Naga Indonesia ke naga ya dihlakahlaka tše dintši kudu lefaseng gomme e gare ga kontinente ya Australia le ya Asia. Bontši bja dihlakahlaka tša yona tša ka godimo ga tše 17 500 di na le dithaba tšeo di nago le maswika a magolo le dithokgwa tše di ratwago ke pula tšeo di nago le mehlare e mentši. E na le dithabamollo tšeo di ka thunyago nako le ge e le efe tša ka godimo ga tše 100, le gona ke tikologo ya dithabamollo tše dintši go feta le ge e le kae lefaseng.

Batho Indonesia e maemong a bone ka go ba le badudi ba bantši lefaseng (ka morago ga China, India le United States) le gona e na le merafo ya ka godimo ga e 300. Badudi ba ka godimo ga seripagare ke morafo wa Majava le wa Masunda.

 Bodumedi Batho ba Indonesia ba e ka bago ba 90 lekgolong ke Mamoseleme. Ba bangwe ke Mahindu, Mabuddha goba ke ditho tša madumedi a manyenyane a Bokriste. Le gona batho ba bantši ba latela meetlo ya setšo ya madumedi a moo.

Leleme Dihlakahlakeng tšeo go bolelwa maleme a ka godimo ga a 700. Leleme leo le dirišwago ke batho ba bantši ke Seindonesia, seo se tšwago lelemeng la Semalay. Le gona batho ba bantši ge ba le ka gae ba bolela leleme la tikologong yeo ba dulago go yona.

Boiphedišo Batho ba bantši ke balemi goba ba a rekiša. Naga ye e na le ditšweletšwa tše dintši kudu, tše bjalo ka dilo tša go dirwa ka kota, oli e tala goba e sa hlotlwago le kgase, le gona e thuša dinaga tše dingwe ka go di romela rubber le makhura a mopalema.

Dijo Reise ke yona e jewago ka mehla. Dijo tše di ratwago kudu di akaretša nasi goréng (e lego reise yeo e gadikilwego le mae le merogo), satay (e lego nama yeo e bešitšwego) le gado-gado (e lego salate yeo e nago le moro wo o dirilwego ka dimake).

Boemo bja Leratadima Go a fiša e bile go ratwa ke dipula. Diphefo tša sehleng sa ge dipula di ena kudu di dira gore ka nako e nngwe go dule go na le monola gomme ka nako e nngwe go ba le moya o omilego. Dipula tša matlakadibe di tlwaelegile.