MMA o be a na le pelo e botse, a na le bogwera e bile a rata Beibele. Ge a be a kopana le Gertrud Ott, moromiwa wa kua Manado, ka Leboa la Sulawesi, o ile a dumela go ithuta Beibele ka ntle le go dikadika gomme a amogela therešo. Eupša tate, e lego Erwin, mošomi wa maemo a godimo pankeng yoo ka morago e ilego ya ba modulasetulo wa lefelong la go adimišana ditšhelete la Jakarta Stock Exchange, ka bogale o ile a ganetša bodumedi bja gagwe bjo bofsa.

Ka letšatši le lengwe tate o ile a tšhošetša mma.

Ka bogale o ile a mmotša gore: “O tla swanelwa ke go kgetha magareng ga ka le bodumedi bja gago!”

Mma o ile a fetša nako e telele a naganišiša ka taba ye. Ke moka o ile a araba ka botho a re: “Ke le nyaka ka moka—wena le Jehofa.”

Tate o ile a hloka mantšu, gomme kgalefo ya gagwe ya okobala.

Ge nako e dutše e eya, tate o ile a thoma go dumelela mma go tšwela pele ka bodumedi bja gagwe, ka ge a be a mo rata kudu gomme a tšeela godimo bohlale bja gagwe le temogo.

 Lega go le bjalo, mma o be a nyaka gore monna wa gagwe le yena a amogele therešo. Ka morago ga gore a rapele go tšwa pelong ka taba ye, o ile a gopola gore tate o be a rata go ithuta maleme. Ka gona o ile a phetha ka go bea dikgatišo tša Seisemane tšeo di theilwego Beibeleng moo di bonagalago ka mo gae. O ile a mmotša gore: “Ke leka go kaonefatša Seisemane sa ka.” Ka ge mma a be a lemogile gore tate o rata go bolela phatlalatša, o ile a mo kgopela le gore a mo thuše ge a na le polelo Sekolong sa Bodiredi sa Pušo ya Modimo. Tate o ile a dumela. Ka ge mma a be a lemogile gore tate o rata go amogela baeng, o ile a mo kgopela ge e ba ba ka amogela molebeledi wa tikologo ka gae. O ile a dumela. Le gona, ka ge mma a be a tseba gore tate o rata lapa la gagwe, o ile a šišinya ka botho gore na o be a ka se rate go dula le bona dikopanong tša Bokriste. Le gona moo o ile a dumela.

Maiteko a mma a go se fele pelo le a go dira dilo ka bohlale ganyenyane-ganyenyane a ile a nolofatša pelo ya tate. Ka morago, ge lapa lešo le hudugetše Engelane, o ile a ya dibokeng gomme ya ba mogwera wa John Barr, yoo e ilego ya ba setho sa Sehlopha se Bušago sa Dihlatse tša Jehofa. Ngwageng wona woo, tate o ile a kolobetšwa, gomme seo sa thabiša mma kudu. Mengwageng e latetšego, tate o ile a mo rata le go feta.

Ba bangwe ba bagwera ba rena ba be ba swantšha mma le Lidia, e lego mosadi wa Mokriste wa lekgolong la pele la nywaga yo a bego a amogela baeng ka botho. (Dit. 16:14, 15) Eupša nna ke nagana gore o be a swana le Sara, yoo a ilego a ikokobeletša monna wa gagwe Aborahama ka lethabo. (1 Pet. 3:4-6) Mma o be a hlwekile boitshwarong, a hlompha e bile e tloga e le mosadi yo a tiilego moyeng, yoo a bego a kgoma batho ka moka bao ba bego ba mo tseba. Mohlala wa gagwe ke wona o dirilego gore tate a amogele therešo. Nna ke be ke mo lebelela e le morwedi wa kgonthe wa Sara.