Banyalani bao e lego babulamadibogo ba kgethegilego bao ba šomago tšhemong yeo e lego kgole le metse e mengwe kua Brazil ba ile ba kwa ka Valdira, e lego mosadi yo a bego a kile a ithuta Beibele mengwaga e 13 pejana. Ka morago ga gore ba sepele tseleng ya marole yeo e se nago sekontiri le yeo go yona motho a swanetšego go tshela dinoka tše kotsi, babulamadibogo bao ba ile ba hwetša Valdira, yoo a bego a fagahletše go tšwela pele ka thuto ya gagwe.  Ka ge a be a dula tikologong yeo e lego kgole le toropo, go ile gwa swanelwa ke gore go dirwe ditokišetšo tše di kgethegilego. Le ge Valdira a be a na le founo, lefelo le nnoši leo a bego a kgona go amogela mogala gabotse e be e le sethokgweng kgole le gagabo. Go feta moo, Valdira o be a ka kgona go swara thuto feela ka morago ga iri ya senyane bošego. Nagana o bona kgarebe e dutše e nnoši sethokweng bošego e diriša founo go ithuta Beibele ka kerese.

Valdira o diriša founo ya gagwe le go theetša diboka tša Sontaga. O ya sethokgweng a swere Beibele ya gagwe, Morokami le kopelo gore a yo theetša diboka. Ge pula e ena, o swara le amporela.

Ka March, Valdira o ile a sepela dikhilomithara tše e ka bago tše 100 go ya Holong ya Mmušo ya kgauswi gore a be gona sebokeng se se kgethegilego moo go ilego gwa lokollwa Phetolelo ya Lefase le Lefsa ka Sepotokisi. O ile a thabela go hwetša Beibele yeo e mpsha. Ge bana babo rena le dikgaetšedi ba be ba reta Valdira ka maiteko ao a a dirago gore a ithute Beibele, o itše: “Ga ke bone se ke se dirago se le thata le gatee!”

Morafo wa Mayukpa ke Maindia a Amerika ao a dulago Colombia. Pele a ka etela e nngwe ya ditikologo tša moo, Frank, e lego mmulamadibogo yo a kgethegilego o ile a lemošwa ka kgoši ya moo e lego John Jairo, yo a kilego a raka dihlopha tše mmalwa tša baebangedi bao ba bego ba nyaka go rera moo. Lebakeng le lengwe, ge John a be a ekwa gore yo mongwe wa baruti ba bona o re batho ba ntšhe karolo ya lesome, o ile a mo raka moo a kitimišwa ke dikolo tša go thunyetšwa moyeng.

Frank o gopola ka gore: “Ge re fihla moo, motho wa pele yo a ilego a re theetša e bile yo mongwe wa barwedi ba John Jairo. Ka morago ga gore re mmontšhe puku ya Ke Eng Seo ge e le Gabotse Beibele e se Rutago? gateetee o ile a re: ‘Bjo ke bodumedi  bjo ke nyakago go ba go bjona!’ Ke moka o ile a kitima a yo botša tatagwe gore re fihlile. Gateetee tatagwe o ile a re bitša. Re ile ra ya go yena re tšhogile. Pele re ka bula molomo, o ile a re: ‘Ke a tseba gore le bodumeding bja therešo. Mengwaga e seswai e fetilego kua Becerril ke ile ka hwetša puku e swanago le ye le e neilego morwedi wa ka ka matlakaleng. Ke ile ka e bala, gomme ga e sa le go tloga ka yona nako yeo, ke be ke letile gore le tle mo. Ke tsebile gore ka letšatši le lengwe le tla tla. Ke nyaka gore le nthute Beibele, le rute lapa la ka le setšhaba se. Re le amogetše.’

“Mantšu ao a ile a dira gore mahlo a rena a tlale megokgo. Setšhaba ka moka se ile sa tla go tlo theetša ge re bolela ditaba tše dibotse, gomme John Jairo o ile a se tolokela seo re bego re se bolela ka segagabo bona. Ge re be re tloga, o ile a re adima  tonki e nyenyane gore e rwale merwalo ya rena. Gona bjale re swara dithuto tša Beibele tše 47 le batho ba 120 ba Mayukpa bao ba tšwago metseng e fapafapanego, go akaretša le John Jairo le morwedi wa gagwe.”

José, yo e kilego ya ba Mokatholika yo a ineetšego, o dula kua Ecuador. O ngwadile gore: “Ke be ke hloile Dihlatse tša Jehofa ka pelo ka moka. Ke di tlaišitše mengwaga e lesome. Ke be ke rulaganya dihlopha tša bahlolampherefere, ke swara Dihlatse gampe e bile ke bolela maaka a gore ke mahodu. Ke moka, ge re le seteišeneng sa maphodisa, ke be ke gapeletša gore e be nna ke notlelago disele tšeo Dihlatse di lego ka go tšona. Nakong e nngwe, re kile ra senya koloi ya Hlatse.  Lebakeng le lengwe gape, re ile ra lahlela sethuthuthu sa yo mongwe ka moleteng wo o nago le meetse.

“Ke moka ka 2010, ke ile ka swarwa ke bolwetši bja swine flu. Ngaka ya ka e ile ya re ke tloge tikologong e tonyago ya dithabeng tša Andes gomme ke ye mo go ruthetšego kgauswi le lebopo gore ke kgone go fola. Ke ile ka yo dula polaseng e nyenyane yeo e bego e le ya yo mongwe wa ba leloko tikologong ya lebopong gomme ka feleletša ke swanelwa ke go hlokomela polasa yeo ke nnoši. Ka ge ke be le nnoši, ke be ke duma go bolela le motho le ge e ka ba mang. Na o a tseba gore ke bomang ba ilego ba tla polaseng yeo? Ke Dihlatse tša Jehofa! Ka ge ke be ke lewa ke bodutu o šoro, ke ile ka boledišana le tšona gomme ka makatšwa ke kamoo di ilego tša diriša Beibele ka gona. Ke ile ka fo amogela thuto ya Beibele eupša e se gore ke a thabela. Ka morago ga go ithuta dikgwedi tše tshela, ke ile ka ya dibokeng ka lekga la mathomo. Ke ile ka kgahlwa kudu ke botho le lerato leo ke ilego ka le bontšhwa moo ke ilego ka ipotšiša gore: ‘Na mohlomongwe batho ba ke bahlanka ba therešo ba Modimo?’ Ke ile ka dira tšwelopele gomme mafelelong ka kolobetšwa ka April 2014.

“Ke ile ka itshola kudu gore ke be ke tlaiša Dihlatse. Lega go le bjalo, Jehofa o ile a nnea sebaka sa gore ke bontšhe gore ke itshotše. Ge re be re le kopanong ya tikologo ka October 4, 2014, ngwanabo rena yo a bego a nea polelo o ile a boledišana le nna bjalo ka motho yo a bego a tlaiša Dihlatse gomme a mpotšiša gore: ‘Ge o be o ka hwetša sebaka sa go kgopela tshwarelo go motho le ge e le ofe yo o mo tlaišitšego, motho yoo e be e tla ba mang?’ Kapejana ke ile ka re e be e tla ba ngwanabo rena yo a bitšwago Edmundo eupša ga ke tsebe gore nka mo hwetša bjang. Ka ge nna ke be ke sa tsebe, molebeledi wa tikologo o be a mmiditše gore a dule ka morago ga sethala. Batheetši ba ile ba kgomega kudu moo ba ilego ba lla ge nna le Edmundo re gokarelana gomme re lla gotee sethaleng.”

E be e le mosegare wa sekgalela gomme letšatši le fiša tšhiritšhiri ge sehlopha sa dikgaetšedi tšeo di bego di ile tšhemong  kua Asunción, Paraguay, se fetša tšhemo yeo se bego se e abetšwe. Lega go le bjalo, se ile sa phetha ka go dira boiteko bjo bo oketšegilego ka go tšwela pele dintlong tše sego kae feela tše di lego kgauswi. Yo mongwe wa Dihlatse tšeo o ile a re: “Mohlomongwe go na le motho yo a rapelago.” Ntlong ya moo khoneng, kgarebe e nngwe e ile ya dumediša dikgaetšedi tšeo e myemyela e eme mojako gomme ya di botšiša ge e ba e le Dihlatse tša Jehofa. Kgarebe ye e ile ya hlalosa gore kgweding e fetilego e ile ya huduga Bolivia gomme ya tla Paraguay ka baka la mošomo. E be e ithuta Beibele kua Bolivia pele ga ge e ka huduga. Tikologong yeo e bego e dula go yona go be go se na motho yo a tsebago gore e ka hwetša kae Dihlatse, ka gona e ile ya rapela ka gore: “Hle Jehofa, dira gore Dihlatse tša gago di nkhwetše.” Lona letšatšing leo dikgaetšedi di ile tša e etela gomme gwa rulaganywa thuto ya Beibele.