“Modimo wa legodimo o tla hloma mmušo wo o ka se kego wa fedišwa.”—Daniele 2:44, Phetolelo ya Lefase le Lefsa.

“Re neilwe morwa; pušo e tla ba legetleng la gagwe.”—Jesaya 9:6.

• Pušo ya go loka yeo e ka holago wena ka bowena.—Jesaya 48:17, 18.

• Lefaseng le lefsa le le tlago, o tla phela bophelo bjo bo phethagetšego mmeleng le go thaba.—Kutollo 21:3, 4.

Ee, e re re nee mabaka a mabedi feela:

• Jesu o bontšhitše seo Mmušo wa Modimo o tlago go se fihlelela. Jesu o rutile balatedi ba gagwe go rapelela Mmušo wa Modimo gore o tle le gore thato ya Modimo e dirwe mo lefaseng. (Mateo 6:9, 10) Jesu o bontšhitše kamoo thapelo yeo e tlago go arabja ka gona.

  Ge Jesu a be a le mo lefaseng, o ile a fepa bao ba bego ba swerwe ke tlala, a fodiša balwetši le go tsoša bahu! (Mateo 15:29-38; Johane 11:38-44) Ka ge Jesu e le Mmuši wa nakong e tlago Mmušong wa Modimo, o neile ponagatšo e botse kudu ya seo Mmušo woo o tlago go se direla balata ba wona.—Kutollo 11:15.

• Maemo a lefase a kgonthišetša gore Mmušo wa Modimo o tla tla kgauswinyane. Jesu o boletše e sa le pele gore pejana ga ge Mmušo wo o ka tliša khutšo mo lefaseng, lefase la rena le tla ba le tletše ka dintwa, ditlala le ditšhišinyego tša lefase.—Mateo 24:3, 7.

  Dilo tšeo re di bona gabotse lehono. Ka gona re ka kgodišega gore kgauswinyane Mmušo wa Modimo o tla fediša mathata ao ka moka.