KA May 1963 go ile gwa tsoga meferefere ya go lwantšhana le ma-China sehlakahlakeng ka moka sa Leboa la Java. Toropo yeo e ilego ya hlaselwa kudu e be e le Sukabumi, moo lapa lešo le bego le na le kgwebo ya dilori. Batho ba makgolo bao e bego eka ba a gafa—go akaretša le baagišani ba rena—ba ile ba šwahlela ka lapeng lešo. Re be re tšhogile kudu ge bahlolampherefere ba be ba senya le go tšea dithoto tša rena.

Ka morago ga gore bahlolampherefere bao ba sepele, baagišani ba bangwe ba rena ba ile ba tla go tlo re homotša. Tate o ile a dula le bona lebatong ka phaphošing ya bodulo. O ile a hwetša Beibele ya gagwe e kgolo ya Sesunda gare ga dilo tšeo di bego di sentšwe. O ile a e bula gomme a laetša baagišani ba rena gore mathata ka moka ao a re welago go boletšwe ka ona e sa le pele ka Beibeleng. Ke moka a ba hlalosetša le ka kholofelo e kgahlišago ya Mmušo wa Modimo.

Tate ga se a ka a dula a swaregile ka go kgoboketša mahumo a lefase. Ka mehla o be a re gopotša gore: “Dilo tša moya di swanetše go tla pele bophelong!” Mohlala wa tate wa go fišegela dilo tša moya o dirile gore mma, bana bešo ba bahlano, rakgolo wa ka wa mengwaga e 90 le ba leloko ba bantši gotee le baagišani ba amogele therešo.