“Lengwalo ka moka le buduletšwe ke Modimo.”—2 Timotheo 3:16, Phetolelo ya Lefase le Lefsa.

O ka hwetša dikarabo tše di kgotsofatšago tša dipotšišo tše bohlokwa kudu bophelong.—Diema 2:1-5.

O ka hwetša tlhahlo e holago ya bophelo bja letšatši le letšatši.—Psalme 119:105.

O ka ba le kholofelo ya kgonthe ka bokamoso.—Baroma 15:4.

Ee, e re re nee mabaka a mararo feela:

• E dumelelana ka tsela e makatšago. Beibele e ngwadilwe ke batho ba e ka bago ba 40 nywageng e 1 600. Bontši bja bona ga se ba ka ba tsebana. Lega go le bjalo, puku ye ka moka e a dumelelana, e na le sehlogo se tee!

• Histori ya yona e a botega. Gantši boradihistori ba lefase ga ba rate go utolla mafokodi a batho ba gabo bona. Eupša bangwadi ba Beibele ba ngwadile ka go lebanya diphošo tšeo di dirilwego ke bona beng le tšeo di dirilwego ke ditšhaba tša gabo bona.—2 Dikoronika 36:15, 16; Psalme 51:1-4.

• Boporofeta bja yona bo dula bo phethagala. Beibele e boletše ka go fedišwa ga motse wa bogologolo wa Babilona nywageng e ka bago e 200 e sa le pele. (Jesaya 13:17-22) E boletše tsela yeo Babilona e bego e tla fenywa ka yona ya ba ya bolela le leina la motho yo a bego a tla e fenya!—Jesaya 45:1-3.

Diporofeto tše dintši tša Beibele di phethagetše gaešita le ditabeng tše dinyenyane kudu. Na re ka se letele gore go be bjalo ka Lentšu la Modimo?—2 Petro 1:21.