LEHONO go na le baloi ba ba botsana, batho ba babotse bao e lego di-vampire le batho ba bagolo le ba banyenyane bao ba dirišago maleatlana. Ba ke ba bangwe ba batho bao ba tletšego ka dipukung, dimubing le dipapading tša dibidio. Ke ka baka la eng batho ba bantši ba kgahlwa ke dilo tše? *

Moporofesara Claude Fischer, e lego setsebi sa ditaba tša mabapi le setšhaba, o ngwadile gore: “Nageng ya Amerika, batho ba go dumela gore go na le dipoko ba oketšegile kudu mengwageng e masome e fetilego. Mengwageng ya pele ga moo, ke motho o tee feela go ba lesome yo a bego a dumela gore go na le dipoko, eupša lehono ke motho o tee go ba bararo yo a dumelago gore go na le dipoko. Nyakišišong yeo e dirilwego go bafsa le batho ba bagolo, bafsa ba bantši ba boletše gore ba kile ba ya go batho bao ba kgonago go bala menagano gomme ba go botša dilo tšeo di tlago go go diragalela. Ba boletše gape gore ba dumela gore go na le dipoko le dintlo tša go poka.”

Ga go makatše ge lehono go tletše ditaba tša gore batho ba tsenwa ke batemona. Michael Calia o ngwadile ka makasineng wa The Wall Street Journal gore: “Taba ya gore lehono batho ba tsenwa ke batemona ditšong tše dintši ke ka baka la gore dipuku le dimubi di ile tša thoma go tlala ka di-zombie, di-werewolf le di-vampire mengwageng e lesome e fetilego.”

Pego e nngwe e re: “Batho ba bantši lefaseng ka moka ba dumela gore go na le dipoko, e bile ditšong tše dintši go na le dipuku tšeo di tletšego ka ditori tša dipoko.” Le gona nyakišišo yeo e dirilwego ke moporofesara Christopher Bader le moporofesara Carson Mencken, e lego ditsebi tša ditaba tša mabapi le setšhaba kua United States, “e bontšhitše gore batho ba bantšintši ba Amerika ba dumela go mohuta o itšego wa boloi.”

Na go bogela dimubi le ditori tšeo di nago le boloi goba go bala ka tšona ga go na bothata?