KA MASA a October 1, 1965, mašole a Indonesian Communist Party a ile a bolaya balaodi ba bagolo ba tshela ka maiteko a go menola mmušo. Mmušo o ile wa tšea kgato ka ponyo ya leihlo eupša ka tsela e sehlogo. Go seo se bego se hlaloswa e le “moletlo wa bošoro” wa nageng ka moka, batho bao e ka bago ba 500 000 bao ba gononelwago gore ke ba bangwe ba mokgatlo woo ba ile ba bolawa gasehlogo.

Ka morago ga dibeke tše mmalwa maiteko ao a go menola mmušo a se a atlega, molaodi yo mogolo wa mašole o ile a mpotša gore leina la ka ke la mathomo maineng a baetapele ba bodumedi ba tikologong ya gešo bao makomanisi a bego a nyaka go ba bolaya. O ile a ba a nyaka go yo mpontšha moo lebitla la ka le epilwego gona, e lego moo ba ntokišeleditšego go yo mpoloka, eupša ka gana ka botho. Ka ge go be go tletše dikgaruru tša dipolotiki, ke be ke sa nyake go bonwa ke na le yena ka ge seo se be se ka dira gore ke tsebje ke le Mokriste yo a tšeago lehlakore dipolotiking.