Ka 2008, Indonesia e ile ya fihlelela palo ya godimo kudu ya bagoeledi ba 21 699. Meago ya lekaleng e be e tletše. Le gona, ka baka la ge lekala leo le be le agilwe nakong ya ge modiro wa rena o be o thibetšwe, le be le le kgole. Go be go le molaleng gore go nyakega lekala le legolwanyana kgauswi le Jakarta.

 Ka morago ga mengwaga e ka bago e mebedi, bana babo rena ba ile ba reka lefelo leo le bego le fapane kudu le la ofisi ya lekala yeo ba bego ba e diriša—ba ile ba reka lebato ka moka la bo-31 la moago wa sebjalebjale wa diofisi wo o nago le mabato a 42 kgauswi le bogare bja Jakarta. Ka morago ga moo bana babo rena ba ile ba reka mabato a 12 moagong wa bodulo wa kgauswi le moo gore go tle go dule bana babo rena le dikgaetšedi ba 80 goba go feta moo bao ba hlankelago Bethele. Le gona ba ile ba reka moago wa mabato a mahlano gore e be lefelo la mafapha ao a hlokomelago bao ba hlankelago Bethele.

Sehlopha sa bahlanka ba go aga bao ba tšwago dinageng tše di fapafapanego ba ile ba šoma le dikhamphani tša moo tša go aga gore ba lokiše diofisi le mafelo a bodulo. Darren Berg, e lego molebeledi wa lefapha la go aga o re: “Gantši Jehofa o ile a re thuša go rarolla mathata ao a bego a bonagala e le a magolo kudu. Ka mohlala, re be re nyaka go tsenya sedirišwa sa maemo a godimo kudu sa go hlwekiša meetse, eupša ka ge bahlankedi ba mmušo ba be ba sa tlwaelana le mokgwa wo wa thekinolotši ba ile ba gana go re nea tumelelo. Ke moka ngwanabo rena wa lefelong leo yo e lego moentšineare o ile a iša taba ya rena go mohlankedi wa mmušo wa maemo a godimo kudu. Kapejana mohlankedi yoo o ile a re nea tumelelo, a bolela gore o tloga a bota seo bana babo rena ba bego ba nyaka go se dira.”

Meago e mefsa ya lekala e ile ya neelwa ka February 14, 2015. Setho sa Sehlopha se Bušago e lego Anthony Morris III o ile a nea polelo ya go neela meago yeo. Vincent Witanto Ipikkusuma, e lego setho sa Komiti ya Lekala o re: “Gona bjale lekala le tikologong ya maemo a godimo kudu gare ga tše dingwe tša dikhamphani tše dikgolo kudu Indonesia. Ga re sa  iphihlile. Ga bjale batho ba kgona go bona Dihlatse tša Jehofa. Ba a bona gore ga go na mo re yago.”

Mengwageng ya morago bjale, Dihlatse tše dintši tše di tšwago lefaseng ka moka di hudugetše Indonesia. Lothar Mihank o hlalosa gore: “Bao ba hlankelago tlhokagalong ba kgatha tema ya bohlokwa dinageng tša go swana le ya gabo rena. Ba abelana le bana babo rena phihlelo yeo ba nago le yona. Ba thuša diphuthego tšeo ba hlankelago go tšona go gola tsebong le go ba mafolofolo gotee le go tšeela godimo kudu bana babo bona ba lefaseng ka moka.” Ba tutueleditšwe ke’ng go hudugela moo? Le gona dilo di ba sepeletše bjang? Bala tše dingwe tša dilo tšeo ba di boletšego.

Jason le Casey Gibbs bao ba tšwago United States ba re: “Re ile ra lebelela dipalo tša ka gare ga Puku ya Ngwaga go bona gore mogoeledi o tee o bolela ditaba tše dibotse go baagi ba bakae dinageng tša lefase ka moka, gomme ra hwetša gore Indonesia ke e nngwe ya dinaga tšeo di nago le palo ya godimo kudu ya batho bao ba swanetšego go botšwa ditaba tše dibotse. Ke moka bana babo rena ba bangwe bao ba bego ba hlankela tlhokagalong ba ile ba re botša gore go na le batho ba bantši kudu bao ba thabelago Indonesia. Ka gona re ile ra founela ofisi  ya lekala ya Indonesia, gomme ba re romela sehlakahlakeng sa Bali. Tšhemo ya batho bao ba bolelago Seisemane Indonesia e be e sa tšwa go bulega, ka gona re be tla kgona go thuša di sa tloga fase. Re be re rulagantše go fetša ngwaga moo, eupša re šetše re dutše mengwaga e meraro. Batho ba bantši bao re bolelago le bona ditaba tše dibotse ga se ba ka ba kwa ka Dihlatse tša Jehofa. Ruri go bolela ditaba tše dibotse ke modiro o kgotsofatšago!”

Stuart le Mandy Williams, e lego banyalani ba mengwageng ya magareng bao ba tšwago Australia ba re: “Re be re nyaka go boledišana le batho bao ba nyoretšwego therešo, ka gona re ile ra hudugela Indonesia. Kua Malang, ka Bohlabela bja Java, re ile ra kopana le barutwana ba makgolo ba ba tsenago yunibesithing bao ba bolelago Seisemane bao ba bego ba nyaka go tseba ditaba tše dibotse. Le gona ba rata wepesaete ya jw.org! Tšhemo ya mo e bose kudu.”

Takahiro le Mari Akiyama, bao e lego babulamadibogo kua Yogyakarta, sehlakahlakeng sa Java, ba re: “Ge re le mo re ikwa re šireletšegile kudu go feta ge re be re le gae kua Japane. Batho ba mo ba na le botho le mekgwa e mebotse. Ba bantši ba bona ba nyaka go tseba ka madumedi a mangwe, kudukudu bafsa. Ka letšatši le lengwe ge re be re le tafoleng ya rena ya go nea bohlatse, re ile ra sepediša dimakasine tše e ka bago tše 2 600 ka diiri tše hlano feela.”

Dan le Janine Moore, e lego banyalani bao ba lego mengwageng ya mafelelong a bo-50, ba hlalosa ka gore: “Ge re eya go bolela ditaba tše dibotse, batho ba a re kgobokanela. Re a myemyela ge re ba bona gomme le bona ba a myemyela. Ba nyaka go tseba, ba a thabela e bile ba thaba kudu ge ba ekwa molaetša wa Beibele. Ge re ba bontšha temana e itšego ka Beibeleng, ba bangwe ba botšiša gore: ‘Na nka e ngwala fase?’ Ba makatšwa kudu ke bohlale bjo bo lego ka Beibeleng. Re šetše re feditše ngwaga re le mo, eupša re a itshola gore ke ka baka la eng re diegile go tla. Re be re nyaka tšhemo yeo batho ba gona ba bantši ba sa kago ba kwa ka Jehofa—gomme re e hweditše!”

 Misja le Kristina Beerens ba tlile nageng ye e le baromiwa ka 2009 gomme ga bjale ba modirong wa bosepedi. Ba re: “Gaešita le Sehlakahlakeng sa Madura sa ka Bohlabela bja Java, e lego e nngwe ya ditikologo tše di tletšego Mamoseleme kua Indonesia, batho ba arabela gabotse kudu. Batho ba emiša dikoloi tša bona gomme ba kgopela dimakasine. Ba re: ‘Ke Momoseleme, eupša ke thabela go bala dimakasine tše. Na nka tšeela bagwera ba ka tše dingwe?’ Re ipshina ka tšhemo mo!”

Ka 1931, ge Frank Rice a be a fihla Jakarta, Indonesia go be go dula batho ba e ka bago ba 60 000 000. Lehono palo ya badudi ba mo e kgauswi le go fihla go 260 000 000, gomme seo se dira gore Indonesia e be naga ya bone lefaseng ka go ba le badudi ba bantšintši.

 Ge tše ka moka di direga, Dihlatse tša Jehofa mo Indonesia le tšona di ile tša oketšega kudu. Ka 1946, ka morago ga Ntwa ya Bobedi ya Lefase go be go na le bagoeledi ba botegago ba lesome feela. Lehono, nageng ye go na le bagoeledi ba ka godimo ga ba 26 000—e lego bohlatse bjo bo lego molaleng bja tšhegofatšo ya Jehofa! Le gona ka ge batho ba 55 864 ba bile gona Segopotšong ka 2015, go bonagala go ka ba le koketšego e nngwe.

Jesu o itše: “Ee, puno ke e kgolo eupša bašomi ke ba sego kae. Ka baka leo, kgopelang Mong wa puno gore a romele bašomi punong ya gagwe.” (Mat. 9:37, 38) Bahlanka ba Jehofa Indonesia ba bolela mantšu ao. Ba ikemišeditše go tšwela pele ba šoma ka thata gore ba thuše go kgethagatša leina la Jehofa le legolo setšhabeng se sa sehlakahlakeng.—Jes. 24:15.