Ke be ke Kgopišwa ke Tsela Yeo Batho ba Bego ba Apara le go Itokiša ka Yona

KA GE GO ANEGA EILEEN BRUMBAUGH

Ge ke be ke gola, ka gae re be re tsena kereke ya German Baptist Brethren, yeo e bego e latela melao ya kgale ya kereke yeo. Kereke ye e swana le kereke ya ma-Amish le ya ma-Menno. Mokgatlo wa Brethren o thomile kua Jeremane ka 1708 e le karolo ya bodumedi bja Piet. Puku ya The Encyclopedia of Religion e re bodumedi bja Piet bo dumela gore batho ba swanetše go tseba ka ebangedi ya Kriste. Ke ka baka leo bo ilego bja dira gore go be le masolo a baromiwa ao go ona ba bego ba nyaka baromiwa bao ba ka ba išago dinageng tša go fapafapana.

Ka 1719, sehlopha se senyenyane seo se bego se etelelwa pele ke Alexander Mack se ile sa ya Pennsylvania yeo e lego United States. Ga e sa le go tloga ka nako yeo, go ile gwa ba le dihlopha tše dingwe tša baromiwa gomme dihlopha tšeo di ile tša arogana tša ya dinageng tše dingwe tša go fapafapana. Sehlopha se sengwe le se sengwe se be se na le tsela ya sona ya go hlalosa dithuto tša Alexander Mack. Kereke ya rena e be e na le batho ba banyenyane bao e ka bago ba 50. Bjale go ile gwa gatelelwa taba ya gore re bale Beibele, le go thekga diphetho tšeo batho ba bagolo ba ka kerekeng ba di tšerego.

Ga e sa le go tloga ka borakgolo, lapa la gešo le be le phela ka melao ya kereke yeo. Le nna ke ile ka tsena kereke yeo gomme ka kolobetšwa ke na le mengwaga e 13. Ke godišitšwe ke rutwa gore ke phošo go diriša goba go ba le koloi, terekere, founo, radio goba selo le ge e le sefe seo se dirišwago ka mohlagase. Basadi ba be ba apara diaparo tše di teleletelele tša go khupetša mmele ka moka, ba sa kote meriri e bile ba be ba swanetše go dula ba apere se sengwe mo hlogong gore ba khupetše meriri. Banna bona ba be ba sa kote ditedu. Rena re be re ipotša gore go se be karolo ya lefase go bolela gore ga se ra swanela go apara diaparo tša matšatši a, go tlola make-up goba go apara mabenyabje goba jewellery. Re be re nagana gore ge motho a dira dilo tšeo, o dira sebe se segolo e bile o a ikgantšha.

Re be re rutwa gore re hlomphe Beibele kudu ka gore re be re e tšea e le dijo tša rena tša moya. Letšatši le letšatši pele re eja dijo tše mesong, re be re kopana ka moka gomme re dula ka dining room, re theetša papa a re balela kgaolo ya ka Beibeleng. Ke moka, rena re be re hlalosa seo yena a se badilego. Ka morago ga moo, papa o be a rapela gomme ka moka ga rena re khunama ka matolo. Ge papa a se no fetša go rapela, mma yena o be a rapela gape Thapelo ya Morena. Ke be ke dula ke fela pelo ya borapedi bja rena bja mesong ka gobane re be re dira dilo tša Modimo re le lapa ka moka.

Re be re dula polaseng ya kgauswi le toropo ya Delphi yeo e lego Indiana, moo re bego re gaša merogo ya go fapafapana gona. Re be re rekiša merogo yeo ka karikana mo seterateng goba re tšama re tsena ka ntlo le ntlo. Re be re bona go šoma ka thata e le tsela e nngwe ya go hlankela Modimo. Re be re dula re šoma ka thata, ntle le ka Sontaga ka gobane e be e le letšatši le le kgethwa. Eupša ka dinako tše dingwe lapa la gešo le be le dula le šoma dipolaseng moo e le go gore go be go e ba thata gore re dire dilo tša Modimo.

Lenyalo le Lapa

Ka 1963 ge ke be ke na le mengwaga e 17, ke ile ka nyalana le James. O be a tsena kereke yeo ke bego ke e tsena ya Baptist Brethren. Le yena o tšwa kgole le kereke ye, ka gobane e thomile go tsenwa ke borakgolokhukhu ba gagwe. Nna le James re be re tloga re nyaka go hlankela Modimo ka gobane re be re dumela gore kereke ya rena ke yona e nnoši e lego ya nnete.

Ka 1975 re be re šetše re na le bana ba tshela. Ke moka ka 1983, ra ba le ngwana wa bo šupa le wa mafelelo. Re be re na le ngwana o tee feela wa ngwanenyana, yoo leina la gagwe e lego Rebecca. Yena e be e le ngwana wa bobedi. Re be re šoma ka thata, re sa šomiše tšhelete e ntši e bile re phela bophelo bja go se be le dilo tše dintši. Re be re leka go ruta bana ba rena melao ya ka Beibeleng, yeo batswadi ba rena le batho ba bangwe ka kerekeng ba re rutilego yona.

Gore motho o bogega bjang le gore o apere bjang, e be e le selo se bohlokwa kudu ka kerekeng ya rena. Re be re nagana gore ka ge re sa kgone go bona pelo, moaparo o re thuša go bona seo se lego ka pelong ya motho. E bile re be re nagana gore ge motho a ka dira moriri go ra gore o a ikgantšha. Le gona, ge motho a ka apara seaparo sa go kgabišwa kudu, go ra gore le yena o be a ikgantšha. Tsela yeo re bego re tšeela moaparo godimo kudu, e be e dira gore re se ke ra bona dilo tše bohlokwa kudu, go swana le go diriša Mangwalo a Beibele.

Bophelo bja ka Teronkong

Mafelelong a bo-1960, Jesse e lego rangwane wa bana ba ka, yo le yena a gotšego a tsena kereke ya Brethren, o ile a išwa teronkong ka baka la go gana go tsenela bošole. Ge a be le moo teronkong, o ile a kopana le Dihlatse tša Jehofa tšeo le tšona di bego di swerwe ka baka la go gana go ya dintweng ka ge di be di hlompha melao ya Beibele. Jesse o ile a boledišana gantši le Dihlatse tša Jehofa ka Beibele, e bile o ile a kgahlwa ke tsela yeo ba bego ba e itshwere gabotse ka yona. Ka morago ga gore a ithute le Dihlatse tša Jehofa ka nako e telele, o ile a kolobetšwa gore e be Hlatse ya Jehofa. Seo se ile sa re nyamiša.

Jesse o ile a botša monna wa ka dilo tšeo a ithutilego tšona ka Beibeleng. O ile a ba a dira gore monna wa ka a hwetše dimakasine tša Morokami le Phafoga! ka mehla. Ge monna wa ka a be a bala dimakasine tšeo, o ile a nyaka go ithuta Beibele. Dimakasine tšeo di ile tša mo kgahla gomme tša mo dira gore a nyake go ithuta Beibele. Ka ge monna wa ka a be a nyaka go dula a hlankela Jehofa eupša a sa tsebe gore a dire seo bjang, o be a nyaka selo le ge e le sefe seo se ka mo thušago gore e be mogwera wa Modimo.

Bagolo ba kereke ya rena, ba be ba re kgothaletša gore re bale dimakasine tša bodumedi bja Amish, Memonnite le madumedi a mangwe ao a sepedišanago le Brethren, le ge re be re tšea madumedi ao e le karolo ya lefase. Eupša papa o be a sa rate Dihlatse tša Jehofa. O be a sa nyake gore le ka mohla, re bale dimakasine tša Morokami le Phafoga! Bjale ke ile ka nyama kudu ge ke bona monna wa ka a di bala. Ke be ke tšhaba gore o tlo thoma go latela dithuto tša maaka.

Eupša ke go tloga kgale monna wa ka a belaela tše dingwe tša dithuto tšeo di rutwago kerekeng ya Brethren ka gore di be di ganetšana le seo Beibele e se rutago. Ka mohlala, o be a sa kwešiše thuto ya gore ke ka baka la eng kereke ya bona e re ke sebe go dira mošomo o boima ka Sontaga. Kereke ye e be e ruta gore ga se phošo go nweša diphoofolo meetse ka Sontaga, eupša e ruta gore ke phošo go hlagola. Bagolo ba ka kerekeng yeo, ba be ba sa kgone go mmontšha lebaka ba diriša le ge e ka ba lengwalo le tee feela la ka Beibeleng gore ke ka baka la eng ba re’alo. Ganyenyane ganyenyane le nna ke ile ka thoma go belaela dilo tšeo ba bego ba re ruta tšona ka kerekeng.

Ka ge e be e le go tloga kgale re dumela gore kereke ya rena ke yona feela e lego ya nnete, re ile ra ipotšiša gore ge re ka e tlogela go tlo direga eng. Bjale re ile ra hwetša go le thata go tlogela kereke ya Brethren. Eupša matswalo a rena a be a sa re dumelele gore re no ba ka kerekeng yeo e lego gore ga e latele melao ya Beibele ka botlalo. Bjale ka 1983, re ile ra ngwala lengwalo ra hlalosa gore ke ka baka la eng re nyaka go tlogela kereke e bile ra kgopela gore lengwalo leo le balelwe phuthego ka moka. Ka morago ga moo, re ile ra kgaolwa ka kerekeng.

Go Tsoma Bodumedi bja Nnete

Ka morago ga go kgaolwa ka kerekeng, re ile ra thoma go nyaka bodumedi bja nnete. Re be re nyaka bodumedi bjo bo dirago dilo tšeo bo rutago batho gore ba di dire. Sa mathomo, re be re sa nyake bodumedi bjo bo tšeago karolo dintweng. Re be re sa nyaka bodumedi bjo batho ba bjona ba phelago bophelo bja go se be le dilo tše dintši e bile ba apara diaparo tše diteleletelele tša go se kgabišwe. Ka gore re be re bona bodumedi bjo bjalo e se karolo ya lefase. Go tloga ka 1983 go fihla ka 1985, re ile ra fetša nako ya rena re sepela naga ya United States ka moka re tšama re tsena dikereke ka moka re nyakana le bodumedi bja nnete. Re tsene kereke ya ma-Menno, Quakers le dikereke tše dingwe tšeo re bego re ipotša gore ga se karolo ya lefase.

Ka yona nako yeo re bego re sa emaema, Dihlatse tša Jehofa di ile tša re etela polaseng yeo re bego re dula go yona ya kua kgauswi le toropo ya Indiana. Re be re rata go ba theetša, eupša re be re ba kgopela gore ba diriše Beibele ya King James feela. Selo seo ke bego ke se rata ka Dihlatse tša Jehofa ke gore ga di ye ntweng, eupša go be go sa le thatanyana gore ke di theetše ka gore ke be ke bona okare e sa le karolo ya lefase ka baka la tsela yeo ba bego ba apara ka yona. Ke be ke nagana gore bodumedi bja bona ga se bja nnete. Ke be ke bona okare batho bao ba sa aparego go swana le rena, ba a ikgantšha. E bile ke be ke nagana gore ge motho a na le dilo tše dintši goba a humile o a ikgantšha.

Monna wa ka o ile a thoma go ya Holong ya Dihlatse tša Jehofa le bana ba bangwe ba rena ba bašemane. Ke ile ka nyama kudu. Monna wa ka o ile a nkgopela go ya le bona, eupša ke be ke ganagana. Ke moka ka letšatši le lengwe, monna wa ka o ile a re go nna: “Le ge o sa dumelelane le dithuto tša bona, wena e no ya o iponele ka a gago mahlo. O bone le gore ba swara batho bjang.” Monna wa ka o be a kgahlwa ke tsela yeo ba swaranago ka yona.

Mafelelong ke ile ka dumela go ya le bona, eupša ke le šedi kudu. Ke ile ka ya Holong yeo ya bona ya Mmušo ke apere roko e teleletelele ya go khupetša mmele ka moka, le kefa ya go kgokelelwa mo molaleng. E bile ba bangwe ba bana ba rena ba bašemane ba be ba sa apara dieta e bile ba se ba tšhepha. Eupša Dihlatse tša Jehofa di ile tša re amogela gabotse. Ke be ke nagana gore re fapane le bona eupša ba ile ba no re amogela.

Ke ile ka kgahlwa ke tsela yeo ba swarago batho ka yona. Eupša ke be ke sa nyaka go bona gore ba dira dilo bjang. Ge ba be ba emelela ba opela dikoša tša bona, nna ke be ke sa emelele le go opela dikoša tša bona. Ka morago ga diboka, ke ile ka ba hlaba ka dipotšišo. Ke ba botšiša ka dilo tšeo ke bego ke nagana gore ga ba di dire gabotse le gore mangwalo a mangwe a ra go reng. Le ge ke be ke se šedi ge ke ba botšiša dipotšišo, eupša batho ka moka ba ile ba se mphelele pelo. Le gona selo seo se ilego sa nkgahla ke gore ke be ke botšiša batho potšišo e tee, eupša ka moka ga bona ba nkaraba go swana. Ka dinako tše dingwe, ba be ba nngwalela karabo fase gore ke ipalele yona ge ke fihla gae, gomme seo se be se nthuša kudu.

Ka 1985, nna le lapa la ka re ile ra ya kopanong ya selete ya Dihlatse tša Jehofa kua Memphis, Tennessee, gore re yo bona gore ba dira dilo bjang. Monna wa ka o be a na le maledu, gomme rena re apere moaparo wola wa rena. Ka nako ya go khutša, Dihlatse tša Jehofa di be di fela di etla go rena gantši di re dumediša. Re ile ra kgahlwa ke tsela yeo ba ratago batho ka yona, le gore ba amogela baeng. Re ile ra kgahlwa le ke botee bjo ba nago le bjona. Le gore go sa šetšwe gore re mo kae, dithuto tša bona di no swana.

Monna wa ka o ile a kgahlwa ke ka tsela yeo Dihlatse tša Jehofa di ilego tša re kgahlegela ka yona, gomme o ile a dumela go ithuta Beibele. O be a hlahlobišiša selo se sengwe le se sengwe seo ba mo rutago sona go bona ge e ba e le nnete. (Ditiro 17:11; 1 Bathesalonika 5:21) Ge nako e dutše e eya, o ile a bona gore o hweditše nnete. Eupša nna ke be ke sa tšwa ke kgodišega, ke be ke nyaka go dira dilo gabotse. Ke be ke sa nyake go no tšeega feela le go ba bodumeding bjo e lego karolo ya lefase. Ge la mathomo ke be ke dumela go ithuta Beibele le Dihlatse tša Jehofa, ke be ke dula ke swere Dibeibele tše pedi ya King James ka letsogong le lengwe, le ya Modern New World ka letsogong le lengwe. Ke be ke dula ke lebelela temana e nngwe le e nngwe go Dibeibele tše tše pedi, go netefatša gore dilo tšeo ke di rutwago ke nnete.

Kamoo ke Ilego ka Thoma go Kgodišega ka Gona

Ge re be re dutše re ithuta Beibele le Dihlatse tša Jehofa, re ile ra ithuta gore Tatago rena wa legodimong ke Modimo o tee e sego boraro botee. Le gore re na batho re meoya e phelago (Genesi 2:7; Doiteronomio 6:4; Hesekiele 18:4; 1 Bakorinthe 8:5, 6) Re ile ra ithuta le gore hele ke lebitla leo re le tsebago leo batho ka moka re yago go lona, e sego lefelo leo batho ba fišwago go lona. (Jobo 14:13; Psalme 16:10; Mmoledi 9:5, 10; Ditiro 2:31) Go ithuta ka thuto ya hele go ile gwa nkgoma kudu moo e lego gore ke ile ka thoma go fetoša monagano ka ge kereke ya Brethren e be e sa tsebe gore e hlalose thuto yeo bjang.

Eupša ke be ke sa ipotšiša gore go tla bjang gore Dihlatse tša Jehofa, di be bodumeding bja nnete ka gore ke be ke nagana gore ke karolo ya lefase. Di be di sa phele bophelo bjo nna ke bego ke nagana gore ke bjo bonolo, e lego selo seo se bego se le bohlokwa kudu go nna. Eupša ke be ke bona gore ke tšona feela tšeo di kwago taelo ya Jesu ya go bolela ditaba tše dibotse tša Mmušo wa Modimo go batho ka moka. Ke be ke gakanegile kudu!​—Mateo 24:14; 28:19, 20.

Ka nako yeo, lerato leo Dihlatse tša Jehofa di nago le lona le ile la nthuša go bona gore ke bodumedi bja nnete. Phuthego ka moka ya Dihlatse tša Jehofa, e ile ya bontšha gore e rata lapa la ka. Ka ge batho ka moka ka phuthegong ba be ba dula ba re etela, ka dinako tše dingwe ba be ba no bolela gore ba tlo reka maswi le mae polaseng ya rena. Re ile ra bona gore ke batho ba go loka. Le ge Dihlatse tše dingwe tša Jehofa di be di ithuta Beibele le rena, seo se be se sa dire gore ba bangwe ka phuthegong ba se ke ba re etela. Eupša nako e nngwe le e nngwe ge batho ba ka phuthegong ba be ba le kgauswi le mo re dulago gona, ba be ba tsena gore ba tle ba re bone. Re be re tloga re nyaka go tseba Dihlatse tša Jehofa gomme re ile ra kgahlwa ke tsela yeo di ratago batho ka yona.

Re be re kgahlwa ke gore ba be ba sa rate batho bao ba lego ka phuthegong ya bona feela. Ge ke be ke dutše ke šogana le taba ya moaparo le go itokiša, kgaetšedi yo mongwe yo a bitšwago Kay Briggs, yoo a bego a kopanela phuthegong ya kgauswi le mo re bego re dula gona, o be a no kgetha go apara le go itokiša ka tsela e bonolo e bile a sa diriše make-up. Ka letšatši le lengwe o ile a nketela, ke ile ka ikwa ke lokologile go bolela le yena. Ke moka ka letšatši le lengwe, ngwanabo rena yo a bitšwago Lewis Flora, yoo le yena a gotšego a tsena kereke ya Brethren le yena o ile a tla a nketela. O ile a mpona mo sefahlegong di tloga fase gore ke gakanegile kudu, gomme o ile a nngwalela lengwalo le letelele la matlakala a lesome go leka go ntira gore ke se sa tshwenyega. Tsela yeo a ilego a mpontšha botho ka yona e ile ya nkgoma kudu. Ke ile ka ba ka lla. Ke be ke dula ke bala lengwalo leo gantšintši.

Ke ile ka kgopela ngwanabo rena wa molebeledi wa tikologo yoo a bitšwago O’Dell gore a ntlhalosetše lengwalo la Jesaya 3:18-23 le la 1 Petro 3:3, 4. Ke ile ka mmotšiša gore na o bona okare mangwalo a ga a bohlokwa gore re a diriše tabeng ya go apara gabonolo e le gore re thabiše Modimo. O ile a mpotšiša gore: “Na ke phošo go apara kefa goba na ke phošo go loga moriri?” Kerekeng ya rena ya Brethren re be re loga bana meriri gomme basadi ba apara dikefa. Ke ile ka kgahlwa ke ka tsela yeo molebeledi wa tikologo a se a ka a mphelela pelo le go mpontšha botho.

Ganyenyane ganyenyane ke ile ka kgodišega gore bjo ke bodumedi bja nnete. Eupša go be go sa ne le tabanyana e nngwe yeo e sa ntshwenyago kudu. Ke be ke sa kwešiše gore go reng basadi ba kota meriri. Bagolo ba ka phuthegong ba ile ba leka go ntlhalosetša gore meriri ya basadi ba bangwe e gola ka botelele mola ya basadi ba bangwe e gola ganyenyane. Ke moka ba ile ba mpotšiša gore: “Na re ka re meriri ya mosadi yo mongwe e phala ya mosadi o mongwe?” Le gona ba ile ba leka go nthuša gore ke bone gore go bohlokwa go diriša letswalo la ka ge go tliwa tabeng ya go itokiša le moaparo. E bile ba ile ba mpha selo seo nka se balago ge ke fihla gae.

Go Diriša Seo re Ithutilego Sona

Re be re nyaka go tseba dilo tšeo di bego di ka re thuša go tseba bodumedi bja nnete, gomme re ile ra di hwetša. Jesu o itše: “Bohle ba tla tseba ka se gore le barutiwa ba ka, ge e ba le ratana.” (Johane 13:35) Re be re kgodišegile gore Dihlatse tša Jehofa ke tšona feela tšeo di ratanago e le ka nnete. Eupša re be re sa na le bothatanyana bjo bongwe gape. Bana ba rena ba bagolo e lego Rebecca le Nathan, ba be ba sa gakanegile ka ge ba be ba kolobeditšwe kerekeng ya Brethren. Eupša ganyenyane ganyenyane, ba ile ba kgahlwa ke dithuto tšeo re bego re ba botša tšona le lerato leo ba ilego ba le bontšhwa ke Dihlatse tša Jehofa tše dingwe.

Ka mohlala Rebecca yena, ke kgale a nyaka go ba le segwera se sebotse le Modimo. Ka morago ga gore a ithute gore Modimo ga a re kgethele gore re tlo diragalelwa ke eng nakong e tlago le gore bokamoso bja rena e tlo ba eng, go ile gwa ba bonolo go yena gore a mo rapele. Le gona, ka morago ga gore a ithute gore Modimo ga se karolo ya boraro botee, eupša ke Modimo wa kgonthe yo a ka kgonago go mo ekiša, seo se ile sa mo thuša gore a be le segwera se sebotse le yena. E bile o ile a kgahlwa ke taba ya gore ge a bolela le Modimo, go be go sa hlokagale gore a diriše mantšu a kgale ao a lego ka Beibeleng ya King James. E bile ka morago ga gore a ithute gore re swanetše go rapela bjang le gore Modimo o re bopetše gore re tle re phele go ya go ile mo lefaseng, seo se ile sa mo dira gore a be le segwera se sebotse le yena.​—Psalme 37:29; Kutollo 21:3, 4.

Dilo Tšeo ka Moka ga Rena re Thabelago go di Dira ka Phuthegong

Ka 1987, nna le monna wa ka, le bana ba rena ba bahlano e lego, Nathan, Rebecca, George, Daniel le John, re ile ra kolobetšwa gore re be Dihlatse tša Jehofa. Harley yena o ile a kolobetšwa ka 1989 gomme Simon yena o ile a kolobetšwa ka 1994. Lapa la rena ka moka le bolela ka mafolofolo ditaba tše dibotse tša Mmušo wa Modimo tšeo Jesu Kriste a re laetšego go re di botše batho.

Barwa ba rena ba bahlano e lego, Nathan, George, Daniel, John, le Harley gotee le morwedi wa rena Rebecca ba ile ba šoma lekaleng la Dihlatse tša Jehofa la United States. George o sa hlankela moo, e bile go na bjale o na le mengwaga e 14 a le Bethele, gomme Simon, yoo a feditšego sekolo ka 2001, le yena a se kgale a ile Bethele. Barwa ba ba rena ka moka, ba hlankela e le bagolo goba bahlanka ba bodiredi ka phuthegong. Monna wa ka yena o hlankela e le mogolo ka phuthegong ya Thayer, kua Missouri, gomme nna ke swaregile kudu ka go bolela ditaba tše dibotse.

Go na bjale re na le ditlogolo tše tharo e lego Jessica, Latisha le Caleb. Le bona ba thabela go bona batswadi ba bona ba ba ruta gore ba rate Jehofa ka dipelo tša bona ka moka. Re le lapa ka moka re thabela gore Jehofa o re thušitše gore re be bagwera ba gagwe le go tseba batho bao ba bitšwago ka leina la gagwe bao ba bonagalago ka lerato leo a nago le lona.

Re kwela bohloko kudu batho bao ba nyakago go hlankela Jehofa, eupša matswalo a bona a tlwaeditšwe ke tsela yeo ba godišitšwego ka yona go e na le gore a tlwaetšwe ke Beibele. Re tshepa gore le bona ba ka tla ba thabela go ya ka ntlo le ntlo e sego go swana le rena nakong ya ge re sa rekiša merogo, eupša ba bolela ditaba tše dibotse tša Mmušo wa Modimo. Ke thaba kudu e bile ke a lla ge ke nagana ka tsela yeo batho ba Jehofa ba ilego ba se re felele pelo le go re bontšha lerato.

Ge ke be ke na le mengwaga yeo e ka bago e šupa, le ge ke šetše ke godile

James, George, Harley le Simon

Senepe sa ka sa ge ke be ke iša merogo mmarakeng se tšweletše kuranteng ya mo ke bego ke dula gona

Journal and Courier, Lafayette, Indiana

Ke na le lapa la ka lehono