Nakong ya ge modiro wa rena o be o thibetšwe, diphuthego tše dintši di ile tša tšwela pele di swara diboka ka magaeng a bana babo rena. Lega go le bjalo, e le gore di se ke tša ipiletša mahlo a batho, diphuthego tše dintši di be di sa opele dikopelo tša Mmušo. Mafelo a mangwe a go swarela diboka a ile a phuruphutšwa ke bahlankedi ba mmušo, eupša gantši ba be ba sa šitiše bana babo rena.

Gantši bana babo rena ba be ba diriša meletlo ya go bokana gotee ga malapa goba manyalo go swara dikopano tše dikgolo. Tagor Hutasoit o hlalositše gore: “Gantši banyalani ba be ba ngwadiša lenyalo la bona ke moka ba hwetša tumelelo maphodiseng ya gore ba dire monyanya o mogolo. Nakong ya moletlo, banyalani ba be ba dula sethaleng ge bana babo rena ba nea dipolelo tšeo di theilwego Beibeleng.”

Kopanong e nngwe lephodisa le lengwe le ile la boledišana le Tagor ka thoko.

Lephodisa leo le ile la re go yena: “Manyalo a mantši a tšea diiri tše pedi goba tše tharo feela. Ke ka baka la’ng manyalo a lena a thoma mesong gomme a fela bošego?”

Tagor o ile a araba ka gore: “Banyalani ba bangwe ba na le mathata a mantši gomme ba hloka keletšo yeo e ka ba thušago yeo e lego ka Lentšung la Modimo.”

 Lephodisa leo le ile la dumela ka hlogo ke moka la re: “Taba ye e a kwagala.”

Ba itira eka ba swere moletlo wa manyalo a mantši, bana babo rena ba ile ba nea tše dingwe tša dipolelo tša Kopano ya Selete ya 1983 ya sehlogo seo se rego, “Botee bja Mmušo” lepatlelong le legolo la dipapadi kua Jakarta. Palo ya bana babo rena le batho bao ba thabelago ba e ka bago ba 4 000 ba bile gona kopanong yeo, gomme batho ba 125 ba ile ba kolobetšwa ka sephiring lefelong le itšego pele kopano e ka thoma.  Ka morago ge thibelo e be e se sa le šoro kudu, bana babo rena ba ile ba swara dikopano tšeo go tšona go bilego le batho ba bantši kudu, go akaretša le yeo go yona go bilego le batho ba ka godimo ga ba 15 000.

Mengwageng ya bo-1980 le ya bo-1990, ofisi ya lekala e ile ya kgopela mmušo leboelela gore o tloše thibelo modirong wa Dihlatse tša Jehofa. Bana babo rena ba dinageng tše dingwe le bona ba ile ba ngwalela mmušo wa Indonesia le baemedi ba wona, ba botšiša gore ke ka baka la eng modiro wa Dihlatse tša Jehofa o thibetšwe Indonesia. Bahlankedi ba bantši ba mmušo ba be ba thekga taba ya gore thibelo e tlošwe modirong wa rena, eupša Molaodi yo Mogolo wa mokgatlo wa Christian Community Guidance o ile a thibela maiteko a bona gantši.

Ka 1990, bana babo rena ba ile ba fihlelela phetho ya gore go ka kgonega gore ba age ofisi ya lekala e mpsha lefelong leo le utegilego. Wona ngwageng woo, Sehlopha se Bušago se ile sa dumelela gore go rekwe lefelo kgauswi le Bogor, e lego toropo e nyenyane yeo e lego dikhilomithara tše e ka bago tše 40 ka borwa bja Jakarta. Lega go le bjalo, ke bana babo rena ba sego kae feela ba lefelong leo bao ba bego ba kgona go aga. Bjale, ba be ba tla thušwa ke mang go aga moago woo o mofsa?

Ba ile ba thušwa ke bana babo rena ba lefaseng ka moka. Ofisi ya go Aga ya Brooklyn le Ofisi ya Boentšineare ya Tikologo kua Australia di ile tša thala dipolane tša moago woo. Baithaopi ba e ka bago ba 100 bao ba tšwago dinageng tše dingwe ba ile ba thuša ka bokgoni bja bona mengwageng e mebedi ya modiro wa go aga.

Hosea Mansur, e lego ngwanabo rena wa Moindonesia yo a bego a bolelela bana babo rena go bahlankedi ba moo ba mmušo o itše: “Ge bahlankedi ba bangwe ba mmušo ba Mamoseleme ba be ba bona ditlhaka tša maina a ka, e lego H.M., helemeteng ya ka, ba be ba nagana gore tlhaka H e ra gore  ‘Hājjī,’ e lego sereto sa motho wa maemo a godimo kudu yo a felago a etela lefelo le lekgethwa la Mamoseleme kua Mecca. Ka gona ba be ba ntlhompha kudu. Yona taba yeo e nyenyane e ile ya dira gore go be bonolo go rulaganya modiro wa rena.”

Ofisi e mpsha ya lekala e ile ya neelwa ka July 19, 1996. John Barr, e lego setho sa Sehlopha se Bušago, o ile a fa polelo ya go neela moago woo. Batho ba 285 bao ba bego ba le gona ba be ba akaretša ba 118 bao ba bego ba etšwa makaleng a fapafapanego le bao e kilego ya ba baromiwa dinageng tše dintši le ditho tše 59 tša lapa la Bethele ya Indonesia. Matšatši a mabedi ka morago ga go neelwa ga lekala, batho ba 8 793 ba bile gona Kopanong ya Selete ya sehlogo se se rego, “Batseta ba Khutšo ya Modimo” kua Jakarta.

Ka 1998, Soeharto (Suharto) yo e bego e le kgale e le Mopresidente wa Indonesia o ile a rola modiro, gomme seo sa bula tsela ya gore go be le mmušo o mofsa. Ka yona nako yeo, bana babo rena ba ile ba matlafatša maiteko a bona a go dira gore thibelo e tlošwe modirong wa rena.

Ge Mongwaledi wa Mmušo wa Indonesia e lego Morena Djohan Effendi a be a etetše New York ka 2001, o ile a etela Bethele ya Brooklyn gomme a ba le seboka le ditho tše tharo tša Sehlopha se Bušago. O ile a kgahlwa kudu ke seo a se bonego, le gona a dumela gore Dihlatse tša Jehofa di tumile gabotse lefaseng ka moka. Morena Effendi o ile a thekga taba ya gore thibelo e tlošwe modirong wa rena, eupša a re phetho e tla dirwa ke moahlodi yo mogolo wa Indonesia, e lego Morena Marzuki Darusman.

Moahlodi yo mogolo le yena o be a dumelelana le taba yeo, eupša bahlankedi ba mmušo bao ba sego botho ba lefapheng la gagwe ba be ba goga maoto ba holofetše gore go se go ye kae motho yo mongwe o tla bewa maemong a gagwe. Mafelelong ka June 1, 2001, Tagor Hutasoit o ile a biletšwa ofising ya moahlodi yo mogolo. Tagor o gopola gore: “Mengwageng e ka bago e 25 pejana, ka ofising yona ye, ke ile ka newa lengwalo la semolao leo le bolelago gore modiro wa Dihlatse tša Jehofa o thibetšwe. Eupša letšatšing le, ge moahlodi yo mogolo a be a tlile mošomong la mafelelo, o ile a nnea lengwalo la semolao leo le bolelago gore thibelo e tlošitšwe modirong wa rena.”

Ka March 22, 2002, mokgatlo wa Dihlatse tša Jehofa kua Indonesia o ile wa ngwadišwa semmušo ke Lefapha la Ditaba tša Bodumedi. Molaodi yo mogolo wa lefapha leo o ile a botša baemedi ba lekaleng gore: “Lengwalo le la go ngwadišwa semolao ga le le nee tokologo ya go hlankela Modimo. Tokologo yeo e tšwa go Modimo. Lengwalo le le hlalosa gore bodumedi bja lena bo tsebja semolao mmušong. Ga bjale le na le ditokelo tše di swanago le tša madumedi a mangwe, gomme mmušo o tla le direla seo le se hlokago.”