Exodus 3:1-22
3 Ákohgo Mózes baadaaní jílíní Jéthro wolyéii bilı̨́ı̨́ʼ bá baa áhojilyą́; éí Mídiyan hoolyéédóó nááʼiiłniihii nilı̨́įgo bilı̨́ı̨́ʼ dashdíníiłkaadgo eʼeʼaahjigo honoojíígóó Diyin God biDził Hóreb hoolyéejįʼ izhʼnííłkaad.
2 Áko Bóhólníihii bidiyingo naalʼaʼí hachʼįʼ yitʼíní íʼdiilyaa; dówózhii biyiʼdóó kǫʼ dah nídínaʼgo jiníłʼı̨́įgo dówózhii doo adikʼą́ą́hgóó diltłiʼ lá.
3 Áko Mózes ání, Haaʼíyeeʼ bichʼįʼ nideeshááł; díí ayóó átʼéii níshʼínígíí haléitʼéego doo adikʼą́ąh da.
4 Éí bichʼįʼ nizhníyáago jinééłʼı̨́įʼgo Diyin God hoołtsą́ągo dówózhii diltłiʼígíí biyiʼdę́ę́ʼ áháłní, Mózes, Mózes. Áko ázhdííniid, Kǫ́ǫ́ sézı̨́.
5 Áádóó áhodííniid, Tʼáadoo wóshdę́ę́ʼ hidínáhí; nikeeʼ hadiidlé, háálá sínízínígi hodiyingo hazʼą́.
6 Áko ánáádíʼní, Danizhéʼé yę́ę biDiyin God áshtʼı̨́: Éíbraham biDiyin God áádóó Áízak biDiyin God índa Jéíkab biDiyin God nishłı̨́. Áko Mózes haniiʼ bichʼą́ą́h nizhdeelniiʼ, háálá Diyin God bikʼizhdooghał yę́ę béédzísdzííd.
7 Áko Bóhólníihii ání, Tʼáá aaníí Ííjip kéyahdi shidineʼé tiʼdahooníihgo yiiłtsą́, áádóó naanish binanitʼaʼí danilíinii yikʼee daachago ałdóʼ disétsʼą́ą́ʼ, háálá yikʼee tiʼdahooníhígíí shił bééhózin.
8 Éí bąą Ííjip dineʼé bílákʼee hááhodeeshʼnił biniyé hadahóóleʼ áádóó kéyahdóó yáʼáhootʼéehjįʼ áádóó hótsaa hazʼą́ąjįʼ chʼíhodeeshʼish; éí kéyah yáʼáhootʼéehgi abeʼ índa tsésʼná bitłʼizh bee ádaʼazįįdgo hazʼą́ąjįʼ, Kéínan dineʼé áádóó Het dineʼé áádóó Ámor dineʼé áádóó Píírez dineʼé áádóó Háíva dineʼé índa Jííbas dineʼé dabikédaayahjįʼ yah ahodeeshʼish.
9 Éí bąą kʼad, shoo, Ízrel dineʼé shichʼįʼ daachago disétsʼą́ą́ʼ, áko Ííjip dineʼé bide ádeinízingo tiʼdabiyoołníihgo tʼáá íiyisí bide ádahósingo yiiłtsą́.
10 Éí bąą kʼad tįʼ, Féro* bichʼįʼ nihééndeeshʼaał, áko shidineʼé Ízrel dineʼé danilíinii Ííjip kéyahdę́ę́ʼ chʼídííʼish.
11 Áko Mózes éí Diyin God ábizhdííniid, Hádą́ą́ʼ lá shígi átʼéii Féro yichʼįʼ deeyáago Ííjip kéyahdę́ę́ʼ Ízrel dineʼé chʼíiníʼeezh!
12 Diyin God ánááhodooʼniid, Tʼáá aaníí nił honishłǫ́ǫ doo, áko díí bee nichʼįʼ ééhózin doo; éí shí nííłʼaadgo Ííjip kéyahdóó diné chʼínéíníʼeezhgo díí dził bighą́ąʼdi Diyin God bichʼįʼ nidahohłáa doo.
13 Áko Mózes éí Diyin God ánéidooʼniid, Shoo, Ízrel bidineʼé baa níyáago ko daatsʼí ábidideeshniił, Danihizhéʼé yę́ę biDiyin God nihaa shiníłʼaʼ, dííniidgo ádashididooniił, Haashąʼ wolyé? Áko haʼátʼíishąʼ bidideeshniił?
14 Diyin God éí Mózes áyidííniid, Áshtʼínígíí tʼáá éí áshtʼı̨́. Áko ánáádooʼniid, Ízrel dineʼé kóbididííniił, Áshtʼı̨́ nínígíí tʼáá éí nihaa shiníłʼaʼ.
15 Áko Diyin God éí Mózes ánááyidooʼniidgo ání, Díí Ízrel dineʼé kóbididííniił, Danihizhéʼé yę́ę biBóhólníihii Diyin God, Éíbraham biDiyin God áádóó Áízak biDiyin God índa Jéíkab biDiyin God nihaa shiníłʼaʼ. Díí shízhiʼgo ahoolʼáa doo, índa náás adideezhchı̨́ı̨́góó tsʼídá bee shééhániih doo, ní.
16 Nílááh, Ízrel dineʼé yá aląąjįʼ naazíinii áłah áníléehgo ádabididííniił, Danihizhéʼé yę́ę biBóhólníihii Diyin God, Éíbraham áádóó Áízak índa Jéíkab biDiyin God, éí shichʼįʼ ííshjání íʼdiilyaago kóní, Nihí índa Ííjip kéyahgi nihichʼįʼ ádahóótʼįįdígíí baa ákoniizı̨́ı̨́ʼ, ní.
17 Áko haasdzíiʼgo bee nihoníʼáanii; éí Ííjip kéyahdi tiʼhooʼnííh bitsʼą́ą́dóó chʼínihideeshʼishgo Kéínan dineʼé áádóó Het dineʼé áádóó Ámor dineʼé áádóó Píírez dineʼé áádóó Háíva dineʼé índa Jííbas dineʼé bikédaayahjįʼ, kéyah yáʼáhootʼéehgi abeʼ índa tsésʼná bitłʼizh bee ádaʼazįįdgo hazʼą́ąjįʼ ánihideeshʼish.
18 Áko daníistsʼą́ąʼ dooleeł, áádóó ni índa Ízrel yá aląąjįʼ naazíinii bił Ííjip dineʼé binanitʼaʼí baa noohkaigo ádabididoohniił, Bóhólníihii éí Hííbrew dineʼé biDiyin God nihaa honíleʼ, áko kʼad nídaniikąąh, hániʼdii honoojíígóó tágí jı̨́ oonééł ánízahjįʼ nihééʼdííłnihgo áadi Bóhólníihii nihiDiyin God bichʼįʼ náádadiʼyiilnih.
19 Tʼáá aaníí díí shił bééhózin: Ííjip kéyahdóó aláahgo naatʼáanii doo nihééʼdoołnih da; tsʼídá yílá bee adziilii tʼéiyá yee nihééʼdoołnih.
20 Áádóó hakʼijįʼ kʼídideeshʼnihgo Ííjip dineʼé bikéyahgi ayóó átʼéego áhooníiłii tʼáá ałtso bee atíhodeeshłííł, áko índa nihééʼdoołnih.
21 Áko díí Hííbrew dineʼé bichʼohaʼnéego Ííjip dineʼé haa dajoobaʼgo ádeeshłííł, áko dah doohkáahgo doo tʼáá ákohígo dah didoohkah da.
22 Nidi asdzání tʼááłáʼí jinítínígo bił kéédahojitʼíinii índa haa dahakáhígíí éí yódí béésh łigaii áádóó óola índa ééʼda bídeízhdóokił; éí danihiyáázh índa danihichʼéʼé bee hadadidoohłííł, ákohgo éí Ííjip dineʼé tʼáá ákohígo ádadoohłíiłgo bitsʼą́ą́ʼ dah didoohkah.
Footnotes
^ Díí Féro éí Exodus 2:15 góneʼ yaa yáłtiʼígíí doo daatsʼí tʼáá éí átʼı̨́į da.
