RURI go a kgahliša go bona gore Jehofa o akgofiša modiro wa lefaseng ka moka wa borapedi bja therešo! (Jes. 60:22) Ka baka leo, go nyakega Diholo tša Mmušo tše di oketšegilego. Lefaseng ka moka, diholo tše difsa tše di fetago tše 13 000 di swanetše go agiwa goba go mpshafatšwa.

E le gore modiro wo o dirwe ka go akgofa le ka tsela yeo e sa senyego tšhelete, Sehlopha se Bušago se dirile diphetogo mafapheng a fapafapanego a go aga. Lefapha le lefsa leo le bitšwago Lefapha la Lefase ka Bophara la Bohlami le la go Aga leo le lego ntlongkgolo kua Brooklyn, New York, le be le dutše le šoma ka thata go akgofiša le go etiša pele modiro wa go aga le go mpshafatša Diholo tša Mmušo lefaseng  ka moka. Mafapha a Bohlami le a go Aga a Dinaga ao a lego makaleng a Afrika Borwa, Australasia, Bogare bja Yuropa le United States a rulaganya modiro wa go aga wa ditikologong tša gabo ona, morero o mogolo ke gore go akgofišwe modiro wa go aga Diholo tša Mmušo le go dira seo ka tsela ya go seketša tšhelete. Le gona Mafapha a Bohlami le a go Aga a Dinaga a tlwaetša makala a ditikologong tšeo di a hlokometšego go hlokomela meago e mengwe ya pušo ya Modimo. E bile, lekaleng le lengwe le le lengwe Lefapha la Bohlami le la go Aga la Tikologo le rulaganya modiro wa go aga le wa go hlokomela Diholo tša Mmušo le Diholo tša Kopano.

Ka January 2015, bagolo ka moka ba kua United States ba ile ba ba gona sebokeng se se kgahlišago seo ba bego ba se theeditše ka kgokaganyo ya Inthanete seo se ilego sa hlalosa mokgwa o mofsa wa go rulaganya, go aga le go hlokomela Diholo tša Mmušo. Tše ke tšeo ba di kwelego.

• Go Aga: Go tlo agwa Diholo tše di swanago go dirišwa ditlabakelo tša go aga tše di swanelago lefelong leo, e bile go latelwa tlhahlo yeo e tšwago Komiting ya Kgatišo ya Sehlopha se Bušago. Go ka se nyakege dilo tše dintši go hlokomela meago yeo eupša e tla ba yeo e tiilego, ya go bogega le yeo go sa bitšego tšhelete e ntši go e hlokomela.

• Go Hlokomela Meago: Phuthegong e nngwe le e nngwe go tla ba le baithaopi bao ba tlago go tlwaetšwa kamoo ba ka hlokomelago mafelo a rena a borapedi le go dira gore a se ke a senyega kapejana.

Ke therešo gore modiro wa go aga Diholo tša Mmušo le go di hlokomela ke o mogolo kudu. Eupša maiteko ao a dirwago ke batho ba Modimo ka moka a tla thuša go akgofiša modiro le go dira gore meneelo e šomišwe gabotse.