NA O kile wa ba le manganga gomme wa gana go kwa?— * Mohlomongwe o ile wa bogela lenaneo la thelebišene leo mmago goba tatago ba go boditšego gore o se ke wa le bogela. O ka ba o ile wa nagana ka seo ka morago gomme wa itshola ka ge o se wa kwa. Leina la motho o tee yo mathomong a ilego a gana go kwa ke Naamane. Anke re bone gore o ile a thušwa bjang gore a se sa ba le manganga.

Akanya re phela nywageng e 3 000 e fetilego. Naamane ke molaodi wa madira yo bohlokwa wa Siria. O tlwaetše go botša madira a gagwe gore a dire’ng, gomme a a mo kwa. Eupša Naamane o ba le bolwetši bjo bo šiišago bja letlalo bjo bo bitšwago lephera. Bo mo dira gore a bonale a tšhoša, le gona bo swanetše go ba bo mo kweša bohloko kudu.

Mosadi wa Naamane o na le ngwanenyana yo monyenyane wa mohlanka yo a tšwago Isiraele. Ka letšatši le lengwe ngwanenyana o botša mohumagadi yoo ka monna yo a bitšwago Elisha yo a lego kua nageng ya gabo. O re monna yoo a ka fodiša Naamane. Ge Naamane a ekwa ka seo, gateetee o nyaka go ya go Elisha. O tšea dimpho tše dintši gomme o sepela le madira a gagwe go ya Isiraele. O ya go kgoši ya Isiraele go yo e tsebiša gore ke ka baka la’ng a tlile moo.

Elisha o kwa ka seo gomme o romela molaetša go kgoši gore e romele Naamane go yena. Ge Naamane a fihla ntlong ya Elisha, Elisha o fo romela moromiwa wa gagwe gore a botše Naamane gore a hlape gašupa ka Nokeng ya Jorodane. Elisha o re ge Naamane a ka dira bjalo o tla fola. O nagana gore Naamane o ikwa bjang ka se?—

 O galefile. Ka gona o a ngangabala gomme o gana go kwa moporofeta wa Modimo. O botša madira a gagwe gore: ‘Go na le dinoka tše kaone kua gae tšeo nka hlapago go tšona.’ Naamane o thoma go tloga. Eupša na o tseba gore madira a gagwe ge a mmotšiša a re’ng?— ‘Ge nkabe moporofeta a go laetše gore o dire selo se segolo, na o be o ka se se dire? Bjale o re’ng o sa mo theetše ge a re o dire selo se senyenyane seo a go laetšego sona?’

Naamane o a theetša gomme o dira seo madira a gagwe a mmotšago sona. O itahlela le go tšwa ka nokeng ka makga a tshela. Ge a etšwa ka meetseng ka lekga la bošupa, Naamane o a makala—bolwetši bja gagwe bja letlalo bo hweletše! O boetše o fodile! Di tloga fase o tšea leeto la go boela legaeng la Elisha mo e ka bago bokgole bja dikhilomithara tše 48 go yo mo leboga. O nyaka go fa Elisha dimpho tša theko ya godimo, eupša moporofeta ga a tšee le e tee ya tšona.

Ka gona Naamane o kgopela se sengwe go Elisha. Na o tseba gore ke eng seo?— ‘Anke ke hwetše mmu wo o ka rwalwago ke dimeila tše pedi ke ye le wona gae.’ Na o tseba gore ke ka baka la’ng a nyaka seo?— Naamane o re o nyaka go neela dimpho tša sehlabelo go Modimo mo mmung wo o tšwago nageng ya batho ba Modimo, Isiraele. Ke moka Naamane o holofetša gore a ka se sa rapela modimo le ge e le ofe ka ntle le Jehofa! Ga a sa na manganga eupša o ikemišeditše go kwa Modimo wa therešo.

Na o kgona go bona kamoo o ka swanago le Naamane?— Ge e le gore o fela o eba le manganga go swana le Naamane, le wena o ka fetoga. O ka amogela thušo wa se sa ba le manganga le ka mohla.