1 Timothy 3:1-16
3 Kóháʼníinii éí tʼáá aaníí: Diné łaʼ oodlání yá sizíinii deeshłeeł jinízingo, naanish tʼáá íiyisí yáʼátʼéehii jinízingo átʼé.
2 Áko daʼoodlání bá dzizíinii tsʼídá tʼáadoo bee hakʼíhótʼahí da doo, asdzání tʼááłáʼíígíí bahastiin jílı̨́į doo, ádaa áhojilyą́ągo jiináa doo, hojíyą́ą doo, bohónéedzą́ągo jiináa doo, haʼałkʼee nídaakahígíí bichʼįʼ hoł ílı̨́į doo, naʼnitin jiichįįh doo;
3 wáin doo bee tsiʼnijigháa da doo, doo atsʼííd ádąąh jitʼı̨́į doo, naʼadloʼgo bee béeso álʼíinii doo bíchą́yízhdéelniʼ da doo, nidi haʼjólníi doo, doo saad íjíʼáah da doo, índa doo adáninilníi da doo.
4 Haghan hazʼą́ągi yáʼátʼéehgo dah ajooʼish doo, haʼáłchíní hódahółníihgo tʼáá ałtsojįʼ bił daʼílı̨́įgo ádzósin doo.
5 Háálá haghan hazʼą́ągi yáʼátʼéehgo dah ajooʼish dooleełgi doo bééhodzísingóó, haa yitʼéegoshąʼ Diyin God dayoodlání áłah nádleehii bá dzizı̨́į dooleeł?
6 Ániid oosdląądii éí dooda, jó, éí tʼáá áko ádaa hodzódlí bide átʼįįhgo biniinaa níłchʼi bidaʼiiníziinii binanitʼaʼí bá nihootʼánígi átʼéego há nihodootʼáałgo átʼé.
7 Nidi yáʼátʼéehgo jiináago, doo daʼoodlání danilíinii tsʼídá yáʼátʼéehgo haa dahalneʼ doo, doodaiiʼ niʼjiisíhígíí bee hakʼíhátʼáahgo éí níłchʼi bidaʼiiníziinii binanitʼaʼí biloh biishdoogááł.
Daʼoodlání yaa ádahalyáanii
8 Tʼáá ákótʼéego daʼoodlání yaa ádahalyáanii ałdóʼ tʼáadoo yíní ádahozhdildiní doo, doo naakidę́ę́ʼ yádajiłtiʼ da doo, wáin doo bee tsiʼnijigháa da doo, naʼadloʼgo bee béeso álʼíinii doo bíchą́yízhdéelniʼ da doo,
9 nidi tʼáá ákogi ádajitʼı̨́įgo bee ádaa ákodaznidzingo Diyin God binaʼnitin woodláanii doo bééhózin da yę́ę dajótąʼ doo.
10 Átsé nidahoʼdiskáaʼ doo, áko tʼáadoo bee hakʼídahótʼahígóó hwéédahoozingo índa daʼoodlání baa ádahojilyáanii dazhdooleeł.
11 Tʼáá ákótʼéego hweʼasdzą́ą́ tʼáadoo yíní ádahodildiní doo, tʼáadoo aseezı̨́ ádeiłʼíní doo, ádaa ádahalyą́ą doo, tʼáá ałtsojįʼ badaʼahódlíi doo.
12 Daʼoodlání baa ádahojilyáanii tʼááłáʼí hweʼasdzą́ą doo, haʼáłchíní índa haghan hazʼą́ągi yáʼátʼéehgo dah daʼjíʼéesh doo.
13 Háálá yáʼátʼéehgo nidajishnishgo bee daʼjílíinii ádá shódadzoostʼeʼ doo, índa tʼáadoo dadzistiʼí Christ Jesus woodláanii bee nidazhnitingo hwéédahoʼdílzin doo.
Naʼnitin doo bééhózin da yę́ę
14 Tʼáá hahí naa deeshááł nisin, nidi díí bee nidaʼnitinígíí átsé bee nichʼįʼ akʼeʼashchí.
15 Áko shidiʼneestłʼah ládą́ą́ʼ, Diyin God dayoodláanii áłah nádleehgi ádaa ádahalyą́ą dooleełgi tʼáá nił bééhózin doo. Daʼoodlání tʼáá łaʼ bizhiʼee Diyin God hináanii bíhígíí éí tʼáá aaníinii bá siláii índa bee niłdzilii átʼé.
16 Deiniidláanii bínaʼniltin doo bééhózin da yę́ę éí tsʼídá doo naaki nilı̨́ı̨́góó ayóó átʼéii átʼé:
Diyin God éí atsʼíís silı̨́įʼgo yitʼíní
ályaa,Níłchʼi Diyinii bee tsʼídá tʼáá ákogi ájítʼé hoʼdooʼniid,áádóó diyingo nidaalʼaʼii dahoołtsą́,ałʼąą dineʼé bitahgóó haa hóóneʼ,nihokáaʼgi hoʼdoosdląądgo haʼoosdlííʼ,yáʼąąshdi adinílííd biyiʼjįʼ náhoʼdiiltı̨́.
