rena re se nyakago, le gona re nyaka gore batho ba tsebe’ng ka rena?

O KA ikwa bjang ge motho yo o mo tsebago le yo o mo hlomphago a ka lebala leina la gago goba e bile a se sa go tseba? O ka nyama kudu. Ka baka la’ng? Ka gobane ka tlhago, ka moka ga rena re nyaka go tsebja le go amogelwa. Eupša ga re nyake feela gore batho ba tsebe gore re bomang, re nyaka le gore ba tsebe gore re batho ba mohuta mang le gore ke dilo dife tšeo re di fihleletšego.​—Num. 11:16; Jobo 31:6.

2, 3. Ke’ng seo se ka diregago ge e ba re nyaka go amogelwa ke batho? (Bona seswantšho se se lego ka mo godimo.)

² Ka ge re se ra phethagala, re ka thoma go kganyoga go tsebja ka tsela yeo e sego ya maleba, go no swana le ge seo se ka direga ka dilo tše dingwe tšeo re di kganyogago. Kganyogo yeo e ka dira gore re nyake go phela re retwa le ge go sa hlokagale. Lefase la Sathane le ka dira gore re nyake go tuma le go ikwa re le bohlokwa. Ge re thoma go ikwa ka tsela yeo, re ka se sa nea Jehofa Modimo letago leo le mo swanelago le go mo hlankela ka tsela ya maleba.​—Kut. 4:11.

 ³ Mehleng ya Jesu, baetapele ba bangwe ba bodumedi ba be ba nyaka go amogelwa goba go hlomphiwa ka tsela yeo e sego ya maleba. Jesu o ile a lemoša balatedi ba gagwe gore: “Šetšang bamangwalo bao ba ratago go itshepelela ba apere diaparo tše ditelele gomme ba rata go dumedišwa ka tlhompho marekišetšong le go nyaka ditulo tša ka pele disinagogeng le dibaka tša ka pelepele menyanyeng.” O tšwetše pele ka gore: “Bao bona ba tla hwetša kahlolo e boima kudu.” (Luka 20:46, 47) Go fapana le seo Jesu a se boletšego ka bamangwalo, o ile a reta mohlologadi wa modiidi yoo a ilego a neela ka ditšheletiana tše pedi a sa nyake go bonwa ke batho. (Luka 21:1-4) Go molaleng gore Jesu o be a sa lebelele taba ya go nyaka go amogelwa ka tsela yeo ba bangwe ba bego ba e lebelela ka yona. Sehlogo se se tla re thuša gore re be le pono e nepagetšego ka taba ye, e lego pono yeo Jehofa Modimo a nyakago re e ba le yona.

4. Re swanetše go nyaka go tsebja ke mang, gona ka baka la’ng?

⁴ Re swanetše go nyaka go tsebja goba go amogelwa ke mang? Ga re nyake go tsebja ka tsela yeo batho ba bantši ba lekago go tsebja ka yona ka go ba le thuto e phagamego, go atlega kgwebong le go tuma lefaseng. Paulo o hlalositše gore re swanetše go nyaka go tsebja ke mang. O itše: “Ka ge bjale le tsebile Modimo, goba le tsebilwe ke Modimo, go tla bjang gore le boele gape dilong tše di fokolago le tše di nyatšegago tša motheo gomme le [nyake] go ba bahlanka ba tšona gape?” (Bagal. 4:9) Ruri ke tokelo e kgolo kudu ‘go tsebja ke Modimo,’ yena Mmuši yo a Phagamego kudu legodimong le lefaseng! Jehofa o a tseba gore re bomang, o a re rata le gona o nyaka gore re be bagwera ba gagwe. Ge a be a re bopa, o be a nyaka gore re tle re be bagwera ba gagwe.​—Mmo. 12:13, 14.

5. Re swanetše go dira’ng gore Jehofa a re tsebe?

⁵ Re a tseba gore Moshe e be e le mogwera wa Jehofa. Ge a be a kgopela Jehofa gore “ntsebiše ditsela tša gago,” Jehofa o ile a mo araba ka gore: “Le sona se o se boletšego ke tla se dira gobane mahlo a ka a go lebeletše ka botho e bile ke go tseba ka leina.” (Ek. 33:12-17) Le rena re ka hwetša ditšhegofatšo tše di kgahlišago ge Jehofa a re tseba ka maina. Eupša re swanetše go dira’ng gore Jehofa a re tsebe? Re swanetše go mo rata gomme re ineele go yena.​—Bala 1 Bakorinthe 8:3.

6, 7. Ke’ng seo se ka dirago gore re se sa ba le segwera se sebotse le Jehofa?

⁶ Go rata Jehofa le go ineela go yena ga se gwa lekana. Re swanetše go dula re na le segwera se sebotse le Tatago rena wa legodimong. Go no swana le Bakriste ba kua Galatia bao Paulo a ilego a ba ngwalela lengwalo, le rena ga se ra swanela go hlankela “[dilo] tše di fokolago le tše di nyatšegago tša motheo” tša lefase le, go akaretša le go nyaka go tsebja ke batho. (Bagal. 4:9) Bakriste bao ba lekgolong la pele la mengwaga ba be ba šetše ba tsebja ke Modimo. Lega go le bjalo, Paulo o ile a re bona batho bao ba be ba ‘boela gape’ dilong tša lefeela. Ge e le gabotse Paulo o be a re: “Go re’ng le boela dilong tše le di tlogetšego tša go hloka mohola e bile le di hlankela?”

⁷ Na selo se se swanago se ka re diragalela? Ee. Go swana le Paulo, go ka direga gore ge re be re thoma go tseba Jehofa re ile ra se sa nyaka go tsebja lefaseng la Sathane. (Bala Bafilipi 3:7, 8.) Mohlomongwe re ile ra gana go ba le thuto e phagamego, goba ra gana maemo a godimo mošomong goba ra se nyake go dira tšhelete e ntši kgwebong. Goba mohlomongwe nkabe re ile ra tuma le go huma ka ge re na le bokgoni bja mmino goba bja dipapadi, eupša re ganne go phegelela dilo tšeo ka moka. (Baheb. 11:24-27)  Ruri e tla ba bošilo ge re ka itshola gore re dirile diphetho tše bjalo tše dibotse! Ge re ka itshola, seo se ka dira gore re boele dilong tšeo re bego re šetše re ipoditše gore di gare ga dilo ‘tše di fokolago le tše di nyatšegago’ tša lefase le. *

8. Ke’ng seo se tlago go dira gore re nyake go dula re tsebja ke Jehofa?

⁸ Re swanetše go dira’ng gore re dule re tsebja ke Jehofa e sego batho ba lefase? E le gore re dire seo, go na le dilo tše pedi tšeo re swanetšego go dula re di gopola. Sa pele, re swanetše go dula re gopola gore Jehofa o a bontšha gore o tseba bao ba mo hlankelago ka potego. (Bala Baheberu 6:10; 11:6) O rata yo mongwe le yo mongwe wa bahlanka ba gagwe, ka gona o bona e le ‘go se loke’ ge a ka hlokomologa bao ba mmotegelago. Ka mehla Jehofa “o tseba [goba o bona batho] ba gagwe.” (2 Tim. 2:19) O “tseba tsela ya baloki” e bile o kgona go ba hlakodiša ge ba wetšwe ke diteko.​—Ps. 1:6; 2 Pet. 2:9.

9. Nea mehlala ya kamoo Jehofa a ilego a bontšha gore o amogela batho ba gagwe.

⁹ Ka dinako tše dingwe, Jehofa o ile a bontšha ka ditsela tše di kgahlišago kudu gore o amogela batho ba gagwe. (2 Dikor. 20:20, 29) Ka mohlala, nagana kamoo Jehofa a ilego a phološa batho ba gagwe Lewatleng le Lehwibidu ge ba be ba kitimišwa ke Farao le madira a gagwe a matla. (Ek. 14:21-30; Ps. 106:9-11) Tiragalo yeo e be e le e makatšago kudu moo e lego gore le ka morago ga mengwaga e 40, batho ba tikologong yeo ba be ba sa bolela ka yona. (Josh. 2:9-11) Ruri go kgothatša kudu go dula re gopola kamoo Jehofa a ilego a phološa batho ba gagwe ka gobane e se kgale, Gogo wa Magogo o tla re hlasela. (Hesek. 38:8-12) Ka nako yeo, re tla thaba kudu gore re ile ra nyaka go tsebja ke Modimo, e sego batho ba lefase le!

10. Ke selo sefe se sengwe seo re swanetšego go dula re se gopola e le gore re dule re tsebja ke Jehofa?

¹⁰ Selo sa bobedi seo re swanetšego go dula re se gopola ke se: Jehofa a ka bontšha ka ditsela tšeo re sa di naganago gore o a re tseba. Ge batho ba dira dilo tše dibotse e le feela gore ba bonwe ke batho, Jehofa a ka se ba putse. Ka baka la’ng? Ka gobane go etša ge Jesu a boletše, ge ba bangwe ba ba reta, ke wona moputso wa bona woo. (Bala Mateo 6:1-5.) Eupša Jesu o itše Tagagwe ‘o bona ka sephiring’ bao ba sa hwetšego theto bakeng sa dilo tše dibotse tšeo ba di direlago batho ba bangwe. O lemoga seo motho a se dirago ke moka a mo putsa goba a mo šegofatša. Lega go le bjalo, ka dinako tše dingwe Jehofa o re putsa ka ditsela tšeo re bego re sa di nagane. A re kweng ka e mengwe ya mehlala yeo e bontšhago seo.

11. Jehofa o ile a bontšha bjang gore o be a dutše a lebeletše Maria?

¹¹ Ge nako ya gore Morwa wa Modimo a tle lefaseng e be e fihlile, Jehofa o ile a kgetha kgarebe yeo e ikokobeditšego e lego Maria gore e be mmago ngwana yo yo bohlokwa. Maria o be a dula motsaneng wa Natsaretha, wo o bego o le kgole le Jerusalema le tempele ya yona e botse. (Bala Luka 1:26-33.) Ke ka baka la’ng Jehofa a ile a kgetha Maria? Morongwa Gabariele o ile a mmotša gore ‘Modimo o mo ratile.’ Ka morago Maria o ile a bontšha gore o tloga a rata Jehofa ge a be a bolela le yo mongwe wa leloko la gabo e lego Elisabetha. (Luka 1:46-55) Ee, Jehofa o be a dutše a lebeletše Maria, gomme ka ge Maria a ile a mmotegela o ile a mo šegofatša ka tsela yeo a bego a se a ka a e nagana.

12, 13. Jesu o ile a hlomphiwa bjang ka morago ga gore a belegwe, le nakong ya ge Maria a be a mo išitše tempeleng ka morago ga matšatši a 40 a belegwe?

 ¹² Ka morago ga gore Jesu a belegwe, Jehofa ga se a ka tsebiša batho ba go tuma goba babuši ba Jerusalema le Betlelehema seo se diragetšego. Go e na le moo, o ile a laela barongwa gore ba yo botša badiši ba ikokobeditšego bao ba bego ba dišitše dinku ka ntle ga Betlelehema seo se diragetšego. (Luka 2:8-14) Ke moka badiši ba ba ile ba yo bona ngwana yo a bego a sa tšwa go belegwa. (Luka 2:15-17) Maria le Josefa ba swanetše go ba ba ile ba makala kudu go bona Jesu a hlomphiwa ka tsela ye! Tsela yeo Jehofa a dirago dilo ka yona ga e swane le ya Sathane. Ka mohlala, ka morago ga gore Sathane a romele banna ba go hlahlwa ke dinaledi gore ba yo etela Jesu le batswadi ba gagwe, batho ka moka ba Jerusalema ba ile ba ferekana ge ba ekwa gore Jesu o belegwe. (Mat. 2:3) Ka baka leo, bana ba bantši bao ba bego ba se na molato ba ile ba bolawa.​—Mat. 2:16.

¹³ Ka morago ga matšatši a 40 Jesu a belegwe, Maria o be a swanetše go išetša Jehofa sebego. Ka gona Maria o ile a sepela le Josefa le Jesu leeto la dikhilomithara tše e ka bago tše senyane go tloga Betlelehema go ya tempeleng kua Jerusalema. (Luka 2:22-24) Ge Maria a dutše a sepela le Josefa le Jesu, mohlomongwe a ka ba a ile a ipotšiša ge e ba baperisita ba be ba tla dira selo se itšego se se kgethegilego go bontšha gore Jesu e be e tlo ba Mesia. Jesu o ile a hlomphiwa, eupša e sego ka tsela yeo Maria a ka bego a be a e naganne. Jehofa o ile a kgetha Simeone, e lego monna yo a bego “a lokile e bile a boifa Modimo,” gotee le moporofeta wa mosadi e lego Anna yo a bego a na le mengwaga e 84, go tsebiša gore Jesu e be e tlo ba Mesia yo a holofeditšwego, goba Kriste.​—Luka 2:25-38.

14. Jehofa o ile a šegofatša Maria bjang?

¹⁴ Na Jehofa o ile a tšwela pele a bontšha gore o tseba Maria ka ge a ile a godiša Jesu le go mo hlokomela? Ee. Modimo o ile a laela gore tše dingwe tša dilo tšeo Maria a ilego a di dira le go di bolela di ngwalwe ka Beibeleng. Go bonagala Maria a ile a se kgone go sepela le Jesu mengwageng e meraro le seripa ge a be a tšama a bolela ka Mmušo wa Modimo. Mohlomongwe ka ge Maria e be e šetše e le mohlologadi, o ile a swanelwa ke go dula Natsaretha. Le ge go na le dilo tše dintši tšeo Maria a ilego a se kgone go bona Jesu a di dira, eupša o be a le gona ge Jesu a ehwa. (Joh. 19:26) Ka morago, Maria o be a na le barutiwa ba bangwe kua Jerusalema matšatši a sego kae pele ga Pentekoste ge ba be ba tlo tšhollelwa moya o mokgethwa. (Dit. 1:13, 14) Go ka direga gore o ile a tlotšwa ka moya o mokgethwa gotee le barutiwa ba bangwe. Ge e ba go le bjalo, go ra gore o hweditše tokelo ya go phela le Jesu legodimong go ya go ile. Ruri go botega ga gagwe go mo dirile gore a hwetše moputso o kgahlišago!

15. Ge Jesu a be a le mo lefaseng, Jehofa o ile a bontšha bjang gore o mo amogetše?

¹⁵ Jesu o be a sa nyake go tsebja ke baetapele ba bodumedi goba ba dipolotiki ba mehleng ya gagwe. Eupša o swanetše go ba a ile a thaba kudu ge Jehofa a be a bolela le yena a le legodimong ka makga a mararo. Ka morago ga gore Jesu a kolobetšwe Nokeng ya Jorodane, Jehofa o ile a re: “Yo ke Morwa wa ka, morategi, yo ke mo amogetšego.” (Mat. 3:17) Ka ntle le Jesu, go bonagala Johane Mokolobetši e le yena feela a kwelego mantšu ao. Ke moka, mo e ka bago ngwaga pele Jesu a ka hwa, ba bararo ba baapostola ba gagwe ba ile ba kwa Jehofa a bolela ka Jesu gore: “Yo ke Morwa wa ka yo a rategago, yo ke kgahlwago ke yena; le mo theetšeng.” (Mat. 17:5) Mafelelong, matšatši a sego kae pele  Jesu a ka hwa, Jehofa o ile a bolela le Morwa wa gagwe gape.​—Joh. 12:28.

16, 17. Jehofa o ile a phagamiša Jesu bjang ka tsela yeo Jesu a bego a sa e nagana?

¹⁶ Le ge Jesu a be a tseba gore o tlo hwa ka tsela e hlabišago dihlong le go thomeletšwa ka gore ke morogaki, o ile a rapelela gore go direge thato ya Jehofa e sego ya gagwe. (Mat. 26:39, 42) “O ile a kgotlelela kota ya tlhokofatšo, a se be le taba le go hlabišwa dihlong,” ka gobane o be a nyaka go amogelwa ke Tatagwe, e sego batho. (Baheb. 12:2) Jehofa o ile a bontšha bjang gore o mo amogetše?

¹⁷ Ge Jesu a be a le mo lefaseng, o ile a rapelela go boela letagong leo a bego a na le lona ge a be a le legodimong le Tatagwe. (Joh. 17:5) Ga go na moo Beibele e re botšago gore Jesu o be a nyaka go hwetša se se fetago seo. O be a sa letela go phagamišetšwa maemong a godimo legodimong. Eupša Jehofa o ile a dira’ng? O ile a phagamiša Jesu ka go mo tsoša bahung ke moka a mo nea ‘boemo bja godimo’ legodimong. Le gona o ile a mo nea mpho yeo a bego a se a ka a e nea motho yo mongwe pele ga moo, e lego go se hwe. * (Bafil. 2:9; 1 Tim. 6:16) Ruri Jehofa o ile a bontšha ka tsela e kgahlišago kudu gore o amogetše Jesu!

18. Ke’ng seo se tlago go re thuša gore re se nyake go amogelwa ke lefase le?

¹⁸ Ke’ng seo se tlago go re thuša gore re se ke ra nyaka go amogelwa goba go tsebja ke batho ba lefase le? Dula o gopola gore ka mehla Jehofa o amogela bahlanka ba gagwe ba botegago le go ba putsa le gore gantši o ba putsa ka ditsela tšeo ba sa di letelago. Ga go na yo a tsebago ka mo go feletšego gore Jehofa o tlo re šegofatša bjang nakong e tlago. Eupša gona bjale ge re dutše re kgotlelela mathata le diteko tšeo di re welago lefaseng le le kgopo, anke re duleng re gopola gore lefase le le a feta. Ka gona go nyaka go amogelwa ke lefase le ke go senya nako. (1 Joh. 2:17) Ka ge Jehofa e le Tatago rena yo a re ratago, ‘ga se yo a sa lokago moo a ka lebalago modiro wa rena le lerato leo re le bontšhitšego leineng la gagwe.’ (Baheb. 6:10) Ruri o tla bontšha gore o a re amogela, e bile mohlomongwe o tla dira seo ka tsela yeo re sa kago ra e lora!